U Danii znajšli załaty piarścionak, jakomu paŭtary tysiačy hadoŭ
Pryblizna 1500-hadovy załaty piarścionak epochi karaloŭ z dynastyi Mieravinhaŭ, jaki adnosicca da raniej nieviadomaha kniastva, znojdziena ŭ Danii, paviedamlaje vydańnie Arkeonews. Ašałamlalnaje adkryćcio zrabiŭ mietałašukalnik-amatar Łars Nilsen u nievialikaj viosačcy niepadalok ad paŭdniova-zachodniaj miažy Danii z Hiermanijaj.
Adznačajecca, što znachodka była zroblena jašče ŭ 2020 hodzie, ale da niadaŭniaha času hety fakt trymali ŭ tajamnicy, kab śpiecyjalisty mahli bieśpieraškodna pravieści kompleksnaje daśledavańnie.
Piarścionak, zrobleny z zołata z 22-karatnym kamieniem, upryhožany avalnym kabašonam — almandynavym hranatam, kaštoŭnym čyrvonym napaŭkaštoŭnym kamieniem, jaki simvalizavaŭ u hiermanskich narodaŭ uładu.
Znachodka datujecca 500-600 hadami našaj ery.
Aryjentujučysia na kanstrukcyju piarścionka, historyki miarkujuć, što juvielirny vyrab byŭ źviazany ź Mieravinhami — karaleŭskaj dynastyjaj, jakaja kiravała frankami. Dyzajn załatoha piarścionka z čatyrma śpiralami na nižnim baku i vystupami-tryliśnikami na miescy złučeńnia piarścionka ź biezielem demanstruje najvyšejšuju jakaść frankskaha majsterstva, što śviedčyć pra elitnaść jaho ŭładalnika.
Ekśpierty Nacyjanalnaha muzieja Danii ličać, što hetaja znachodka śviedčyć pra isnavańnie kniastva na paŭdniovym zachadzie Jutłandyi, jakoje było źviazana z Frankskaj dziaržavaj. Impieryja frankaŭ u toj čas achoplivała značnuju častku sučasnaj Jeŭropy, uklučajučy bolšuju častku Bielhii, Francyi i Hiermanii.
«Miarkuju, Makiej by ŭchvaliŭ». Aŭtar pomnika kiraŭniku MZS raskazaŭ, jakija sensy ŭkłaŭ u jaho5
Kamientary