Малады экс-дырэктар Нацыянальнага гістарычнага музея Беларусі ўзначаліў мемарыял «Катынь» у Расіі
Былы дырэктар Нацыянальнага гістарычнага музея Беларусі Павел Сапоцька ўзначаліў расійскі мемарыяльны комплекс «Катынь». Беларускі культуролаг заступіў на новую пасаду 22 траўня, паведамілі ў комплексе.
Сапоцька вучыўся ў БДУКМ, дзе скончыў у тым ліку аспірантуру і працаваў выкладчыкам, а таксама ў Акадэміі кіравання. У 2018 годзе ў 26 гадоў культуролаг узначаліў Нацыянальны гістарычны музей.
Дырэктара лічылі пратэжэ міністра культуры Юрыя Бондара. У 2020 годзе ён пакінуў міністэрскае крэсла, а хутка і Сапоцька пайшоў з музея, узначаліўшы неўзабаве Нацыянальнае агенцтва па турызме.
Тады чыноўніка на старонках газеты адміністрацыі Лукашэнкі раскрытыкаваў прапагандыст Андрэй Мукавозчык — ён абвінаваціў Сапоцьку ў тым, што ў ягонай камандзе ў музеі працавала занадта шмат апазіцыянераў, ды і ў самога экс-дырэктара няма ніводнага запісу за 2020 год у сацсетках.
Нацагенцтва па турызме Сапоцька пакінуў у 2022 годзе, пасля ён працаваў дырэктарам культурна-дзелавога цэнтра «Белгазаўтасэрвісу».
Мемарыяльны комплекс «Катынь» быў адкрыты ў Катынскім лесе пад Смаленскам у 1998 годзе ў памяць пра польскіх афіцэраў, расстраляных у 1940 годзе супрацоўнікамі НКУС, а таксама пра ахвяраў палітычных рэпрэсій у СССР.
Апошнім часам расійскія палітыкі і праўладныя гісторыкі спрабуюць зноў перагледзець тэму катынскага расстрэлу і ўзяць за асноўную савецкую версію — згодна з ёй, польскіх афіцэраў, сярод якіх былі і беларусы, расстралялі нацысты.
Каментары