«Рэшткі збіраем з усіх складоў». Уладальнікі сэканд-хэндаў — пра наступствы санкцый ЕС
1 кастрычніка ўступіў у сілу новы пакет санкцый ЕС, які забараняе ўвозіць тавары сэканд-хэнд у Беларусь з Еўропы. Як гэта паўплывала на працу сэкандаў, BAR24 распавялі іх працаўнікі і ўладальнікі.
Пра тое, што Еўрасаюз прыняў у дачыненні да Беларусі новы пакет санкцый, які забараняе з 1 кастрычніка ўвозіць у нашу краіну адзенне сэканд-хэнд з Еўропы, стала вядома гэтым летам.
Аднак пра тое, як гэта мае адбіцца на працы беларускіх сэкандаў, нават напярэдадні дзеяння санкцый не маглі сказаць ні прадаўцы, ні ўладальнікі бізнэсу ў Беларусі.
З пачатку дзеянняў санкцый прайшоў амаль месяц. Насуперак асцярогам пакупнікоў, масавага закрыцця магазінаў сэканд-хэнд у Беларусі не адбылося. Але як яны працуюць у новых умовах?
Змянілі лагістыку
На першы погляд у баранавіцкіх сэкандах нічога не змянілася. Наведвальнікаў у пасляабедзенны час было нямала. Ды і скарачэнні асартыменту адзення на прылаўках не заўважна.
— Рэчаў, як бачыце, дастаткова. І ўсім хопіць, — кажа прадавец крамы адной з буйных сетак сэканд-хэнд. — Што тычыцца абароту рэчаў, як яны дастаўляюцца, гэта пытайцеся ў начальства. Наша задача — выкласці тавар, а не цікавіцца гэтымі справамі.
Між тым, паводле слоў прадаўцоў іншых магазінаў, некаторыя змяненні ў рабоце яны ўсё ж заўважылі.
— Пасля 1 кастрычніка некаторыя змены ў краме ў нас адбыліся. Пастаўляюць тавары зараз праз краіны СНД, напрыклад, праз Казахстан. У сувязі з гэтым цэны паднялі. І, гавораць, будуць падымаць і далей. Але асартымент ёсць, — распавяла прадавец іншага сэканд-хэнда.
Няпросты час
Уладальнікі ж баранавіцкіх «сэкандаў» у размове з BAR24 адзначылі, што іх бізнэс зараз перажывае няпростыя часы. Некаторыя адзначаюць, што новыя тавары для магазінаў ім літаральна даводзіцца вышукваць.
— Цяпер няпросты час для прадпрымальнікаў, якія працуюць з сэканд-хенд. Рэшткі рэчаў збіраем з усіх складоў, — пажалілася адна з уладальніц.
Іншыя адзначаюць, што, хаця пастаўкі тавараў наладзіць атрымалася, цэны на іх выраслі.
— Пастаўшчыкі паднялі цэны на тавар з-за зменаў лагістыкі. Раней сама ездзіла ў Польшчу, Літву і ўсё закупляла. Цяпер з Мінска ўсё збіраю. Вырабы ў мяне якасныя, без плям і дзірак. Я проста не магу прадаваць за капейкі сабе ў страту, — распавяла ўладальніца адной з найстарэйшых крамаў сэканд-хэнд у Баранавічах.
Павелічэнне закупачных цэн тавараў, па словах уладальнікаў, паўплывала на попыт.
— Пасля 20-х чысел верасня стаў прыкметны спад кліентаў. У кастрычніку сітуацыя пагоршылася яшчэ больш. Сорамна прызнацца, мы сёння ніводнай рэчы не прадалі! — адзначыла гаспадыня сэканда.
«Будзем змагацца»
Нягледзячы на цяжкасці, уладальнікі магазінаў сэканд-хэнд у Баранавічах настроены рашуча.
— Я ў гэтым бізнэсе з 1996 года. Самая першая кропка сэкандаў у горадзе была мая. Закрывацца пакуль не планую: будзем трымацца. Паглядзім, як яно будзе далей, — падзялілася ўладальніца адной з крам.
Па словах прадпрымальнікаў, цяжкасці ў іх бізнэсе бывалі і раней. Таму пакуль яны маюць намер трымацца. Так доўга, як гэта дазволяць абставіны.
— Санкцый гэтых, шчыра кажучы, я не баюся. Бо заўсёды бывалі рознага кшталту цяжкасці. Пакуль не бачу прычын закрываць краму. Вось калі раптам зусім не будзе тавару і пакупнікоў, тады і закрыемся, — рэзюмавала гаспадыня сэканд-хэнда ў цэнтры горада.
Каментары