Супрацоўнік «Рашы Тудэй» Прыдыбайла з'явіўся каля БТ, калі пайшлі чуткі пра завоз работнікаў з Расіі. Хто гэта?
«Наша Ніва» паведамляла ў сваім тэлеграм-канале пра магчымы завоз кадраў з Расіі на месцы забастоўшчыкаў у Белтэлерадыёкампаніі.
У прыватнасці, у сценах установы быў заўважаны грамадзянін Расіі Канстанцін Прыдыбайла — у мінулым беларускі журналіст, які цяпер працуе ў структуры расійскага прапагандысцкага канала «Раша Тудэй».
На пытанне пра сваю датычнасць да фармавання новай каманды БТ Канстанцін адказаў «НН» расплывіста: «Збольшага так. Людзі звальняюцца, трэба камусьці працаваць. Шукаюць па ўсім рынку, у тым ліку і ў Расіі. Я працаваў на «БТ» у некаторых СМІ Расіі, і цяпер заходзіў да калег, і гэтую тэму (пра кадры — «НН») мы таксама абмяркоўвалі».
Хто ж такі Канстанцін Прыдыбайла?
Даўно жыве на дзве краіны
Канстанцін нарадзіўся ў Варкуце, да 2006 года жыў у Іжэўску. Пасля разам з сям’ёй пераехаў на гістарычную радзіму бацькоў у Гомельскую вобласць. Скончыў БДУ па спецыяльнасці «Сацыяльная псіхалогія».
Сам сябе называе «нахабнікам» і «інтэрнэт-залежным». Спрабаваў весці свой ютуб-блог, мужчынскую калонку ў часопісе «Горад жанчын».
Кар’еру ў журналістыцы пачынаў на радыё, пасля прайшоў кастынг і вёў «Добрай раніцы, Беларусь» на Беларусь-1. Потым яго пацягнула на геаграфічную радзіму — у Расію.
Спачатку Канстанцін уладкаваўся намеснікам галоўнага рэдактара на рэгіянальны канал Life78 — гэта філіял разгалінаванай структуры таблоіда Lifenews. Медыя ўляпалася ў гучны скандал, калі пасля гутаркі з карэспандэнтам выдання скончыла жыццё самагубствам дачка віцэ-спікера парламента Санкт-Пецярбурга.
Не прапрацаваўшы ў Расіі і два гады, Прыдыбайла заявіў, што зноў плануе вярнуцца на «Беларусь-1». Хадзілі чуткі, што ён хоча запусціць гучны праект і стаць шоўменам накшталт Івана Урганта.
Але нешта не склалася зноў: на гэта месца ўзялі Яўгена Перліна, а Прыдыбайла зноў паехаў у Расію.
Спачатку быў намеснікам галоўнага рэдактара на «Радыё Камсамольская праўда». Сёння ж ён у шэрагах карэспандэнтаў Russia Today. У гэты момант асвятляе для канала тэму беларускіх выбараў і іх наступстваў.
«Пуцін круты. Лукашэнка таксама круты», — напісаў ён 9 жніўня. Праз некалькі гадзін яго затрымалі амапаўцы, але неўзабаве адпусцілі.
Крытыкуе ўсё беларуска-апазіцыйнае, падлашчваецца да Салаўёва
Да асвятлення журналістам падзей з Беларусі ёсць шмат пытанняў.
Так, у сваіх рэпартажах для RT, Канстанцін рэгулярна дазваляе сабе зневажальна адгукацца пра апазіцыю і яе лідараў. У адным са стрымаў ён называе Марыю Калеснікаву «гнусной сукой, которая перестала попадать в его сексуальный коридор». Пра ўвесь аб'яднаны штаб раней выказваўся, што гэта толькі прыгожая карцінка, з якой пасля будзе «дупа».
Не абыходзіць увагай ён і былых калег: звольненых з ТБ вядучых — Яўгена Перліна і Уладзіміра Бурко ў каментах для шоу Уладзіміра Салаўёва «Полный контакт» ён прама называе «переобувшимися в полете». На погляд Прыдыбайлы, яны сышлі з тэлебачання толькі дзеля таго, каб іх працягвалі клікаць на карпаратывы.
Пасля дзяржаўнага мерапрыемства ў Кіеўскім скверы, на якім дыджэі ўключылі «Перамен» Цоя, Прыдыбайла падтрымліваў менавіта пазіцыю кіраўніка адміністрацыі Цэнтральнага раёна Змітра Пятрушы, які выклікаў на дыджэяў міліцыю. Называў чыноўніка героем. Таксама ён — работнік замежнага медыя — выступае за тое, каб усе замежныя СМІ працавалі ў Беларусі з пазнакай «зроблена за мяжой», каб прыбраць з краіны не пажаданых «замежных агентаў».
У сваіх допісах Прыдыбайла захапляецца Уладзімірам Салаўёвым і ў прынцыпе рэспектуе рускаму міру. Але нават працуючы з Расіі, пастаянна знаходзіць час, каб ачарніць ці насаліць беларусам, якія нейкім чынам адыходзяць ад лукашэнкаўскай палітыкі ці выступаюць за нацыянальныя каштоўнасці.
Так, менавіта Прыдыбайла ў свой час напісаў заяву ў падатковую інспекцыю на палітычнага блогера Эдуарда Пальчыса, калі той пачаў збіраць сродкі на свой сайт 1863x.com. Праходзіўся па адзнаках Ганны Смілевіч, напісаў скаргу ў Мінінфарм на kyky.org.
Памёр дзед Колі Лукашэнкі — былы вязень ГУЛАГа, асуджаны за дапамогу «бандэраўцам»9
Каментары