Шоўранерам давялося апраўдвацца перад аўтарам за свае памылкі ў гісторыі Вестэроса.
Некалькі дзён таму ў сваім блогу Not a Blog амерыканскі пісьменнік Джордж Марцін, аўтар серыі раманаў «Песня лёду і агню», якія ляглі ў аснову папулярных серыялаў «Гульня тронаў» і «Дом Цмока», апублікаваў допіс, у якім заявіў, што ён мусіць напісаць, што пайшло не так з апошнім серыялам.
Нарэшце 4 верасня пісьменнік апублікаваў у блогу вялікі тэкст з крытыкай другога сезона «Дома Цмока». Але правісеў ён нядоўга. Праз невядомую прычыну допіс быў выдалены ўсяго праз некалькі гадзін. Фанаты, вядома, паспелі захаваць тэкст і апублікаваць яго на іншых платформах.
Чытайце таксама: Другі сезон «Дома Цмока» падмануў чаканні
Што ж не спадабалася старычыне Марціну ў экранізацыі сваёй гісторыі пра грамадзянскую вайну паміж прадстаўнікамі дынастыі Таргарыенаў за ўладу над Вестэросам?
Марцін адзначыў, што самі серыі былі выдатнымі: добра напісаныя, добра знятыя, моцна сыграныя. Але адзін эпізод выклікаў у гісторыі «эфект матыля», як у вядомым апавяданні Рэя Брэдберы, і Марцін не ўяўляе, як шоўранеры змогуць выйсці з гэтай сітуацыі.
Прычынай крытыкі стаў эпізод, дзе найміты Кроў і Сыр урываюцца ў пакоі каралевы Хэлейны, каб спагнаць з яе крывавы доўг за смерць прынца Люцэрыса, «вока за вока». Ёй прапануюць выбраць праміж 6-гадовымі двайнятамі Джэйхейрысам і Джэйхейрай. Хэлейна паказвае на дачку, але забойцы жорстка распраўляюцца ў яе на вачах з яе сынам і спадчыннікам караля Эйгана II.
Вось толькі па кнізе ў пары было трое дзяцей і выбіраць Хэлейну прымусілі паміж 2-гадовым Мэйларам і старэйшым Джэйхейрысам. У серыяле Мэйлара не існуе ўвогуле. Як адзначае Марцін, маленькі прынц аказвае ўплыў на ход далейшых падзей сюжэту, непрапарцыйны свайму ўзросту. На яго гісторыі завязаны жыцці галоўных персанажаў і вырашэнне ўсяго міжусобнага канфлікту Таргарыенаў.
Націсніце, калі хочаце прачытаць спойлер
Прычынай адыходу ад кнігі стала эканомія грошай. Стваральнікі серыяла ўжо даўно маюць праблемы з бюджэтам, таму эканоміць імкнуліся ўсюды, дзе маглі. Але пасля страты Мэйлара значная частка далейшай гісторыі губляе сэнс. У трэцім і чацвёртым сезоне фанатаў, відаць, чакае яшчэ большае разыходжанне з кніжным арыгіналам.
Рэакцыя HBO на крытыку ад пісьменніка не прымусіла сябе чакаць:
«Цяжка знайсці большых фанатаў Джорджа Р. Р. Марціна і яго кнігі «Полымя і кроў», чым прадзюсарскі і творчы калектыў «Дома Цмока» і мы ў HBO.
Пры адаптацыі кнігі для тэлеэкранаў з іх асаблівасцямі і абмежаваннямі шоўранеры вымушаны прымаць цяжкія рашэнні наконт персанажаў і іх сюжэтных ліній.
Мы лічым, што Раян Кэндал і яго каманда прарабілі цудоўную працу, і мільёны фанатаў серыяла, сабраных ім за першыя два сезоны, працягнуць захоплена глядзець яго», — адказалі ў кампаніі на крытыку.
Амаль адначасова з публікацыяй паведамлення Марціна афіцыйны падкаст серыяла выліўся незапланаваным выпускам з Раянам Кэндалам, дзе той паразважаў пра тонкасці пры адаптацыі тэксту пад экранізацыю і прызнаўся ў вялікай любові да Джорджа Марціна.
Ён заявіў, што гледачы самі зразумеюць, чаму мэйстры ўнутры свету запісалі хроніку менавіта так, і што важнасць адрозніваць павагу да арыгіналу і пакланенне перад ім.
«Наша Нiва» — бастыён беларушчыны
ПАДТРЫМАЦЬБылы афіцэр, выжыў у страшным баі. Хто той каліновец Верамейчык, якога В’етнам аддаў беларускаму КДБ?32
Каментары