Pad Hrodnam znajšli 200-hadovaje vino. Ekśpierty vyśvietlili, ci možna jaho pić
Pałacava-parkavy kompleks «Vialiki Śviack Vałovičaŭ», što pa darozie z Hrodna na Aŭhustoŭski kanał, pačaŭ prymać haściej u lipieni. Dahetul zjaŭlajucca apoviedy pra niezvyčajnyja znachodki pry jaho restaŭracyi.
U nievialikim adasoblenym budynku vinakurni budaŭniki vypadkova natrapili na zakapanyja ŭ ziamlu 15 zakarkavanych staradaŭnich butelek, piša «AiF».
Jany mieli nietypovuju dla sučasnych formu i rasfarboŭku.
Akuratna vyciahnuŭšy butelki ź ziamli, budaŭniki ŭbačyli, što prama na vačach tyja stali mianiać svaju rasfarboŭku ź siniavata-čornych da karyčnieva-zialonych z załacistym adlivam. A voś što znachodziłasia ŭnutry, zastavałasia intryhaj, bo jomistaści byli ščylna zakarkavany.
Kiraŭnictva abjekta źviarnułasia pa dapamohu da śpiecyjalistaŭ, zdolnych dać adkazy na pytańni, jakija ŭźnikli. A mienavita va ŭpraŭleńnie Dziaržaŭnaha kamiteta sudovych ekśpiertyz pa Hrodzienskaj vobłaści.
U Hrodnie na ich rachunku daśledavańnie adnaho z samych staražytnych u śviecie śladoŭ palcaŭ ruk, znojdzienym na plinfie Kałožskaj carkvy i inšyja znakavyja dakranańni da historyi. U tym ža jabłynievym sadzie Śviacka jany zdabyvali i daśledavali kaścianyja astanki i rečy čyrvonaarmiejcaŭ, jakija zahinuli ŭ samym pačatku hitleraŭskaha ŭvarvańnia.
— Z zadačaj padobnaha rodu sutyknulisia ŭpieršyniu, — raspavioŭ namieśnik načalnika abłasnoha ekśpiertnaha viedamstva Źmicier Hrynievič. — Spatrebiŭsia kompleksny padychod, viedy i navyki roznych śpiecyjalistaŭ, jakija padyšli da spravy nie tolki z usioj adkaznaściu, ale i dušoj. Śviackija znachodki sapraŭdy ŭnikalnyja.
Butelki vyjavilisia anałahičnymi tym, jakija vypuskalisia ŭ Anhlii z 17 stahodździa. Forma ŭ ich niapravilnaja, a heta značyć, što jany vyrablalisia ŭručnuju škłovydzimalščykami. Ab hetym ža havoryć i adsutnaść na ich markirovak. Raniej vinaroby paprostu lapili na butelki etykietki, uručnuju zapisvajučy na ich, što zalita. Škłatara tady nie mieła asablivaha značeńnia, tamu na znojdzienych u Śviacku butelkach niama nivodnaha klajma.
U nižniaj častcy znojdzienych u ziemlanoj padłozie butelek majucca pahłybleńni, nazvanyja «puntam». Jon rabiŭsia dla spraščeńnia transparciroŭki butelek u haryzantalnym stanoviščy. Najaŭnaść punta dazvalała rylca adnoj butelki ŭpirać u dno druhoj i nadziejna fiksavać. Akramia taho, jon słužyŭ miescam zboru asadku pry zachoŭvańni vina.
Zrabiŭšy saskreby rečyva z pavierchni butelek, vyśvietlili što pakryćcio składajecca z dyjaksidu kremniju. Heta asnoŭny kampanient kvarcavaha piasku, jaki moh utvarycca pry znachodžańni butelek u vilhotnaj abo kisłaj hlebie.
Zakarkavany butelki korkami, a pravilniej skazać — zality voskam. Da takoj vysnovy pryjšli padčas chimičnaha daśledavańnia. Vosk hiermietyčna abaraniaje vadkaść, jakaja źmiaščajecca ŭ butelcy, ad ahresiŭnaha ŭździejańnia navakolnaha asiarodździa, što dazvalaje zachoŭvać źmieściva pasudziny na praciahu stahodździaŭ.
Nu a zaraz samaje cikava nakont źmieściva butelek. Naturalna, naprošvajecca vysnova ab tym, što ŭsiaredzinie znachodzicca vino, i heta sapraŭdy tak. Praŭda, — nie zusim vino, a toje, što ad jaho zastałosia. Unutry znachodzicca 650 mł napaŭprazrystaj vadkaści karyčnievaha koleru z vyjaŭlenym pacham vocatnaj kisłaty — praduktu zakisańnia, a taksama akiśleńnia etyłavaha śpirtu. Niahledziačy na daŭnaść, zachavalisia notki aramataŭtvaralnych złučeńniaŭ, charakternyja dla vinahradnaha vina.
Na siońnia ŭtrymańnie etyłavaha śpirtu ŭ im składaje 1,5% ab. Akramia taho, vyjavili rečyvy, jakija ŭtvarajucca pry kantakcie ałkaholnaha napoju z draŭninaj. Heta značyć, pieršapačatkova jano vyrablałasia ci zachoŭvałasia ŭ draŭlanych jomistaściach.
Utrymańnie vocatnaj kisłaty ŭ nievialikich kolkaściach u «maładym» vinie zjaŭlajecca normaj, adnak ź ciaham času vocatnyja bakteryi pačynajuć aktyŭna razmnažacca i kolkaść kisłaty, a taksama jaje efiraŭ u napoi prykmietna pavialičvajecca. Adbyvajecca tak zvanaje skisańnie vina, tamu staryja viny nabyvajuć charakterny vocatny pach i smak, jak u našym vypadku.
Cikava, što razam z taraj u tyja dalokija stahodździ jašče i jakaść samaha vina nie asabliva kłapaciła spažyŭcoŭ. Ludzi prosta pili jaho ŭ vialikaj kolkaści. Mienavita tady i naradziŭsia vyraz: «Čałaviek troch butelek». Ličyłasia, kali, nie ŭstajučy z-za stała, čałaviek zdolny vypić try butelki vina, heta sapraŭdny mužčyna.
Nu a siońnia znojdzieny ŭ Śviacku napoj choć i zjaŭlajecca zvyšvytrymanym, da ŭžyvańnia nie prydatny. Vyznačyć jaho dakładny ŭzrost faktyčna niemahčyma. Tak, isnujuć miehasučasnyja mietady, jakija dazvalajuć raźličyć uzrost uzoru, ale daŭnaść vyznačajecca nie ŭ hadach, a praktyčna ŭ stahodździach. Tak što ŭ našym vypadku heta nie stolki doraha, kolki niemetazhodna. Ale, kali adšturchoŭvacca ad supastaŭleńnia ŭsioj sukupnaści viadomych i ŭstalavanych danych, vychodzić, što vinu kala dvuchsot hadoŭ.
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary