«Heta bolš nie zona svabody i praŭdy». Siarhiej Padsasonny pakidaje «Biełsat»
Viadučy Siarhiej Padsasonny ŭ prahramie «Tydzień» zajaviŭ pra toje, što pakidaje «Biełsat», na jakim jon pracavaŭ 17 hadoŭ: «Zrabić vyhlad, što ničoha nie adbyłosia i zmaŭčać, ja nie mahu».
«Zrabić vyhlad, što ničoha nie adbyłosia, i zmaŭčać ja nie mahu», — tak Siarhiej Padsasonny raźvitaŭsia z hledačami ŭ žyvym efiry prahramy «Tydzień».
Akramia taho, jon apublikavaŭ post u fejsbuku. Tam jon piša, što pryjšoŭ na kanał u sakaviku 2007 hoda.
«Siońnia heta skončyłasia. Byli tysiačy intervju, sotni repartažaŭ, śpiecvydańni, Ukraina, Irak, Palestyna, ZŠA, Kanada… Heta tut ja vypuściŭ 8 hadzinaŭ žyvoha efiru ź Vilni, kali my chavali Kastusia Kalinoŭskaha i paŭstancaŭ; rabiŭ śpiecefiry z Vatykanu i Viflejemu na Rastvo; pravioŭ tysiačy hadzinaŭ žyvych efiraŭ pra pratesty, vajnu, haračyja padziei», — napisaŭ jon.
Padsasonny dadaŭ, što aŭtarskaja prahrama «Tydzień», jakuju jon prydumaŭ ź Iharam Kulejem była ich «terytoryjaj svabody».
«Nikoli i nichto za amal čatyry hady nie dyktavaŭ, jak maje vyhladać efir», — napisaŭ jon.
«Mienavita ŭ prahramie «Tydzień» 17 listapada 2024 h. adbyłosia intervju z Alinaj Koŭšyk, jakaja stała kiraŭnicaj biełaruskaj redakcyi «Biełsat». I za hetaje intervju, miž inšaha, byŭ źniaty z pasady kiraŭnika ńjusruma Ihar Kulej. Druhaja pryčyna: na pačatku prahramy «Abjektyŭ» 19 listapada 2024 h. ja raźvitaŭsia z Alaksiejem Dzikavickim, jaki stvaraŭ «Biełsat» i addaŭ jamu 18 hadoŭ žyćcia. Kažuć, intervju «parušyła žurnalisckija standarty», a pryvitańnie «złamała farmat», a navat — ja byŭ abvinavačany ŭ «chłuśni» ŭ efiry. Adrazu skažu, što anijakaha prapisanaha farmatu prahramy nie isnavała. Tamu nielha złamać niešta, čaho niama. Jak niama i ani słova chłuśni ŭ maim raźvitańni, jakoje było zvyčajnym čałaviečym žestam padziaki za pracu», — patłumačyŭ jon.
Jon dadaŭ, što jaho standarty nie supadajuć z napisańniem «słužbovych natatak kiraŭnictvu, danosami i padchalimstvam, maŭčańniem i stracham».
«Paśla publičnych i niepubličnych prynižeńniaŭ u bok Ihara Kuleja i mianie asabista nie mahu bolš zastavacca na kanale, jaki ŭ takim vyhladzie ŭžo nie liču maim. Heta bolš nie zona svabody i ščyraści, praŭdy, jakuju my stvaryli i jakoj trymalisia», — dadaŭ jon.
15 listapada 2024 hoda redakcyja «Biełsata» daviedałasia pra pryznačeńnie novaj kiraŭnicy — Aliny Koŭšyk.
Vykanaŭca abaviazkaŭ dyrektara kanała Alaksiej Dzikavicki mieŭsia zastavacca na pasadzie da 3 śniežnia, adnak daterminova padaŭ zajavu ab zvalnieńni ŭžo ad 22 listapada.
Paśla sychodu Dzikavickaha i pryznačeńnia na pasadu hałoŭnaj redaktarki ŭ kalektyvie ŭźnik kanflikt, prajavaj jakoha stała niaprostaje intervju z Koŭšyk, jakoje ŭziaŭ Siarhiej Padsasonny.
29 śniežnia Ihar Kulej pravioŭ apošniuju pieradaču na «Biełsacie» i taksama pajšoŭ z kanała.
Koŭšyk pra zvalnieńnie Kuleja: Jaho zajavy nie adpaviadajuć rečaisnaści i škodziać reputacyi kanała
Vialikaja hutarka z Alinaj Koŭšyk — pra intervju z Padsasonnym, skandał z Kulejem i reformy na «Biełsacie»
Alaksiej Dzikavicki raskazaŭ, dzie budzie ciapier pracavać
Koŭšyk: Heta i rukami Ramašeŭskaj zdaryłasia tak, što «Biełsat» całkam zaležny ad Polskaha telebačańnia
«Miarkuju, Makiej by ŭchvaliŭ». Aŭtar pomnika kiraŭniku MZS raskazaŭ, jakija sensy ŭkłaŭ u jaho5
Kamientary
Nadiejuś biełorusy smohut otkryť svoj kanał.