U śledčym izalatary Varšavy znajšli paviešanym 19-hadovaha chłopca, byłoha palitviaźnia z Hrodna
Byłoha palitviaźnia Kiryła Kieturku znajšli miortvym 20 kastryčnika ŭ kamiery śledčaha izalatara ŭ Varšavie. Papiaredniaja viersija śledstva — suicyd. Ale ŭ samahubstva byłoha palitviaźnia ź Biełarusi vierać nie ŭsie, piša MOST. Na momant śmierci Kiryłu było 19 hod.
U 2022 hodzie Kiryła Kieturku adličyli z kaledža padčas jaho źniavoleńnia i asudzili da 2,5 hoda «chatniaj chimii» za kamientary i ŭdzieł u maršy. Praz hod chłopcu chacieli źmianić «chatniuju chimiju» na kałoniju, ale jon paśpieŭ zjechać ź Biełarusi.
Paśla ŭciokaŭ Kirył žyŭ u Varšavie. U kastryčniku 2023 hoda jon źnik i pierastaŭ adkazvać na paviedamleńni ŭ telehramie. Pieršym bić tryvohu staŭ jaho pryjaciel, jaki źviazaŭsia z redakcyjaj MOST.
— Apošni raz Kirył byŭ anłajn 10 kastryčnika. Nichto nie viedaŭ, dzie jon. I tolki praz 11 dzion jahonaj siamji patelefanavali ź biełaruskaj ambasady ŭ Varšavie i paviedamili, što Kiryła znajšli paviešanym u polskaj turmie. Kaniešnie, usie byli ŭ šoku i nie razumieli, jak jon apynuŭsia ŭ turmie i tym bolš paviešanym.
Pa infarmacyi MOST, Kiryła zatrymali ŭ Varšavie 10 kastryčnika za machlarstva ŭ internecie. Krynica redakcyi paviedamiła, što były palitviazień źviazaŭsia z hrupaj ašukancaŭ, jakaja, chutčej za ŭsio, zajmałasia kradziažom hrašovych srodkaŭ z bankaŭskich rachunkaŭ.
«Naša Niva» pisała pra zatrymanaha ŭ Varšavie biełarusa, jakoha vinavacili ŭ machlarstvie. Ašukancy telefanavali palakam i, pradstaŭlajučysia supracoŭnikami banka, pa viadomaj biełarusam schiemie vymańvali hrošy. Imavierna, heta była historyja Kieturki.
— Kiryła zatrymała palicyja 10 kastryčnika, a znajšli jaho paviešanym praź dziesiać dzion. Ci pałochali jaho, nieviadoma. Moža, pahražali vysyłkaj u Biełaruś, kudy jamu nielha było viartacca ni ŭ jakim razie. Jon były palitviazień, źbieh z «chatniaj chimii», davaŭ intervju ekstremisckim miedyja.
Nichto sa znajomych i siabroŭ Kiryła nie vieryć, što jon moh sam paviesicca. Jon prajšoŭ biełaruskuju turmu, dzie ździekujucca ź ludziej. Jaho nie złamali tam, i jon vyjšaŭ. I tut rezka ŭ varšaŭskaj turmie jon rašajecca na suicyd. Ciažka pavieryć.
Moža, jamu dapamahli heta zrabić, kab ničoha lišniaha nie skazaŭ? My ničoha nie viedajem. Treba padklučać biełaruskich i polskich pravaabaroncaŭ, pravodzić rasśledavańnie i dabivacca praŭdy, — ličyć surazmoŭca MOST.
Papiaredniaja viersija śledstva — suicyd. Tak napisana i ŭ daviedcy, jakuju pieradali razam ź ciełam u Biełaruś.
— U Kiryła niama svajakoŭ u Polščy, jakija mahli b tut zadać pytańni śledstvu. Ekśpierty dali vysnovu, što heta suicyd, na ciele nie było prykmietaŭ hvałtu. Cieła zmahli pieradać svajakam pry padtrymcy biełaruskaha pasolstva, — havoryć surazmoŭca.
U kancy kastryčnika cieła Kiryła pieravieźli ŭ Hrodna. Jaho pachavali 2 listapada ŭ rodnym horadzie pobač z baćkam.
Stała viadoma, chto žanich byłoj deputatki Maryi Vacilevič7
Kamientary