«Паспеў сказаць: Я беларус — а далей нас сталі збіваць». У Варшаве нацыяналісты збілі і абрабавалі беларуса і ўкраінца
У Варшаве нацыяналісты збілі беларуса і ўкраінца, якія размаўлялі па-руску ля пад'езда свайго дома. Беларуса шпіталізавалі са страсеннем мозгу і цяжкай траўмай вока, яму можа спатрэбіцца аперацыя, піша Most.io.
Таксама ў яго скралі банкаўскія карты і дакументы. Паліцыя ўжо распачала крымінальную справу і шукае нападнікаў. Пра здарэнне 38-гадовы беларус Аляксандр распавёў выданню Most.
Злачынства адбылося ў ноч на 4 жніўня па вуліцы Дантэ Аліг'еры на ўскраіне Варшавы. Там Аляксандр ужо год арандуе пакой. У тую ноч ён выйшаў пакурыць і, каб не перашкаджаць суседзям, трохі адышоў ад пад'езда.
— Да мяне падышоў знаёмы ўкраінец з суседняга пад'езда. Мы з ім так і пазнаёміліся, калі курылі. І з таго разу прыкладна раз на тыдзень бачыліся ў двары. У тую ноч мы ціха размаўлялі: песні не спявалі, не шумелі. Украінцу 20 гадоў, ён цяпер рыхтуецца да паступлення ва ўніверсітэт — мы звычайна гэта і абмяркоўваем, — распавядае беларус.
Размаўлялі мужчыны па-руску. У нейкі момант яны заўважылі, што да іх падыходзяць трое хлопцаў гадоў 20-25, яны былі апранутыя ў чорнае, коратка стрыжаныя. Побач з домам Аляксандра ёсць некалькі кругласутачных крам, мужчына мяркуе, што невядомыя ішлі менавіта з таго боку.
— Мы стаялі на вузкай сцежцы. Яны адышлі ад нас на метраў пяць-сем, замарудзіліся — напэўна, нешта абмеркавалі. І ўжо вяртаючыся да нас, пачалі крычаць матам па-польску: «З'** з Польшчы, украінцы. Што вы тут робіце? Вы тут не патрэбныя».
«На мяне наляцеў іх верхавод — я адразу ўпаў»
У 2019 годзе Аляксандр атрымаў польскае грамадзянства і стаў працаваць аспірантам і дакументазнаўцам у Інстытуце геаграфіі і прасторавага развіцця Польскай акадэміі навук. За ўвесь час жыцця ў Польшчы ў такія сітуацыі ён ні разу не трапляў.
Аляксандр стаяў бліжэй да незнаёмцаў, і на іх тыраду адказаў, што ён беларус з польскім грамадзянствам. Але «дыскусіі» (Аляксандр ужывае такое слова) не завязалася — невядомыя накінуліся спачатку на беларуса, а затым і на ўкраінца.
— На мяне наляцеў іх верхавод — я адразу ўпаў. Магчыма, у яго ў руцэ быў кастэт. Усё адбывалася імкліва: я атрымаў некалькі ўдараў у галаву, затым на мяне наляцеў другі.
Невядомыя білі і ўкраінца — удары былі настолькі моцнымі, што малады чалавек упаў на газон.
Аляксандр мяркуе, што падчас збіцця страціў прытомнасць — успомніць, як доўга гэта доўжылася, ён не можа.
— Хутчэй за ўсё, некалькі хвілін. Нас білі нагамі. Калі мы ачомаліся, былі ў неадэкватным стане — украінец дапамог мне падняцца.
Знік кашалёк, банкаўскія карты і дакументы
Мужчыны пайшлі ў бліжэйшую краму, каб папрасіць дапамогі. Убачыўшы, у якім стане яны знаходзяцца, прадаўшчыца тут жа выклікала паліцыю і хуткую.
— Я наогул не разумеў, што, дзе — усё ў тумане. Ужо калі прыехала паліцыя, аказалася, што я без акуляраў. У выніку іх знайшлі паламанымі, — распавядае Аляксандр.
На месцы, дзе збілі мужчын, паліцыя выявіла заплечнік Аляксандра — ён быў парваны, з яго зніклі кашалёк, банкаўскія карты і дакументы.
— Атрымліваецца, яны і напалі, і абрабавалі — можна кваліфікаваць як разбой, — мяркуе мужчына.
Тым не менш Аляксандр упэўнены: іх збілі польскія нацыяналісты.
— Гэта быў нацыяналістычны, ксенафобскі напад. Калі яны нас білі, сказалі: «Wszystko do du*y, sp*** dalaj» («усё роўна, валіце»). Я лічу, гэта было праявай нянавісці. Думаю, некаторыя людзі прымаюць рашэнні спінным мозгам і не здольныя да якога-небудзь «рацыё».
«Могуць быць праблемы з сятчаткай»
Мужчыну павезлі ў раённую бальніцу ў варшаўскім раёне Бяляны, там зрабілі тамаграфію. У беларуса дыягнаставалі пералом вачніцы і страсенне мозгу, яго накіравалі ў спецыялізаваную клініку. Ужо тыдзень Аляксандр знаходзіцца ў аддзяленні сківічнай-тварнай хірургіі. Мужчыну даюць абязбольвальныя прэпараты, антыбіётыкі і капаюць кроплі ў вока — некалькі дзён мужчына не мог адкрыць павека з-за моцнага ацёку.
— Дактары мяркуюць, што могуць быць праблемы з сятчаткай — у панядзелак будуць вырашаць, патрэбна аперацыя ці не, — дадае Аляксандр.
Аляксандр кажа, што для падачы заявы трэба было асабіста з'явіцца ў аддзяленне паліцыі, але праз свой стан ён не мог гэтага зрабіць. Таму беларус напісаў свайму ўчастковаму, а таксама ў гарадское аддзяленне паліцыі некалькі электронных лістоў з просьбай распачаць справу.
Траўмы ўкраінца аказаліся менш сур'ёзнымі — у дзень збіцця яго не шпіталізавалі. Аднак заяву ў паліцыю малады чалавек падаў.
— У выніку да мяне ў бальніцу прыехала следчая група, зрабілі здымкі. Справу завялі. Ніякіх прагнозаў паліцыя не дае, але добра, што хоць бы справа пачатая. Цяпер самае галоўнае, каб яе не паклалі ў доўгую скрынку. Я буду дамагацца праўды.
Каментары
А вось каб у такіх выпадках можна было сябе абараніць, а не правесці астатак жыцця вяртаючы зрок.