«Найбольш ім цікавы Полк Каліноўскага і Офіс Ціханоўскай». КДБ вярбуе актывістаў унутры Беларусі
«Наша Ніва» на аснове размоваў з людзьмі ў Беларусі высветліла вось што.
«Нашай Ніве» вядомыя прынамсі чатыры выпадкі, калі людзей, якія раней былі актывістамі недзяржаўных арганізацый ці якія да апошняга займаліся непалітычнай грамадскай дзейнасцю ў Беларусі, арыштоўвалі і садзілі на суткі ў Беларусі. І падчас адбыцця адміністратыўнага арышту іх шантажавалі аператыўнікі КДБ, ставячы перад выбарам: або вярбоўка, або надуманая крымінальная справа.
Што аб'ядноўвае ўсе чатыры выпадкі: адпрацоўваюцца ініцыятывы, якія зусім не звязаныя з палітыкай і ніколі не былі звязаныя з палітыкай: экалогія, адукацыйныя, студэнцкія і жаночыя ініцыятывы.
Падчас вярбовачнай размовы некаторым з людзей расказваюць, быццам бы недзяржаўныя арганізацыі ў Беларусі хочуць адрадзіць свае структуры да выбараў, каб «разгойдваць грамадства».
Дзяржбяспеку цікавіць, хто ўваходзіць у тую ці іншую ініцыятыву, як людзі камунікуюць з актывістамі, якія пераехалі за мяжу, як фінансуюцца арганізацыі, як даходзяць у краіну грошы.
Асабліва спецслужбістаў цікавіць Полк Каліноўскага і структуры, блізкія да Офіса Святланы Ціханоўскай.
Характэрна, што мэта размоваў, ці допытаў, як гэта ні называй, цяпер амаль заўсёды — вярбоўка.
У вядомых нам выпадках, нават калі чалавек не ведаў ці з нейкіх прычынаў не даваў інфармацыі, якая цікавіць КДБ, гэта не прыводзіла да крымінальнага пераследу. Мы не ведаем, ці ёсць выпадкі, калі праследавалі некага з тых, у каго не атрымалася супрацоўніцтва з КДБ ці хто адмовіўся падпісаць паперу пра супрацоўніцтва.
16 кастрычніка Праваабарончы цэнтр «Вясна» напісаў, што апошні месяц КДБ «выклікае на размовы» і затрымлівае людзей, якія маюць дачыненне да розных ініцыятыў і праектаў, што легальна працуюць у Беларусі. Як стала вядома праваабаронцам, гэта адбываецца ў розных кутках краіны і з праектамі рознай накіраванасці.
Адным з фактараў, што аб'ядноўвае ўсе гэтыя кейсы, з'яўляецца тое, што сілавікі хочуць схаваць рэпрэсіі ад грамадства — людзям пагражаюць, што калі інфармацыя пра пераслед трапіць да праваабаронцаў і СМІ, то ў дачыненні да іх будуць распачатыя крымінальныя справы.
Праваабаронцы маюць спіс арганізацый і праектаў, якія трапілі пад рэпрэсіі КДБ, але не публікуюць яго ў мэтах бяспекі.
«Наша Нiва» — бастыён беларушчыны
ПАДТРЫМАЦЬ
Каментары