Перасохлыя і абмялелыя рэкі, азёры і вадасховішчы Еўропы выклікалі бум так званага «сухога турызму». Вайсковыя караблі часоў Другой сусветнай вайны, руіны цэркваў і старажытныя мегаліты сталі месцам паломніцтва тысяч турыстаў. Але гэтаму рады не ўсе.
Нямецкія караблі «ўсплылі» на Дунаі ў Сербіі
Экстрэмальная спёка і засуха ў краінах Еўропы гэтым летам высушваюць многія вадаёмы кантынента, адкрываючы вачам розныя аб'екты, калісьці надзейна схаваныя пад вадой.
У сербскім Прахаве ўзровень вады ў Дунаі настолькі знізіўся, што агаліў парэшткі 20 вайсковых караблёў Трэцяга рэйха, затопленых у 1944 годзе пры адступленні нямецкай чарнаморскай флатыліі пад націскам савецкіх войскаў.
Хоць большасць суднаў пахаваныя пад пяшчанымі водмелямі, некаторыя з іх вежаў, мачтаў, карпусоў і камандных масткоў прыкметна выступаюць над вадой, што сур'ёзна абцяжарвае суднаходства. Суднаходны ўчастак звузіўся са 180 да 100 м.
Рызыка ў тым, што вайсковыя караблі былі затопленыя з боезарадамі. У Сербіі асцерагаюцца, што неасцярожныя паводзіны дайвераў і іншых цікаўных могуць прывесці да дэтанавання старых тарпед і снарадаў.
У Іспаніі турысты спяшаюцца ўбачыць старажытны дальмен і царкву
У цэнтральнай Іспаніі засуха агаліла Гуадальпераль, дагістарычны дальмен.
Нямецкі археолаг Уга Обермаер раскапаў артэфакт у сярэдзіне 1920-х гадоў. Круг з дзясяткаў мегалітычных камянёў, які таксама называюць «іспанскім Стоўнхэнджам», датуецца 5000 годам да нашай эры. Камяні знаходзяцца ў вадасховішчы Вальдэканьяс, якое з-за засухі запоўненае ўсяго на 26 адсоткаў.
Цяпер у археолагаў ёсць магчымасць вывучыць рэліквіі, якія з'яўляліся свету толькі чатыры разы. Мясцовыя гістарычныя і турыстычныя асацыяцыі ўжо выступаюць за перамяшчэнне камянёў Гуадалпераль у музей або ў іншае месца на сушы. На іх думку, гэта стане новай «прынадай» для турыстаў. Але мясцовыя лодачнікі супраць: артэфакт, які выступае з вады, стаў вельмі папулярны, так што ад ахвотных паглядзець на «іспанскі Стоўнхэндж» няма адбою.
Абмялелае сёлета вадасховішча Саў паказала свету і турыстам затопленую ў 1962 годзе царкву Сан-Рома. Цяпер яна стала мясцовай славутасцю, а мэр гарадка Віланова-дэ-Саў Жаан Рыера мае намер сур'ёзна абмежаваць плынь ахвотных яе ўбачыць. У горадзе зусім не рады «сухому турызму»: візіцёры вытоптваюць берагі, пакідаюць пасля сябе горы смецця, спрабуюць дабрацца да царквы, а галоўнае, яны павялічваюць расход вады, арандуючы гасцініцы або апартаменты ў акрузе.
Камяні возера Гарда сталі месцам для фотасесій
У Італіі ў канцы чэрвеня засуха агаліла патанулую баржу часоў Другой сусветнай вайны, якая спачывае на дне ракі По.
А ў ліпені воды ракі Тыбр апусціліся так нізка, што з'явіўся звычайна затоплены рымскі мост I стагоддзя да н. э.
На дэкарацыі фантастычнага фільма стала падобнае абмялелае возера Гарда: агаліліся выбеленыя скалы, так што турысты прыязджаюць сюды не толькі загараць, але і фатаграфавацца.
У Вялікабрытаніі ўзровень вадасховішча стаў такім нізкім, што на паверхні з'явіліся руіны валійскай вёскі, затопленай у XIX стагоддзі.
Рачныя круізы па Рэйне прыпыненыя
Абмялелыя рэкі Германіі прыносяць страты арганізатарам рачных круізаў. Так, у нямецкім мястэчку Каўб узровень Рэйна знізіўся да 36 см, і гэта пры тым, што суднаходства тут цалкам стратнае ўжо пры 40-сантыметровым узроўні вады.
Мясцовыя СМІ ўжо назвалі гэтую сітуацыю «драмай на Рэйне»: класічныя маршруты круізаў сталі немагчымыя. Суднаходныя кампаніі і тураператары вымушаныя дзейнічаць па сітуацыі: цеплаход выкарыстоўваюць толькі як плывучы гатэль, а для перасоўванняў турыстаў па маршруце даводзіцца выкарыстоўваць аўтобусы.
У Германіі строяць песімістычныя прагнозы: яшчэ адно такое лета, і ўсе тураператары, якія працуюць на Рэйне, проста масава збанкрутуюць.
У фантаннай сталіцы Францыі адключылі фантаны
У Францыі ў некаторых месцах амаль цалкам высахлі ўчасткі Луары. Ну а вядомы сваім 41 фантанам Перн-ле-Фантэн, сярэднявечны горад на поўдні Францыі, адключыў знакамітыя фантаны. Традыцыя гаворыць, што пітная вада з гэтых фантанаў прымушае закахацца, але, відавочна, што гэта адбудзецца ўжо не ў гэтым годзе.
Паводле ацэнак Еўракамісіі, засуха ў некаторых рэгіёнах Еўропы можа працягнуцца да лістапада 2022 года. У першую чаргу гэта тычыцца Партугаліі і Іспаніі. На канец жніўня амаль у палове еўрапейскіх краін дзейнічае папярэджанне аб засусе. Засуху-2022 ужо называюць самай моцнай за апошнія 500 гадоў.
Мінчанка пакінула станоўчы водгук на сумку — і раптам выкрыла здраду чужога мужа16
Каментары