Prakuratura na baku Słučaka: rajvykankamu daručyli padrychtavać spravu za abrazu movy padletkam

16-hadovy maładzion u abmierkavańni va «Ukantakcie» nazvaŭ biełaruskuju movu «miortvaj», na što Ihar Słučak adkazaŭ skarhaj u Salihorski rajvykankam. Kali jamu pryjšoŭ adkaz, što «padstaŭ dla pryciahnieńnia da administracyjnaj adkaznaści žychara Salihorska niama», Słučak źviarnuŭsia ŭ prakuraturu.

Pavialičyć

«Pakolki ja źviartaŭsia ŭ Salihorski rajvykankam z zajavaj u miežach PVKaAP [Pracesualna-vykanaŭčaha kodeksu ab administracyjnych pravaparušeńniach — NN], a nie zakona «Ab zvarotach hramadzian i jurydyčnych asob», a taksama ŭličvajučy toje, što mnie nie była dasłana Pastanova ab spynieńni administracyjnaha pracesu, jość usie padstavy mierkavać, što naležnaja pravierka pa majoj zajavie nie pravodziłasia. Prašu pravieści pravierku pa fakcie paŭnaty i jakaści razhladu majoj zajavy ŭ Salihorskim rajvykankamie i paviedamić ab vynikach pravierki i zakonnaści pryniataha Salihorskim rajvykankamam rašeńnia pa majoj zajavie», — pisaŭ u zvarocie Ihar Słučak.

Paźniej Iharu pryjšoŭ list ad maci padletka, jana prasiła zabrać zajavu. Žančyna pisała, što jaje syn uśviadomiŭ pamyłkovaść svajho mierkavańnia i hatovy publična paprasić prabačeńnia za svaje słovy na staroncy supołki va «Ukantakcie», dzie ŭsio i pačałosia. Maci padletka taksama prasiła daravać jaje synu nieabačlivaść, pakolki jon niadaŭna pieranios chimijapramianiovy kurs terapii pry lačeńni złajakasnaha ankałahičnaha zachvorvańnia. Hetaja akaličnaść i spravakavała burnuju dyskusiju ŭ internecie — nakolki pravilna ci niapravilna damahacca pakarańnia za abrazu movy pry takich abstavinach.

Zajavu Ihar zabirać nie staŭ, pakolki list ad imia maci byŭ dasłany z amal nieaktyŭnaha akaŭnta, što vyklikała pytańnie nakont sapraŭdnaści napisanaha. Dy i nieviadoma było, što adkaža prakuratura.

Dniami Ihar Słučak atrymaŭ list za podpisam prakurora Salihorskaha rajona Aleha Aŭdzieja.

«Padčas pravierki ŭstanoŭlena, što zahadčyk siektara ideałahičnaj raboty adździeła ideałahičnaj raboty, kultury i pa spravach moładzi Salihorskaha rajvykankama Cuba N.M., źjaŭlajučysia asobaj, upaŭnavažanaj na składańnie pratakołaŭ ab administracyjnych pravaparušeńniach i padrychtoŭku spraŭ ab administracyjnych pravaparušeńniach da razhladu pa art. 9.22 KaAP Respubliki Biełaruś, nie zabiaśpiečyła naležnuju padrychtoŭku spravy da razhladu, a taksama nie pryniała pracesualnaje rašeńnie ŭ paradku art. 10.26 PVKaAP Respubliki Biełaruś», — havorycca ŭ adkazie.

U liście paviedamlajecca, što prakuror Salihorskaha rajona 23 maja nakiravaŭ u Salihorski rajvykankam daručeńnie padrychtavać spravu ab administracyjnym pravaparušeńni da razhladu i paviedamić pra vyniki padrychtoŭki Słučaku.

Prakuratura vyniesła aficyjnaje papiaredžańnie salihorskaj čynoŭnicy Natalli Cubie ab niedapuščalnaści paŭtornaha parušeńnia zakanadaŭstva, jakoje rehłamientuje paradak viadzieńnia administracyjnaha pracesu.

Słučak hatovy prasić dać chłopcu tolki papiaredžańnie, kali maci dašle papiarovy list

«Adkazam ja całkam zadavoleny, bo sapraŭdy hetaja sprava nie razhladałasia naležnym čynam, nie było nijakaha abhruntavańnia, čamu vykazvańnie nie maje abraźlivaha značeńnia, bo ja liču, što abraza jość. I za jaje musić być pakarańnie ŭ prykład inšym niepaŭnahadovym. Nielha abražać biełaruskuju movu i na hetym zarablać łajki, — kamientuje Ihar Słučak. —

Na akaŭnt, ź jakoha mnie pryjšoŭ zvarot maci, ja napisaŭ, kab mnie dasłali hety list u piśmovym vyhladzie na moj paštovy adras. Kali list sapraŭdny, to ja źviarnusia ŭ administracyju Salihorskaha rajvykankama z prapanovaj pryciahnuć chłopca da adkaznaści, ale minimalnaj, to bok kab jamu dali tolki papiaredžańnie. Takoje, u pryncypie, mahčyma, navat kali sankcyja hetaha nie praduhledžvaje».

Ihar dapuskaje, što chłopca mohuć nijak nie pakarać pa toj prostaj pryčynie, što vyjduć terminy. Na jaho dumku, choć hetaha i žadaje šyrokaja hramadskaść, dla biełaruskaj movy heta budzie nie samym lepšym vynikam. Asabliva ŭ situacyi, kali mnohija pačali śpiekulavać na roznych žyćciovych akaličnaściach spravy.

«Jak ja kazaŭ, heta nie apraŭdańnie abraźlivym pavodzinam. Šmat chvorych, niepaŭnahadovych ludziej pavodziać siabie vielmi hodna. Nam, biełarusam, usio ž taki treba admovicca ad hetych nie zusim pravilnych padychodaŭ», — davodzić Ihar.

Darečy, homielski pravaabaronca Leanid Sudalenka prapanavaŭ Iharu zaklučyć pary. Maŭlaŭ, jon napiša toje samaje, što napisaŭ padletak. Słučak zapatrabuje pryciahnuć Sudalenku da adkaznaści, a toj budzie nastojvać na tym, što heta ŭsiaho tolki mierkavańnie. Kropku ŭ sprečcy musić pastavić Kamitet pa pravach čałavieka AAN.

Iharu hetaja ideja padajecca sumnieŭnaj.

«Dla mianie heta dziŭna, bo jość try čałavieki, pakaranyja za abrazu biełaruskaj movy. Čamu nie dapamahčy im, čamu nie dapamahčy tamu ž Vasilu Varuščanku [eks-milicyjant, jaki va «Ukantakcie» napisaŭ: «Biełaruskaja mova — heta trup, jaki hnije, jaho para ŭžo zakapać jak maha hłybiej. Tak liču» — NN]? Ja ŭvohule baču tut nie pravaabarončy padychod, a pijar na skandale», — dadaje Ihar Słučak.

Raniej Sudalenka zajaŭlaŭ, što hatovy abaraniać salihorskaha chłopca ŭ KPČ u vypadku pryznańnia jaho vinavatym.

«Idzie śpiekulacyja, ludzi zabyvajuć pra sapraŭdny sens hetych spraŭ. Jon nie ŭ tym, kab pakarać usich i kožnaha, a ŭ tym, kab pakazać, što nielha abražać ni nacyjanalnuju, ni dziaržaŭnuju, ni jakuju inšuju movu. Pa-pieršaje, ad hetaha kryŭdna nośbitu movy. Pa-druhoje, kali havorka pra dziaržaŭnuju movu, to heta naŭprostavaja źniavaha nacyjanalnaŭtvaralnaha, dziaržavaŭtvaralnaha simvała. Kali my da takoha budziem skatvacca praz voś hety maralizm, praz emocyi, to spravy buduć drennyja.

Ź inšaha boku, dla pravavych sistem Anhlii, Hiermanii ci Francyi artykuł 9.22 KaAP «Parušeńnie zakanadaŭstva ab movach» absalutna niepatrebny, bo ich movy nie ŭraźlivyja. Dla Biełarusi ž heta vielmi nieabchodny artykuł, kab našu biełaruskuju movu ŭ toj situacyi, jakaja ŭ nas ciapier, niejak abaranić», — padsumoŭvaje Ihar Słučak.

Ihar Słučak, jaki dabiŭsia pakarańnia za abrazu biełaruskaj movy: «Mova sama siabie abaranić nie moža» — intervju

• 0
• 0
• 0
• 0
• 0
• 0
• 0
• 0