Da pieradvybarčaj kampanii Bajdena padklučycca eks-dziaržsakratar ZŠA
Džon Kery abviaściŭ pra heta svaim supracoŭnikam u subotu.
80-hadovy były dziaržsakratar Džon Kery chutka sydzie z pasady śpiecpasłańnika ZŠA pa klimacie i padklučycca da pieradvybarnaj kampanii paplečnika pa Demakratyčnaj partyi, 81-hadovaha prezidenta Džo Bajdena, piša Bi-bi-si.
Kery abviaściŭ pra heta svaim supracoŭnikam u subotu. Jon prasłužyŭ śpiecpradstaŭnikom pa klimacie try hady.
Prezidenckija vybary ŭ ZŠA projduć u listapadzie hetaha hoda.
U 2004 hodzie sienatar Kery prajhraŭ prezidenckija vybary Džordžu Bušu, jaki tady pieraabraŭsia na druhi termin, apiaredziŭšy Kery ŭsiaho na 2,4% hałasoŭ.
Paźniej, u 2013-2017 hh, jon byŭ dziaržsakratarom pry prezidencie Baraku Abamie.
Prablemaj źmieny klimatu jon pačaŭ zajmacca jašče tady: pry im, u 2015 hodzie, było padpisana Paryžskaje pahadnieńnie, u jakim amal usie krainy śvietu ŭpieršyniu abaviazalisia sumiesna skaračać vykidy parnikovych hazaŭ.
Na ciapierašniaj pasadzie Kery, u pryvatnaści, udzielničaŭ u padrychtoŭcy i praviadzieńni niadaŭniaha klimatyčnaha samitu COP28 u Dubai, na jakim krainy śvietu damovilisia ab stratehii pastupovaj admovy ad vykapniovaha paliva.
Džon Kery, niahledziačy na sprečki pamiž Vašynhtonam i Piekinam, całkam paśpiachova supracoŭničaŭ z kitajskim kaleham Sie Čžeńchua. ZŠA i Kitaj — najbujniejšyja ŭ śviecie emitenty parnikovych hazaŭ.
«Klimatyčny kryzis — heta pahroza dla ŭsiaho čałaviectva, i my ŭsie pavinny dziejničać jak maha bolš imkliva», — skazaŭ Kery, vystupajučy letaś u Piekinie.
Administracyja Džo Bajdena abiacaje, što da 2030 hoda ZŠA skarociać vykidy da pałovy ad uzroŭniu 2005 hoda. Dva hady tamu Bajden pravioŭ praz Kanhres zakon ab asihnavańniach na raźvićcio «zialonaj» enerhietyki sumaj 369 młrd dalaraŭ.
«Ciabie b baćka praklaŭ»: maci fihuranta «małočnaj spravy» prabiłasia na spatkańnie ź im, kab ślozna paprasić nie supracoŭničać sa śledstvam3
Kamientary