Карпянкоў хоча вывесці ўнутраныя войскі ў асобную структуру на ўзор Расгвардыі
Крыніцы «Нашай Нівы» ў Міністэрстве ўнутраных спраў паведамляюць пра рэформу, якую спрабуе пралабіраваць намеснік міністра, лукашэнкаўскі генерал Мікалай Карпянкоў.
«Адносіны паміж міністрам Іванам Кубраковым і ягоным намеснікам Карпянковым становяцца невыносна кепскімі — Карпянкоў плануе аддзяленне ўнутраных войскаў ад МУС у асобную структуру на манер Расгвардыі. А тое, што Лукашэнка не адправіў Карпянкова ў верасні на пенсію, ускосна гаворыць пра далейшыя планы на гэтага чалавека», — кажа «Нашай Ніве» інфармаваны суразмоўца са структуры МУС.
Расгвардыя — ваенная арганізацыя, створаная ў 2016-м у Расіі на базе ўнутраных войскаў МУС Расіі, якая выконвае функцыі па фізічным задушэнні любога роду нязгоды з пуцінскім рэжымам.
Ёй падпарадкоўваюцца ўнутраныя войскі і атрады спецназа па ўсёй Расіі.
Кіруе Расгвардыяй 70-гадовы генерал арміі Віктар Золатаў, чый статус прыраўняны да міністра — ён падпарадкоўваецца толькі Пуціну.
«Цяпер беларускія ўнутраныя войскі існуюць у сістэме МУС у выглядзе Галоўнага ўпраўлення. Калі іх выведуць у асобную структуру, Карпянкоў стане на ўзроўні міністра, а ўсе ягоныя топ-менеджары, адпаведна, стануць па пазіцыю вышэй. Кожны чалавек у сістэме зробіць крок наперад кар'ерна і фінансава.
Самастойны статус таксама абяцае самастойнае кіраванне бюджэтам. Тлумачыць выгоды, у прынцыпе, няма сэнсу, яны на паверхні», — дадае наш суразмоўца, акцэнтуючы ўвагу на тым, што Карпянкоў паўтарае працэсы, якія адбываліся ў Расіі.
«Ён не заўсёды трымае субардынацыю і дазваляе сабе пісаць наўпрост Лукашэнку, хоць павінен гаварыць з уладай толькі праз міністра Кубракова. Пазіцыянуе сябе самастойнай фігурай, якой цесна ў яго цяперашняй пазіцыі, і чалавекам, які ведае, як павінна развівацца сістэма абароны канстытуцыйнага ладу.
Ён ужо стварыў у абласных гарадах свае атрады спецназу, прыцягнуў з сабой сваіх давераных асоб з ГУБАЗа, якія сталі працаваць ва ўнутраных войсках як служба ўласнай бяспекі, падмяняючы гэтую функцыю МУС.
Намер яго цалкам ясны, для афіцэраў унутраных войскаў ён сакрэтам не з'яўляецца, і ўсе, па шчырасці, гэтага чакаюць і на гэта спадзяюцца, таму што ў матэрыяльным сэнсе стане палепш.
З боку цэнтральнага апарата МУС, канечне ж, падтрымкі няма — хто падтрымае сепаратны рух?
Застаецца толькі невядомым, ці ўдасца Карпянкову пераканаць Лукашэнку, за якім фінальнае рашэнне», — падагульніў суразмоўца.
«Нават яго прыхільнікі зразумелі, што жыць як раней ужо не атрымаецца». Беларусы расказалі пра атмасферу ў краіне напярэдадні выбараў5
Каментары
Правільна. Потым судзіць іх усіх разам. А структуру прызнаць тэрарыстычнай. Прозвішчы апублікаваць на адмысловым сайце, з фота карткамі.
Ахаха, у пригожына мазгі былі і досвед міжнародных зносін якіх ніякіх. А карпуша - радавы рэкіцір з 90х, які вылез ТОЛЬКІ таму, што глыбока лізнуў. Няма чаго і параўноўваць іх.