«Гэта кардынальна мяняе ўвесь расклад у вядзенні баявых дзеянняў». Што Z-блогеры думаюць пра ўдары ATACMS па Расіі?
Z-блогеры панікуюць з нагоды магчымасці выкарыстання Украінай дальнабойных ракет.
Навіна аб дазволе з боку саюзнікаў Украіне выкарыстоўваць ракету вялікай дальнасці выклікала бурную рэакцыю сярод Z-блогераў.
«РСЗА HIMARS з яе штатнымі боепрыпасамі не адносяцца да аператыўна-тактычнага ўзбраення. Яна здольная трапляць у цэлі на тактычнай адлегласці, гэта значыць, у франтавой і прыфрантавой зоне.
Усё мяняецца, калі ўстаноўка M142 HIMARS зараджаецца балістычнымі ракетамі ATACMS. У гэтым варыянце яна становіцца АТРК — аператыўна-тактычным ракетным комплексам, які здольны наносіць паражэнне па глыбокім тыле. А гэта ўжо не проста абстрэл прымежнай вёскі ў Белгарадскай вобласці.
Гэта кардынальна мяняе ўвесь расклад у вядзенні баявых дзеянняў. Гэта адразу азначае, што пад пагрозай будуць знаходзіцца стратэгічныя аб'екты, напрыклад такія як атамныя станцыі, металургічныя прадпрыемствы і іншыя важныя аб'екты, якія ўплываюць як на эканоміку Расіі, так і на ваенна-прамысловы комплекс краіны. Адчуваеце розніцу?», — тлумачыць канал ZАПИСКИ VЕТЕРАНА і заклікае:
«Удары ўглыб тэрыторыі Расіі аператыўна-тактычнымі комплексамі — гэта пераход вайны на зусім новы ўзровень. Гэта сур'ёзнае павышэнне ставак. Адказ з нашага боку павінен быць суразмераны пагрозам. Аж да прымянення тактычнай ядзернай зброі».
Блогер Рыбарь удакладняе, што самым небяспечным пры выкарыстанні АТР ATACMS з'яўляецца хуткасць іх палёту:
«На адлегласць 120 км АТР даляціць за 1 хвіліну 20 секунд, а на максімальную [адлегласць] 300 км — за 3 хвіліны 20 секунд».
Рыбарь прагназуе, што УСУ пры нанясенні ўдараў не абмяжуецца Курскай вобласцю. Пад атаку можа патрапіць «любы аб'ект у любым рэгіёне». Галоўнымі сярод іх з'яўляюцца аэрадромы тактычнай і армейскай авіяцыі.
Ударым па амерыканскіх спадарожніках
«У выпадку рэальнага ажыццяўлення ўдару УСУ амерыканскімі ракетамі ATACMS па расійскай тэрыторыі немінуча адбудзецца імклівае спаўзанне да крызіснай сітуацыі, аналагічнай той, якая склалася паміж СССР і ЗША ў 1962 годзе, і якая атрымала назву «Карыбскага крызісу», — прагназуе Рамзай і прапануе ў якасці максімальна эфектыўнага і дэманстратыўнага адказу ўдарыць па амерыканскай спадарожнікавай групоўцы над Расіяй.
«Удар па спадарожніках будзе лагічны і апраўданы, бо менавіта спадарожнікі ЗША будуць забяспечваць нанясенне ракетнага ўдару ATACAMSамі або «Шторм Шэдаў» і «Скальпамі». Пры гэтым неяк прыкрыць ці абараніць свае спадарожнікі амерыканцы не змогуць. Да таго ж знішчэнне некалькіх ключавых спадарожнікаў разведкі і сувязі рэзка знізіць баявыя магчымасці амерыканцаў.
Зноў жа, такі ўдар дэманстратыўна ігнаруе ўсе папярэджанні амерыканцаў аб тым, што напад на іх спадарожнікі прыраўноўваецца да нападу на ЗША. І ў гэтым выпадку ўжо амерыканцы аказваюцца перад выбарам далейшай эскалацыі канфлікту ці выхаду на перамовы», — тлумачыць блогер.
Калі Масква застанецца без святла, то ўдарым па атамных станцыях
Блогер Fighterbomber прапаноўвае прапануе паглядзець на тое, наколькі паспяхова ўкраінскі бок будзе выкарыстоўваць дазвол і якія цэлі будзе атакаваць. У залежнасці ад гэтага і адказваць.
«Думаю, зразумела, што калі нам разваляць нейкі чарговы НПЗ, ці мост, ці дзясятак такіх, то ў нашай тактыцы і выбары цэляў нічога не зменіцца.
А вось калі Масква застанецца на дзень-два без святла, то, думаю, наступны ўдар будзе ўжо не па падстанцыях, а па саміх станцыях, у тым ліку атамных.
Калі Масква без святла пасядзіць больш за пару дзянькоў, то варта чакаць спачатку папераджальных стрэлаў ядрэнбатонамі, а потым ужо стрэлкі гадзіннікаў ядзернага апакаліпсісу ўстануць на нулі».
Праўда, блогер дапускае, што жорсткае рашэнне Расія будзе адцягваць да моманту ўступлення на пасаду Трампа, на якога ўскладае надзею, што «ён там нешта парашае».
Блогер упэўнены, што аб'ектамі атак з боку УСУ стануць аэрадромы і аператыўныя пляцоўкі.
«Не ўся авіяцыя ў нас выведзена за радыус паражэння ракетамі, і ўсю яе вывесці немагчыма. (…) Ракеты даляцяць хутчэй за тое, як самалёты або верталёты ўзляцяць» — заўважае Fighterbomber і прапаноўвае:
«Што тут можна зрабіць? Рухацца. Рух — жыццё. Змяняць аэрадромы і стаянкі, жыць у самалётах. Жорстка адказваць нягледзячы ні на што. На вайне як на вайне. Пакуль што іншых варыянтаў я не бачу».
Лукашэнка хоча, каб кіраўнікі райвыканкамаў прызначалі і дырэктараў прыватных структур16
Каментары