Як ураджэнка Пінска стала мільянеркай за мяжой і прадае вясельныя сукенкі за тысячы даляраў
Калі праўнучка заснавальніка сеткі знакамітых гатэляў Hilton і свецкая львіца Пэрыс Хілтан выходзіла замуж за бізнэсмена Картэра Рэума, яна змяніла шэсць вясельных сукенак ад чатырох дызайнераў. У іх ліку была сукенка ад Galia Lahav — сусветна вядомай ізраільскай дызайнеркі з пінскімі каранямі. Яе гісторыю расказвае «Медыя-Палессе».
Галя нарадзілася ў Пінску ў 1952 годзе. Яе маці была бухгалтаркай, але вельмі любіла шыць і прышчапіла гэтую любоў дачцэ. Калі дзяўчынцы было пяць, яе сям'я пераехала з Беларусі ў Ізраіль і пасялілася на поўдні краіны, у горадзе Ашкелон. Пасля школы Галя скончыла каледж тэкстыльных тэхналогій, моды і дызайну і стала настаўніцай дэкаратыўна-прыкладнога мастацтва.
Неўзабаве яна выйшла замуж за сваю школьную любоў, Натана Лахаў. А ў 32 гады, калі падраслі іх дзеці (сын Ідан і дачка Оснат), Галя зрабіла першы крок да ажыццяўлення сваёй мары аб модным брэндзе. Яна пакінула працу выкладчыцы, адкрыла ў Ашдодзе невялікае атэлье і стала рабіць на заказ карункавыя аплікацыі, шыць спачатку вячэрнія, а затым і вясельныя сукенкі.
У 2016 годзе Galia Lahav стаў першым ізраільскім домам моды, які выступаў на Тыдні моды ў Парыжы. А праз год — першым ізраільскім брэндам, прынятым у знакаміты сіндыкат высокай моды ў Парыжы.
Сёння модны дом Galia Lahav размяшчаецца ў чатырохпавярховым будынку на галоўнай гандлёвай вуліцы Тэль-Авіва, а вясельныя сукенкі гэтага брэнда прадаюцца ў 40 краінах у 70 уласных буціках і іншых крамах прэміум-класу. Дзеці Галі ўліліся ў сямейны бізнэс — Ідан Лахаў стаў генеральным дырэктарам моднага дома Galia Lahav.
У сукенках ад Галі Лахаў выходзілі замуж такія знакамітасці, як Брытні Спірс, Алівія Ман. Галандская тэлевядучая і мадэль Сільвія Мэйс выклала за сукенку ад самага вядомага ізраільскага брэнда 28 тысяч еўра.
Беёнсэ абрала сукенку Galia Lahav для цырымоніі абнаўлення клятваў праз 10 гадоў шлюбу з Jay-Z. А Прыянка Чопра — для прэм'еры фільма «Пагоня за шчасцем». У ліку прыхільніц таленту Галі Лахаў — Джэніфер Лопес, Серэна Уільямс, Крысціна Агілера і многія іншыя.
Дарэчы, цана ўрачыстых нарадаў ад Galia Lahav вагаецца ад 8 да 15 тысяч даляраў, але спецыяльны дызайн можа каштаваць і больш за 20 тысяч.
У Беларусі ўжо некалькі вечароў праблемы з інтэрнэтам. Расказваем, што адбываецца5
Каментары
бо вяселле - справа такая... у самых бедных дык гэта адно з нешматлікіх вялікіх святаў ва ўсім іх бедным жыцці, на якое яны гатовыя патраціць апошнія грошы...
выпускные
свадьбы
поминки
- такую рэкламу кафэ я бачу ў маршрутцы і з сумам думаю - у гэтых 3 словах усё чалавечае жыццё...