Japonskaja kampanija Panasonic zapuściła vytvorčaść televizaraŭ u Biełarusi. Pra heta paviedamiŭ dyrektar dyvizijona spažyvieckaj elektroniki kampanii Panasonic Rasija Siarhiej Kažeŭnikaŭ.
«U pierśpiektyvie pracent televizaraŭ miascovaj zborki (biełaruskaj) moža dasiahnuć 80% ad ahulnaha abjomu televizaraŭ Panasonic, jakija pradajucca ŭ Mytnym sajuzie», — skazaŭ Kažeŭnikaŭ ahienctvu TASS, padkreśliŭšy, što heta adbudziecca nie raniej za 2017 hod.
Pavodle słoŭ Kažeŭnikava, rynak JEAES, niahledziačy na kryzis, zastajecca adnym z najbujniejšych u Jeŭropie. Panasonic taksama płanuje pačać pastaŭki televizaraŭ biełaruskaj vytvorčaści va ŭsie krainy byłoha SSSR i Jeŭrasajuza.
Na pieršym etapie kampanija zapuścić u Biełarusi vytvorčaść troch madelaŭ televizaraŭ Viera siaredniaj cenavaj katehoryi z dyjahanallu 24, 32 i 43 calaŭ i pašyreńniem HD i Full HD. Łakalizavanaja raspracoŭka i vytvorčaść źnizili košt tavaraŭ na 10—15% u paraŭnańni z madelami anałahičnych charaktarystyk, jakija impartujucca, adznačyli ŭ Panasonic.
Televizary biełaruskaj zborki źjaviacca ŭ prodažy ŭžo ŭ kastryčniku. Kažeŭnikaŭ dadaŭ, što madelny šerah moža być pašyrany ŭ pačatku 2017 hoda, paśla taho jak buduć zrobleny pieršyja vysnovy pa prodažach.
Panasonic arhanizuje vytvorčaść televizaraŭ pa pryncypie kantraktnaj zborki. Biełaruskuju kampaniju, jakaja vystupić partnioram japonskaj karparacyi, pradstaŭnik Panasonic nie nazvaŭ, adnak adznačyŭ, što heta nie pieršaje ich supracoŭnictva. Hety ž partnior vyrablaje dla Panasonic mikrachvalevyja piečy.
Mikrachvalevyja piečy pad takimi brendami, jak Midea, Horizont, Vitek, Daewoo, Sharp, Bosch, Panasonic i inšymi, vyrablaje sumiesnaje tavarystva z abmiežavanaj adkaznaściu «Midea-Haryzont». Heta biełaruska-kitajskaje vytvorčaje pradpryjemstva, raźmieščanaje na terytoryi SEZ «Minsk», stvorana ŭ 2007 hodzie najbujniejšym u Kitai vytvorcam bytavoj techniki «Midea Hrup» i AAT «Kirujučaja kampanija chołdynhu «Haryzont».
Kamientary