Anansavanaja niadaŭna rekanstrukcyja staličnaha kinateatra «Maskva», jak vyjaviłasia, praduhledžvaje tyja ž źmieny, što niekalki hadoŭ tamu vyklikali mocnaje abureńnie ŭ hramadstvie. Hetyja źmieny pasprabavali zamaskiravać, ale aktyvisty ŭsio roŭna zaŭvažyli ich. Pačatak rabot hruba parušyć zakon.
Telehram-kanał «Spadčyna», jaki śpiecyjalizujecca na achovie architekturnaj spadčyny Biełarusi, źviarnuŭ uvahu na toje, što prezientavany UKB Centralnaha rajona prajekt chavaje ad usich hałoŭnaje.
Aktyvisty začapilisia za dziŭny rakurs adzinkavaha rendara vonkavaha vyhladu kinateatra paśla rekanstrukcyi. Hety rakurs zrobleny stroha «anfas», u toj čas jak dobrym tonam u architektury ličacca bolš naturalnyja rakursy pad vuhłom da hałoŭnaha fasada, a pry najaŭnaści hatovaj madeli ništo nie zaminaje zrabić niekalki takich rendaraŭ.
Hetak ža dziŭna pakazanyja i interjery, u kadr nie traplaje vonkavaje zaškleńnie ŭ faje. Vidać, tamu, što najbolš kardynalnyja źmieny tyčacca mienavita jaho.
U kancy 2019 hoda prezientavany varyjant rekanstrukcyi kinateatra, jaki praduhledžvaŭ, što ciapierašni budynak apyniecca byccam u šklanym sietkavatym košyku, vyklikaŭ vialikaje abureńnie nie tolki siarod śpiecyjalistaŭ, ale i siarod šyrokaj hramadskaści. Faktyčna heta aznačała źniščeńnie adnaho z najbolš paznavalnych pomnikaŭ savieckaha madernizmu ŭ Biełarusi, jaki da taho ž uvachodzić u ansambl praśpiekta Pieramožcaŭ.
Tady, adčuŭšy supraciŭleńnie, ad prajekta rekanstrukcyi byccam by admovilisia. Ale ciapier uspłyŭ pierarobleny prajekt, da realizacyi jakoha prystupiać u kastryčniku biez usialakich papiarednich hramadskich abmierkavańniaŭ. Kali źviarnuć uvahu na detali, to budzie zrazumieła, što heta bolš kansiervatyŭny i prymityŭny varyjant taho, što prapanoŭvałasia ŭ 2019 hodzie.
Aktyvisty źviarnuli ŭvahu na toje, što siońnia sucelnaje zaškleńnie fasada kinateatra zroblena tak, što dobra prasočvajecca niz kansolnaha vynasu hladzielnaj zały, ale na rendary jon uvieś užo schavany za šklanoj ścianoj. Heta aznačaje, što ŭ čas rekanstrukcyi płanujuć istotna pavialičyć płošču kinateatra za košt płoščy pierad im.
Heta mahło być niedakładnaściu ci spraščeńniem rendara, ale takich chibaŭ zanadta šmat: pierad usim fasadam budynka ŭźnikaje bałkon, jaki raniej mieŭsia tolki z bakoŭ, tambur, jaki raniej vystupaŭ vonki, ciapier zahłybleny.
Heta aznačaje, što ź vialikaj vierahodnaściu kinateatr «Maskva» źmienić svajo paznavalnaje abličča. Sa znajomaha zastaniecca tolki dekaratyŭnaja kampazicyja, jakaja adsyłaje da zubcoŭ Maskoŭskaha kramla, ale architektura budynkaŭ, tym bolš madernisckich, heta nie stolki dekor, kolki abjomna-prastoravaje rašeńnie. Zamiest vyraznaha vynasu kinazały minčuki atrymajuć nievyrazny šklany kub.
Taksama ŭ horšy bok źmienicca i azdoba. Kali raniej heta byŭ bieły marmur, to ciapier jaho miesca zojmie tanny kieramahranit. Padobnaje rašeńnie ŭžo było realizavana ŭ 2022 hodzie na kancertnaj zale «Viciebsk» u abłasnym centry, dzie taksama byŭ źbity naturalny kamień, miesca jakoha zaniaŭ uciepleny vientfasad.
Pa fota možna zrazumieć, što pa svaich vartaściach naturalny kamień nie idzie ni ŭ jakoje paraŭnańnie z kieramahranitam, jaki vyhladaje jak drennaja tekstura ŭ videahulni. Toje ž samaje ciapier čakaje i staličny kinateatr.
Taksama źviartaje na siabie ŭvahu toj fakt, što miascovyja čynoŭniki čyniać pieraškody dla ŭziaćcia pad achovu budynka kinateatra. U vypadku nadańnia jamu statusu pomnika architektury pierabudovy fasadaŭ stanuć niemahčymymi.
Jak paviedamlajuć na kanale aktyvisty, jašče ŭletku minułaha hoda jany padali ŭ Minharvykanam 130-staronkavuju prapanovu, kab nadać status historyka-kulturnaj kaštoŭnaści ansamblu praśpiekta Pieramožcaŭ. Miascovy saviet razhladzieŭ prapanovu i dla pryniaćcia stanoŭčaha rašeńnia pa prysvajeńni ansamblu statusu pomnika architektury daručyŭ haradskomu kamitetu architektury ŭdakładnić učastki, na jakich raźmieščany budynki ansamblu.
Ale ŭ harvykankamie hetaje daručeńnie sabatavali. Za hod, jaki minuŭ z momantu padačy prapanovy, jana tak i nie była ŭdakładniena i nie była razhledžana paŭtorna.
Ale heta aznačaje, što raboty, jakija pačnucca ŭ kastryčniku na kinateatry, buduć niezakonnymi. Pavodle Kodeksa ab kultury da dnia pryniaćcia rašeńnia ab nieabchodnaści nadańnia achoŭnaha statusu musiać być prypynieny lubyja raboty, jakija mohuć akazać uździejańnie na abjekt.
Rekanstrukcyja budzie ździajśniacca pad voknami profilnaha Ministerstva kultury, ale małavierahodna, što ŭ ciapierašniaj Biełarusi heta niejak paŭpłyvaje na situacyju.
«Naša Niva» — bastyjon biełaruščyny
PADTRYMAĆČytajcie taksama:
Kinateatr «Maskva» ŭ Minsku čakaje kapitalny ramont
Łukašystaŭ zaniepakoiła źniščeńnie spadčyny. Ale jość niuans
Architekturnyja tvory aŭtara bieła-čyrvonaha-biełaha ściaha pryznanyja Suśvietnaj spadčynaj JUNIESKA
Stała viadoma pra zatrymańnie 77-hadovaha Vasila Hustyra, adnaho z najlepšych ahraryjaŭ Biełarusi2
Kamientary