Epidemija COVID-19 sychodzić nazaŭsiody? Možna vydychnuć ci rana rassłablacca? Spytali ŭ miedykaŭ
U Minzdaroŭja zajavili, što situacyja pa zachvorvańniach na COVID-19 stabilizavałasia. Apošnija aficyjnyja danyja fiksavali ŭ rajonie 50-400 novych pacyjentaŭ za sutki, i z 11 maja infarmacyja pa karanavirusie budzie publikavacca tolki raz na miesiac. Kavidnyja abmiežavańni zdymajucca i ŭ śviecie. Ci značyć heta, što samaje strašnaje zastałosia ŭ minułym? Spytali mierkavańnie miedykaŭ.
«Niezrazumieła, ci nie budzie novych mutacyj»
U Ministerstvie achovy zdaroŭja prahnazujuć, što da vosieni infiekcyja pavinna pierajści ŭ niepandemičnuju, siezonnuju fazu.
Zhodny z čynoŭnikami doktar Valeryj Łyščyk, jaki byŭ zahadčykam adździaleńnia aniestezijałohii i reanimacyi Hrodzienskaj univiersiteckaj kliniki, a ciapier pracuje ŭ Polščy:
«Virus zmutavaŭ da toj stupieni, u jakoj prajaviŭsia «amikron» — vielmi łahodny typ, jaki nie vyklikaje ciažkich nastupstvaŭ i ŭskładnieńniaŭ. Heta, možna skazać, adzin z mnostva virusaŭ, na jakija chvareje čałaviectva. Amikron-štam, jaki pryjšoŭ u Biełaruś u kancy 2021 hoda, a paśla i padvid «stełs-amikron» nie davali takoj nahruzki na hramadstva i miedycynu ŭ płanie śmiarotnaści i špitalizacyi. Kali virus zastaniecca na hetym uzroŭni i nie budzie dalej mutavać, to my sapraŭdy budziem suisnavać ź im, jak ź jašče z adnoj chvarobaj — takoj, jak siezonny hryp, naprykład».
Kavidnyja pasłableńni nazirajucca nie tolki ŭ Biełarusi, dzie navat u razhar pandemii da infiekcyi stavilisia biezadkazna, ale i ŭ šmatlikich jeŭrapiejskich krainach: adčyniajucca miežy, źnikaje abaviazak nasić maski va ŭsich hramadskich miescach biez vyklučeńnia. Nakolki doŭha situacyja budzie padkantrolnaj? Infiekcyjanisty tut nie mohuć skazać na 100%.
«Usio zaležyć ad virusa: kali jon pačnie mutavać u kirunku, jakim i išoŭ — ad macniejšaha da słabiejšaha, kali jon pierastaŭ być ahresiŭnym, tady my zmožam dać jamu rady. Ale moža być i druhi varyjant: virus zmutuje ŭ niejki novy štam, padobny da «delty» ci inšaha, jaki vyklikaŭ pandemiju i prynios vielmi šmat śmierciaŭ. Nichto nie moža pradkazać budučyniu dakładna, bo my ŭsio jašče nie da kanca razumiejem pryrodu virusa», — kaža Valeryj Łyščyk.
Śpiecyjalist adnaho z rajonnych centraŭ hihijeny i epidemijałohii ŭ kamientaryi «Našaj Nivie» vykazaŭ zdahadku, što novy ŭzdym zachvorvalnaści mahčymy vosieńniu:
«Dumaju, bližej da vosieni ŭzdym budzie. Moža, nie taki značny i, mahčyma, budzie praciakać lahčej, bo ŭsio ž niejki imunitet u nasielnictva ŭžo jość, a virus za dva hady «parazhubiŭ» svaju moc».
Pahadžajecca z kalehami Ihar Tabolič, aniestezijołah-reanimatołah, jaki dva hady prapracavaŭ u kavidnych stacyjanarach. Ale jon vykazvaje aściarohu: ź vialikaj vierahodnaściu mahčymyja novyja mutacyi, jakija dojduć da nas z taho ž Kitaja, i tady kazać pra karanavirus tolki jak pra siezonnaje zachvorvańnie nie pryjdziecca.
«Choć aficyjnaj statystycy Minzdaroŭja davieru i mała (jana pišacca «palcam u nieba»), usio ž paŭsiudna sapraŭdy nazirajecca tendencyja na źnižeńnie kolkaści zachvorvańniaŭ. Tut hraje rolu prasłojka vakcynavanych i tych, chto naturalna pierachvareŭ.
Ale paralelna, naprykład, isnuje toj ža Kitaj z palitykaj «nulavoj ciarpimaści». Jany zajmalisia izalacyjaj usich, chto choć niejak sutykaŭsia z karanavirusam, pravodzili surjoznyja epidzachady. I na hetym fonie ŭ ich naturalny imunitet vielmi nizki. U ich utvaryłasia vialikaja prasłojka ludziej bieź imunnaha adkazu, pajšoŭ rost kolkaści zachvorvańniaŭ. I niezrazumieła, ci nie budzie vialikaj papulacyi novych mutacyj, jakija dojduć da nas i ŭtvorać pahrozu, vyklikaŭšy novyja chvali.
Praŭda, na maju dumku, kali rost kolkaści zachvorvańniaŭ i pojdzie, to budzie adnosna nievialikim, znoŭ ža, z ulikam utvoranaha imunitetu. Ź mienšymi ciažkaściami i śmiarotnaściu», — ličyć Ihar Tabolič.
Pa ŭsich pakazčykach Biełaruś farmalna apynułasia napieradzie krain-susiedak
Pa stanie na 10 maja (zhodna z aficyjnyj statystykaj), z pačatku pandemii ŭ Biełarusi byli zarehistravanyja 982 tysiač 867 čałaviek sa stanoŭčym testam na COVID-19. Pamierli 6 tysiač 978 pacyjentaŭ z vyjaŭlenaj karanavirusnaj infiekcyjaj. Vakcynavanyja — 5 979 000. Pa ŭsich pakazčykach Biełaruś farmalna apynułasia napieradzie krain-susiedak: u nas i mienšaja zachvorvalnaść, i najmienšy pakazčyk śmiarotnaści. Ale pry hetym akurat paśla pandemii Biełstat schavaŭ ad nasielnictva padrabiaznuju statystyku pa śmiarotnaści i naradžalnaści.
Praŭda, kali kazać pra vypadki novych zachvorvańniaŭ u inšych krainach, to na siońnia situacyja sapraŭdy vyhladaje bolš-mienš stabilizavanaj u paraŭnańni z tym ža sakavikom: u Polščy 13 maja zafiksavali 469 vypadkaŭ novych infikavanych (suprać 12690 u siaredzinie sakavika), u Litvie — 146 (suprać 6428), u Rasii — 4896 (suprać 36 678).
«Siarod pacyjentaŭ sa zdarovym ładam žyćcia śmiarotnaść nižejšaja»
Miedyki nie rajać zusim adkatvacca ŭ bieskłapotnyja dapandemičnyja časy ŭ płanie adsutnaści choć jakich mieraŭ biaśpieki.
«Myć čaściej ruki — zaŭsiody dobra, nie tolki ŭ suviazi z kavidam. Heta vyklučaje ryzyku taho ž rynavirusa, rotavirusa i inšych. Ale nasić maski va ŭsich pamiaškańniach, kali nie źjavicca niejki niebiaśpiečny štam virusa, bolšaj častcy nasielnictva nie abaviazkova. Heta aktualna dla tych, chto maje chraničnyja zachvorvańni, pažyłych ludziej — kaho moža «dabić» lubaja novaja virusnaja chvaroba», — ličyć Valeryj Łyščyk.
Što tyčycca vakcynacyi i revakcynacyi — kožny musić vyrašyć dla siabie.
«Asabista ja pakul dumaju i dalej revakcynavacca, kab siabie dadatkova zaścierahčy. Masku ž budu nasić u momant uzdymu virusnych infiekcyj — lubych, nie tolki kavidu», — kaža supracoŭnik centra hihijeny i epidemijałohii.
Aniestezijołah-reanimatołah Ihar Tabolič dadatkova nahadvaje:
«Faktary ryzyki dla kavidu viadomyja: atłuścieńnie, arteryjalnaja hipiertenzija, chraničnyja zachvorvańni dychalnych šlachoŭ, jakija mohuć pravakavacca paleńniem. Standartnaja prafiłaktyka tut — zdarovy ład žyćcia. Siarod pacyjentaŭ sa zdarovym ładam žyćcia śmiarotnaść nižejšaja, u ich taksama kudy radziej naziraŭsia postkavidny sindrom».
Čytajcie taksama:
Ułady Paŭnočnaj Karei ŭpieršyniu paviedamili ab pamierłych ad karanavirusa. Zarazilisia kala 18 tysiač čałaviek
Zališniaja śmiarotnaść u Biełarusi mahła skłaści 32 tysiačy čałaviek — danyja ŭciečki
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary