«Na padtancoŭcy ŭ rasijskich kurataraŭ». Pasoł Ukrainy daŭ adłup biełaruskamu telebačańniu
Pasolstva Ukrainy ŭ Biełarusi nakiravała notu ŭ MZS krainy z-za prahramy na biełaruskim telebačańni. Pra heta paviedamiŭ u fejsbuku pasoł Ihar Kizim.
U prahramie byŭ prademanstravany siužet pra Hieorhija Zarakišvili, jaki nibyta sprabavaŭ trapić va Ukrainu z dapamohaj pasolstva, kab tam vajavać na ŭkrainskim baku.
«Nie budu pierakazvać usio tryźnieńnie hetaha «siužeta», jaho lohka znajści na jutubie. Skažu adrazu, što pasolstva nakiravała adpaviednuju notu pratestu ŭ MZS Respubliki Biełaruś. Ścisła sutnaść u tym, što hety «aŭtar» śćviardžaje, što pasolstva nibyta źjaŭlajecca «viarbovačnym centram» dla adpraŭki «najomnikaŭ» va Ukrainu», — napisaŭ Kizim.
Jon nazvaŭ infarmacyju, pakazanuju ŭ siužecie, chłuśnioj, manipulacyjami i kryvadušnaściu.
«Prytym mantaž padsiužetaŭ nastolki zabłytany, što asnoŭnaja linija časam hublajecca.
Vyrazna vidać čarhovy ŭsplosk antyŭkrainskaj isteryi na viadučym dziaržkanale biełaruskaha telebačańnia i pošuk tak zvanych «kampramietujučych» materyjałaŭ dla pravakacyj suprać pasolstva i jaho supracoŭnikaŭ.
Pytańnie — jaki sens va ŭsioj hetaj chłuśni, manipulacyjach i kryvadušnaści dla biełaruskaha boku? Ja jašče mahu zrazumieć rasijski intares, ale biełaruski… Jak tut nie ŭspomnić pra letašniuju kahebešnuju «apieracyju» pa «vyjaŭleńni špijonaŭ» siarod supracoŭnikaŭ pasolstva (pryličyli navat našych achoŭnikaŭ), u jakoj vielmi mocna tyrčali efesbešnyja «vušy», — kanstatavaŭ Kizim.
Pasoł prapanavaŭ žurnalistam raskazać pra padrychtoŭku rasijskich mabilizavanych na biełaruskich bazach i hibiel 44 čałaviek (u tym liku piaciarych dziaciej) u vyniku rakietnaha ŭdaru ŭ Dniapry.
«Nu i dva słovy pra kryvadušnaść. Takim, jak Kaciuša, i ich kurataram chaciełasia b skazać: kali vy havorycie pra nibyta «zamiežnych najmitaŭ» va Ukrainie (zamiežniki, jakija vajujuć u rehularnym ukrainskim vojsku vyklučna dla abarony ŭkrainskaha naroda ad rasijskich zachopnikaŭ), to varta skazać i pra rasijskich pryzyŭnikoŭ-«mobikaŭ», jakija ciapier prachodziać padrychtoŭku na biełaruskich palihonach i adpraŭlajucca vajavać na ŭkrainski Danbas i inšyja ŭkrainskija terytoryi zabivać ukraincaŭ, u tym liku i baćkoŭ dziaciej, pra jakich havorycca ŭ pakazanym siužecie.
A jašče treba było b skazać pra tych 453 ukrainskich dziaciej, jakija byli zabityja rasijskimi vajskoŭcami z 24 lutaha 2022 hoda, jak i pra ŭkraincaŭ, jakija hinuć ad rasijskich rakietnych napadaŭ i abstrełaŭ mirnych ukrainskich haradoŭ amal kožny dzień», — piša pasoł.
«Čamu tak «hučna» maŭčać pra hetaje złačynstva? Pasprabuju adkazać. Dla hetaha treba być sumlennym žurnalistam, a nie pradažnym «prapahandystam» na padtancoŭkach u svaich rasijskich kurataraŭ.
A jašče dumać i dobra viedać materyjał, pierš čym «ukidvać» u efir łuchtu, padobnuju da «kaciušynaj». I, u hetym kantekście, parada — uvažliva słuchać/hladzieć maje intervju, a nie zajmacca manipulacyjami i nie «razhaniać» da biaskrajnaści svaje prapahandysckija fantazii», — reziumavaŭ Ihar Kizim.
Kamientary
,______________
Ułady kirujucca rasijskim intaresam. Naiŭnyja dziciačyja pytańni zadaje)