Pražski strałok pakinuŭ pieradśmiarotnuju zapisku, u jakoj pryznaŭsia ŭ zabojstvie jašče dvuch čałaviek
David Kozak, jaki tydzień tamu zastreliŭ u Karłavym univiersitecie ŭ Prazie 14 čałaviek, u pieradśmiarotnaj zapiscy pryznaŭsia, što pierad hetym zabiŭ mužčynu i jahonuju dvuchmiesiačnuju dačku. Pra heta ŭ sieradu abjaviła palicyja Čechii, piša BBC.
24-hadovy David Kozak užo byŭ hałoŭnym padazravanym u padvojnym zabojstvie 15 śniežnia: paśla bojni va ŭniviersitecie 21 śniežnia češskaja presa paviedamlała, što palicyja praviała balistyčnuju ekśpiertyzu i ŭstanaviła, što ŭ abodvuch vypadkach stralali z adnoj i toj ža zbroi.
Kozak zabiŭ jašče i ŭłasnaha baćku, heta značyć, u sumie jon zastreliŭ 17 čałaviek.
Sam strełak nakłaŭ na siabie ruki, kali jaho zabłakavali va ŭniviersitecie palicyjanty.
15 śniežnia Kozak zastreliŭ u lesie Kłanovicy na ŭskrainie Prahi 32-hadovaha mužčynu i jaho dvuchmiesiačnuju dačku.
Paśla rasstrełu va ŭniviersitecie palicyjanty skazali, što ŭ śledstvie pa spravie ab zabojstvie 15 śniežnia ŭ ich było kala čatyroch tysiač patencyjnych padazravanych, i Kozak byŭ u śpisie, ale, na žal, dabracca da jaho i dapytać jany nie paśpieli.
Adnosna matyvaŭ Kozaka palicyja pakul ničoha aficyjna nie havoryć.
U minułuju subotu ŭ Čechii byŭ abjaŭleny dzień žałoby pa achviarach rasstrełu ŭ Karłavym univiersitecie. Akramia taho, ministr unutranych spraŭ Vit Rakušan zaklikaŭ meraŭ usich haradoŭ i viosak admianić navahodnija fiejervierki, a suhramadzian — adznačyć Novy hod biez šumnych śviat z pavahi da pamiaci zahinułych i pačućciaŭ ich rodnych.
Masavyja zabojstvy, učynienyja ŭ Jeŭropie ŭ XXI stahodździ strałkami-adzinočkami:
Narviehija, lipień 2011 hoda. Anders Brejvik zabiŭ 77 čałaviek: 69 jon zastreliŭ u letnim moładzievym łahiery na vostravie Uteja, vosiem zahinuli ad vybuchu zakładzienaj im u aŭtamabil bomby ŭ Osła.
Hiermanija, krasavik 2002 hoda. 19-hadovy Robiert Štajnchojzier zabiŭ 16 čałaviek — 13 nastaŭnikaŭ, dvuch vučniaŭ i palicejskaha — u himnazii ŭ Erfurcie, adkul jaho vyklučyli za niekalki miesiacaŭ da hetaha.
Hiermanija, sakavik 2009 hoda. 17-hadovy Cim Krečnier zastreliŭ 15 čałaviek: dzieviać vučniaŭ i traich nastaŭnikaŭ u svajoj byłoj škole ŭ horadzie Vinienden i troch minakoŭ u susiednim horadzie Viendlinhieh.
Šviejcaryja, vierasień 2001 hoda. Frydrych Łajbachier, uvajšoŭšy ŭ formie palicyjanta ŭ budynak rehijanalnaha parłamienta ŭ horadzie Cuh, zastreliŭ 14 čałaviek i paraniŭ jašče 10.
Sierbija, krasavik 2013 hoda. Lubiš Bahdanovič zastreliŭ 13 čałaviek, uklučajučy dvuchhadovaha chłopčyka, i paraniŭ svaju žonku ŭ vioscy pad Białhradam.
Što čakaje Biełaruś u bližejšyja piać hadoŭ? A Rasiju i Jeŭropu? Śpiecdakładčyk AAN pa Biełarusi daje svoj raskład3
Kamientary