Ajcišnik paśla 3+ hadoŭ u EPAM staŭ aficyjantam. Pracu ŭ IT tak i nie znajšoŭ

«Staŭ adhukacca na ŭsio»

Mikita — sistemny analityk, prapracavaŭ u EPAM 3+ hady. Taksama ŭ jaho jość dośvied pracy ŭ aŭdycie — 2,5 hady. U siaredzinie lipienia Mikita straciŭ pracu — z ajcišnikam nie praciahnuli kantrakt.

Małady čałaviek šukaŭ pracu ŭ śfiery Data/BI-analizu na praciahu 2,5 miesiacaŭ — u Hruzii (u 2022 jany z žonkaj pierajechali ŭ Batumi — kampanija dapamahła) i dystancyjna. Ale pakul niaŭdała.

Statystyka pošuku pracy ŭ Mikity takaja: 128 vodhukaŭ, 82 kampanii, 40% admovaŭ na roznych stadyjach — adrazu paśla padačy, paśla sumoŭja/testavaha zadańnia, 16 sumoŭjaŭ (tut i skryninh, i techničnyja sumoŭi i sełfi-intervju, kali kandydat adkazvaje na pytańni na kamieru praź śpiecyjalnuju płatformu).

Mikita kaža, što praca ŭ niekatorych kampanijach dla jaho niedastupnaja z-za niaviedańnia hruzinskaj — ale «chapaje kampanij, dzie hruzinskuju nieabaviazkova viedać, a taksama kampanij, jakija najmajuć pa B2B-damovie».

Z-za čaho jašče admaŭlajuć: časam Mikitu nie chapaje «dośviedu praviadzieńnia kankretnych pracedur, krytyčnych dla pracadaŭcy (A/B-testy, naprykład). 

— A časam nie chapaje chardaŭ: naprykład, treba bolš dośviedu ŭ peŭnym prahramavańni, dośviedu pracy z kankretnaj bi-sistemaj i h.d.). Tamu paśla mientarynh-prahramy ŭ EPAM ja vučyŭsia jašče i davučvajusia ciapier, — kaža surazmoŭca.

Pošuk pracy ŭ Mikity pryjšoŭsia na leta i vynikaŭ nie daŭ, choć u niejki momant jon «staŭ adhukacca na ŭsie, navat tyja vakansii, jakija tyčacca mianie tolki ŭskosna». I voś praz 2,5 miesiaca ajcišnik staŭ padpracoŭvać aficyjantam u bary — bałazie, jość vopyt u hetaj śfiery».

«Za źmienu atrymlivaju 60 łary (prykładna 20 jeŭra) + čajavyja, jakija dzielacca na ŭvieś piersanał»

— Pracu znajšoŭ praź miascovyja telehram-kanały: napisaŭ u paru ŭstanoŭ, schadziŭ na paračku sumoŭjaŭ, prajšoŭ stažyrovačnuju źmienu — i ciapier pracuju.

Praca niaprostaja: ty ŭvieś čas na nahach — i na praciahu źmieny, byvaje, nie prysiadzieš ni razu i nie pajasi, kali ludziej šmat. 

Zvyčajna ŭ aficyjantaŭ źmienny hrafik pracy, źmieny pa zmaŭčańni doŭžacca pa 12 hadzin, ale ŭ maim vypadku źmiena doŭžycca plus-minus 9 hadzin. Za źmienu ja atrymlivaju 60 łary (prykładna 20 jeŭra) + čajavyja, jakija dzielacca na ŭvieś piersanał kuchni i zały.

U EPAM ja atrymlivaŭ 750 dalaraŭ «brudnymi» — i heta było bolš, čym ciapier.

U čym plusy pracy aficyjantam:

— heta lepš, čym naohuł nie pracavać;

— paśla 2,5 miesiaca bieśpierapynnych pošukaŭ, sumoŭjaŭ, paralelnaha «danavučańnia» hetaja praca daje novyja ŭražańni i niejkuju mahčymaść adciahnucca ad nazapašanaha stresu i prablem;

— ja chutka zmoh uvajści ŭ kurs spravy (nohi i hałava «pamiatajuć», moj ahulny staž pracy ŭ hramadskim charčavańni ŭ studenckija hady i zatym paśla vojska — 5 hadoŭ).

A minusy takija:

— nienarmavanaja nahruzka — ty možaš jak prasiedzieć paŭdnia ŭ čakańni haściej, tak i biehać ceły dzień biez mahčymaści pajeści abo navat prosta prysieści adpačyć;

— uzrovień dachodu značna prasieŭ, bo ja zaraz pracuju ŭ maleńkim bary i čajavyja tam čysta simvaličnyja (nu i zrazumieła, što aficyjant u zvyčajnym razumieńni — čaściakom małakvalifikavany śpiecyjalist;

— usio heta moža bić pa samaacency, ale z hetym ja pakul spraŭlajusia

«Uklučyŭ režym ekanomii — admoviŭsia ad spartovaj siekcyi, skaraciŭ kišennyja vydatki»

— Ci jość u mianie płan, kali pošuk novaj pracy zaciahniecca, — na žal, pa mnie, jon užo zaciahnuŭsia, tamu ja i znajšoŭ časovuju padpracoŭku. Jak alternatyvu mahu razhledzieć vakansii barysta, barmena i navat kliniera. Byli dumki pajści sartavalnikam morapraduktaŭ — ale heta ŭsio vyklučna jak časovaja zaniataść. 

Hruzinskuju movu za čas žyćcia ŭ Hruzii ja, na žal, nie vyvučyŭ. Ale kankretna ŭ Batumi z hetym niama vialikich prablem, kab uładkavacca na pracu. Ciapier ja pracuju ŭ emihranckim bary. 

Spytali ŭ Mikity, kolki štomiesiac jany z žonkaj traciać, žyvučy ŭ Batumi. 

— My arandujem kvateru z adnoj asobnaj spalniaj za $450 (prykładna 50 kv.mietraŭ, moža trochi bolš). Kamunałka — śviatło, vada, haz, internet, pasłuhi pa achovie i ŭborcy doma — u miesiac vychodzić prykładna 120 łary (kala 40 jeŭra). 

Charčavańnie ŭ miesiac na dvaich: kala 1000—1250 łary (prykładna 333-417 jeŭra) u zaležnaści ad kolkaści tydniaŭ u miesiacy. Apłacić telefon — 44,5 łary (heta kala 15 jeŭra), ale heta tolki moj raschod, jaki taryf u žonki, ja nie viedaju. Jašče ŭ nas jość miedstrachoŭka — heta 142 łary ŭ miesiac na dvaich (kala 47 jeŭra).

Časam Mikita siłkujecca na pracy. Ale «kali vialikaja nahruzka na praciahu dnia, to kuchary nie paśpiavajuć pryhatavać abied». 

— Adzin raz ja abiedaŭ a 20:00 viečara, adzin raz jeŭ užo pierad samym zakryćciom. Inšy raz ty prosta idzieš u bułačnuju abo kramu pa susiedstvie.

Mikita kaža, što apošnim časam jon uklučyŭ režym ekanomii — admoviŭsia ad naviedvańnia spartovaj siekcyi i skaraciŭ kišennyja vydatki.

Daktaroŭ ciapier naviedvaje tolki ŭ vypadku krajniaj nieabchodnaści («heta značyć umoŭnaje vydaleńnie zuboŭ mudraści pieranosicca na niavyznačany termin i da taho padobnaje»).

Nu i takaja opcyja, jak adpačynak, a taksama padarožža pakul Mikitu nie dastupnyja — pryčym nie tolki za miežami Hruzii, ale i ŭnutry krainy.

• 0
• 0
• 6
• 0
• 0
• 8
• 1
• 0