Apazicyja sabrała tysiaču čałaviek na repietycyju Płoščy

19:21

Mitynh skončany, Daškievič i Sieviaryniec vykazali nadzieju pabačyć usich 19 śniežnia, u dzień prezidenckich vybaraŭ, na Płoščy. Usie razychodziacca.

19:18

Daškievič skanduje «Tolki — viera! Tolki — viera! Tolki -- viera!». Jon zaznačyŭ, što siońnia sabrałasia niekalki tysiač čałaviek, a 19-ha śniežnia na Płoščy źbiarucca niekalki dziesiatkaŭ tysiač.

Sieviaryniec zajaviŭ, što ciapier RTR viadzie pramuju trasnślacyju padziej ź Minska.

[U Biełarusi na biełaruskim anałahu kanała - RTR-Biełaruś pakazvajuć kino].

19:16

Vystupiŭ Vital Rymašeŭski. Jon skazaŭ, što jamu nie patrebna padtrymka Rasii i Zachadu, a jon spadziajecca tolki na padtrymku ludziej. Zaklikaŭ usich pryjści ŭ čaćvier, 25 listapada, a 18-j da Čyhunačnaha vakzała Minska na čarhovuju sustreču z vybarščykami.

19:08

La pomnika Leninu idzie impravizavany mitynh.

Mikoła Statkievič dziakuje ŭsim, chto pryjšoŭ na akcyju.

«Ja prymacuju vašyja patrabavańni da šyldaŭ Doma ŭrada».

Paprasiŭ ludziej zastacca na miescy, a sam pajšoŭ z žurnalistami i patrabavańniami prymacoŭvać ich da šyldy na bramie Doma Urada.

Vystupaje Rymašeŭski.

19:06

Rymašeŭskaha i Statkieviča, naturalna, nie puścili ŭ CVK — bo nikoha niama na rabočych miescach. Ludzi źbirajucca iści da Doma ŭrada, jon tut pobač.

Tym časam na BT vystupaje Sańnikaŭ. Čytaje pa papiercy. Pa-rusku.

19:02

Dajšli da bramy CVK, ad śpiecnazaŭcaŭ tut až čorna.

18:56

Hałava kałony dajšła da hatela «Minsk».

18:49

Dajšli da kinateatra «Centralny», napieradzie — Rymašeŭski, jaki razdaje intervju žurnalistam, Statkievič i Daškievič. Niaklajeŭ syšoŭ.

18:44

Dajšli da budynka KDB, DAI achoŭvaje paradak na praśpiekcie, spyniajučy mašyny.

Supracoŭniki śpiecsłužbaŭ aktyŭna abmiarkoŭvajuć, dzie pierakryvać ruch kałony.

U šeści biare ŭdzieł kala tysiačy čałaviek.

Nieviadomyja žorstka źbili namieśnika staršyni Partyi BNF Ihara Lalkova, paviedamlaje radyjo «Svaboda».

18:35

Kałona prajšła HUM. Rymašeŭski dumaŭ pravieści kałonu pa viersie, ale DAI skazała, što prachodzić varta padziemnym pierachodam, abiacaŭšy «zialonaje śviatło» na chodnikach.

18:31

Ludzi iduć u bok Centrvybarkama pieradać rezalucyju z patrabavańniem dapuścić pradstaŭnikoŭ apazicyi va ŭčastkovyja kamisii, admianić daterminovaje hałasavańnie i zabiaśpiečyć prazrysty padlik hałasoŭ.

Napieradzie niasuć raściažku «Saša, sychodź».

Rymašeŭski ŭ hutarcy z karespandentam NN zaznačyŭ, što nie baicca sankcyj z boku CVK.

Hałoŭnaje, kab nie ŭžyli takija sankcyi, jak da Hančara, Zacharanki i Zavadskaha [jakija źnikli bieź viestak], a astatniaje — łuchta, kaža V. Rymašeŭski.

18:25

Vystupaje Sieviaryniec, jon zachaplajecca kolkaściu ludziej, što pryjšli na Płošču, kaža, što 19 śniežnia — u dzień vybaraŭ — hetuju płošču treba zapoŭnić całkam, pytajecca ŭ prysutnych: «Ci zadavolenyja vym stanoviščam u krainie?». Usie družna adkazvajuć:«Nie!».

18:20

Vystupiŭ Vital Rymašeŭski, jaki zaznačyŭ, što pryjšoŭ čas nie čakać lidaraŭ, a samim stanavicca lidarami i brać situacyju ŭ svaje ruki, taksama zaklikaŭ hałasavać na vybarach za BCHD (to bok za siabie),

Uładzimir Niaklajeŭ zaznačyŭ, što pryjšoŭ siońnia na Płošču nie ahitavać, a tamu, što tut sabralisia ludzi, jakija vierać u jaho, jakija stavili za jaho svoj podpis, padtrymlivajuć jaho. Pračytaŭ vierš:«Ja pryjšoŭ, kab Vy pieramahli».

18:10

Vystupiŭ Źmicier Daškievič, jon zaznačyŭ, što siońnia — 14-ja ŭhodki haniebnaha antykanstytucyjnaha refierendumu, za vyniki jakoha piersanalna adkazny Łukašenka.

«I pryjdzie čas, i rana ci pozna Łukašenka adkaža za heta», — skazaŭ Daškievič. Jon taksama «vynies apošniaje kitajskaje papiaredžańnie ARŁ.

Ludziej usio boleje, pryjšoŭ Uładzimir Niaklajeŭ.

Prykmietna paboleła ściahoŭ, źjavilisia taksama ściahi «Maładoj Biełarusi».

18:07

Na prystupkach Pałaca prafsajuzaŭ vystupaje Vital Rymašeŭski. Jaho, darečy, padtrymaŭ były palitviazień i biźniesoviec Aleh Klimaŭ, jaki nazvaŭ vystup Vitala pa TV u paniadziełak vielmi prystojnym.

Zaraz na Płoščy kala 400 čałaviek, ludzi prybyvajuć. Na prystupkach stajać Rymašeŭski, Sieviaryniec, Statkievič i Źmicier Daškievič (lider Maładoha Frontu)

18:00

Vystupiŭ Pavieł Sieviaryniec, jaki zaklikaŭ usich prysutnych — kala 200 čałaviek — hukać «Žyvie Biełaruś!». Supracoŭniki Minharvykankama papiaredzili Rymašeŭskaha ab adkaznaści nie dazvolenuju akcyju.

Toj adkazaŭ, što jak žychar Minska, Respubliki Biełaruś i patencyjny prezident jon moža sustrakacca z vybarcami dzie zaŭhodna, i nieabaviazkova na heta atrymlivać čynoŭnicki dazvoł.

Źjaviŭsia na płoščy kandydat u prezidenty Mikałaj Statkievič.

17:52

Na Płoščy ŭźniali kala 10 ściahoŭ — nacyjanalnych i BCHD. Zaraz siudy idzie kałona BCHD (30 čałaviek), jakoj kiruje Vital Rymašeŭski. Jany stajać na pierachodzie.

Zaraz na Płoščy ŭsiaho kala 100 udzielnikaŭ akcyi.

17:45

Pa pierymietry Kastryčnickaj płoščy ŭ Minsku stajać ludzi ŭ adnolkavych čornych kurtkach. Jany nikoha nie prapuskajuć.

A 18-j tut pavinna pačacca akcyja apazicyi — šerah kandydataŭ u prezidenty zaklikali pryjści na Kastryčnickuju płošču Minska vybarcaŭ na sustreču ź imi.

U dvary za MakDonaldsam — niekalki aŭtazakaŭ i aŭtobusaŭ z zaciemnienymi voknami.

Na samoj płoščy znachodzicca kala 30 čałaviek — udzielnikaŭ akcyi. Siarod ich — Pavieł Sieviaryniec, kiraŭnik vybarčaha štaba kandydata ŭ prezidenty Vitala Rymašeŭskaha.

Šmat žurnalistaŭ, u tym liku rasijskich. Taksama mnoha ludziej u cyvilnych.

• 0
• 0
• 0
• 0
• 0
• 0
• 0
• 0