Міністэрства культуры загадала прыбраць з будынка на тэрыторыі Брэсцкай крэпасці цытаты Сталіна і пакараць аўтараў
Адпаведны ліст атрымалі брэсцкае аддзяленне Беларускай сацыял-дэмакратычнай партыі і брэсцкі праект «За свой горад».
З месяц таму на адным з будынкаў на тэрыторыі Брэсцкай крэпасці з'явіліся дзіўныя надпісы з цытатамі камуністычных правадыроў.
На гэта звярнулі ўвагу актывісты Беларускай сацыял-дэмакратычнай партыі, у прыватнасці, Ігар Маслоўскі, які напісаў скаргу ў Міністэрства культуры з просьбай даць ацэнку такім дзеянням.
«Група асоб на чале з кіраўніком «Моладзевага патрыятычнага цэнтра» на тэрыторыі Брэсцкай крэпасці Пятром Піцко самавольна наносіць надпісы на фасад будынкаў, размяшчае ў вокнах уласныя фотаматэрыялы са сцэнамі гвалту. Апроч таго, імі праведзеная вырубка дрэваў без адпаведнага дазволу», — пісаў ён.
На днях прыйшоў адказ, у якім Мінкульт канстатуе, што неабходна выправіць сітуацыю — адпаведнае даручэнне накіраванае брэсцкім уладам.
«[…] З улікам вышэйвыкладзенага, а таксама з мэтай прадухілення парушэнняў на гісторыка-культурнай каштоўнасці Міністэрствам культуры ад 06.11.2018 накіраваны зварот у Брэсцкі гарвыканкам аб неабходнасці дэмантажа банераў, а таксама выдалення надпісаў з фасадаў аб'ектаў спадчыны.
Брэсцкаму аблвыканкаму Міністэрствам культуры даручана арганізаваць падрыхтоўку пратаколаў аб адміністратыўных парушэннях», — паведамляецца ў лісце.
Таксама там гаворыцца, што Брэсцкі аблвыканкам ужо пачаў вытворчасць па 19.2 (невыкананне патрабаванняў ахоўных абавязкаў) і 19.3 (парушэнне парадку работ на гісторыка-культурных каштоўнасцях) артыкулах Адміністратыўнага кодэкса.
Адказнасць па гэтых артыкулах прадугледжвае штрафы ад 8 да 500 базавых велічынь.
У размове з «Нашай Нівай» аўтар гэтай «рэканструкцыі» Пётр Піцко не здолеў уцямна патлумачыць, з якой мэтай ён наносіў цытаты Сталіна на сцены.
Ён сцвярджае, што гэта пастанова Мінкульта яго, найхутчэй, не датычыць, бо «будынкі не адносяцца да мемарыяла».
Піцко пацвердзіў, што дадзены будынак не знаходзіцца ў ягонай асабістай уласнасці. «У мяне ва ўласнасці толькі два камплекты «Горкі» [камуфляж] і стары «Опель», — сказаў ён.
«Я тая яшчэ памідорка». Што Ігар Тур піша ў тэлеграм-чатах са свайго асноўнага акаўнта5
Каментары