Vajna pamiž Izrailem i CHAMAS: baki vypuścili sotni rakiet, a kolkaść achviar raście
U sieradu isłamisckaja hrupoŭka CHAMAS, što kantraluje siektar Haza, i armija Izraila praciahvali aktyŭna abmieńvacca ŭdarami. Paleścincy vypuścili pa izrailskaj terytoryi dziasiatki rakiet u adkaz na ŭdary vajenna-pavietranych sił Izraila, u vyniku jakich byŭ razburany jašče adzin šmatpaviarchovy budynak u Hazie, paviedamlaje Bi-bi-si.
Paviedamlajecca, što z paniadziełka, kali baki pačali ŭzajemnyja napady, u siektary Haza zabityja prynamsi 67 čałaviek, u tym liku 17 dziaciej. Paleścinskaje Minzdaroŭja, jakoje kantraluje CHAMAS, paviedamlaje, što ad izrailskich udaraŭ paraniena kala 390 čałaviek.
Z boku Izraila zahinuli siem čałaviek, u tym liku adno dzicia, vajskoviec i hramadzianin Indyi. Za apošni dzień rakiety razryvalisia ŭ niekalkich izrailskich haradach, u tym liku ŭ Sderocie na poŭdni krainy, dzie ŭ vyniku trapleńnia ŭ žyły dom byŭ zabity šaścihadovy chłopčyk. U aŭtorak Izrail paviedamiŭ, što ahulnaja kolkaść paranienych skłała kala 100 čałaviek.
U noč na čaćvier paśla paŭzy ŭ niekalki hadzin paleścinskija hrupoŭki adnavili rakietnyja abstreły Izraila.
Jak paviedamlajuć izrailskija ŚMI, sireny pavietranaj tryvohi byli čutnyja na poŭdni i ŭ centralnaj častcy Izraila, a taksama ŭ niekatorych haradach na poŭnačy, jakija znachodziacca na paraŭnalna vialikaj adlehłaści ad siektara Haza.
Izrail taksama padvierhnuŭ rakietnym abstrełam paŭnočnyja rajony siektara Haza ranicaj u čaćvier. Pavodle infarmacyi ŚMI, Armija abarony Izraila, u pryvatnaści, viała ahoń pa budynku, u jakim bazujucca raźviedsłužby CHAMAS, a taksama — pa banku, praź jaki hrupoŭka pravodzić svaje finansavyja apieracyi.
U sieradu ŭviečary premjer-ministr Izraila Bińjamin Nietańjachu apisaŭ abstanoŭku ŭ izrailskich haradach jak «nievynosnuju». «Anarchii my nie pacierpim, — skazaŭ kiraŭnik urada ŭ videazvarocie. — Zusim niedapuščalna, kali natoŭpy arabaŭ napadajuć na jaŭrejaŭ — ci kali natoŭpy jaŭrejaŭ napadajuć na arabaŭ».
Asabliva žorstkija sutyknieńni adbyvalisia ŭ horadzie Łod, jaki raźmieščany kala hałoŭnaha mižnarodnaha aeraporta Izraila Ben Huryjon. Paviedamlajecca, što tut padpalili sinahohu i niekalki aŭtamabilaŭ, u nasielenym punkcie ŭviali nadzvyčajnaje stanovišča.
Akramia taho, paviedamlajecca pra sutyknieńni arabskich demanstrantaŭ z palicyjaj u horadzie Chajfa. Jość taksama źviestki ab novych sutyknieńniach va Uschodnim Ijerusalimie i ŭ niekalkich haradach na Zachodnim bierazie raki Iardan.
Nietańjachu zajaviŭ, što ŭrad krainy zrobić usio mahčymaje, kab abaranić Izrail jak ad źniešnich vorahaŭ, tak i ad biesparadkaŭ, jakija adbyvajucca na terytoryi krainy. Adnak paleścinskaja administracyja asudziła dziejańni Izraila jak «vajennuju ahresiju», jakaja «traŭmiruje dva miljony ludziej, što i tak znachodziacca ŭ adčajnym stanoviščy».
Zhodna z danymi izrailskaj armii, za try dni pa terytoryi Izraila było vypuščana kala 1,5 tys. rakiet, bolšaść ź jakich byli źbityja pry dapamozie sistemy SPA «Žalezny kupał».
U sieradu ŭviečary miljony izrailcian znoŭ byli vymušanyja spuścicca ŭ bambaschoviščy.
RAW FOOTAGE: This is the moment the Iron Dome intercepted a barrage of rockets over Tel Aviv and central Israel. pic.twitter.com/8jl8OTgWCl
Źbićcio paleścinskich rakiet «Žaleznym kupałam».
«Ciabie b baćka praklaŭ»: maci fihuranta «małočnaj spravy» prabiłasia na spatkańnie ź im, kab ślozna paprasić nie supracoŭničać sa śledstvam3
Kamientary