«Гей-прайд 2010» у Мінску жорстка разагнаны + фоты і відэа
Шэсце «Славянскага
Мерапрыемства мусіла пачацца каля 13.00. На вуліцы Сурганава сабраліся журналісты, непадалёк дзяжурылі ДАІ і «людзі ў чорным» з рацыямі. Журналісты цярпліва чакалі: усім было сказана, што гэта толькі месца збору для СМІ, дзе пройдзе сам гей-прайд нам паведамяць дадаткова.
Дадатковай інфармацыі каля 50 журналістаў чакалі 1.5 гадзіны. Урыўкамі з тэлефонных размоваў арганізатары гей-прайду паведамлялі, што ў іх праблемы, была сутычка з контр-маніфестантамі і запланаваны маршрут гей-прайду ўжо ачэплены, паўсюль стаяць аўтазакі. Журналісты, якія прыйшлі на мерапрыемства, першапачаткова былі далёка не гамафобна настроеныя. Аднак праз 1.5 гадзіны чакання пачынала нарастаць непрыязь і жарты выходзілі далёка за межы цярпімасці да сэкс-меншынстваў. Аднак многія ўсё ж такі дачакалі падзеі — «нарэшце, славянскі гей-прайд 2010!».
А палове на трэцюю міма некалькі разоў праехаў байкер з вясёлкавым сцягам. Пакуль супрацоўнікі ДАІ заўважна напружыліся і пачалі перамаўляцца па рацыях у пошуках «нестандартнага» віду транспарту. Журналістам у гэты час паведамілі, што праз хвілін 15 маніфестанты самі прыйдуць на вуліцу Сурганава.
Калі нарэшце на даляглядзе стаў бачны вясёлкавы сцяг, журналісты пабеглі на сустрэчу геям, лесбіянкам і транссэксуалам. У дадзеным выпадку гэта было не проста даўгачаканая падзея, але і спроба патрапіць да дэманстрантаў хутчэй за спецназ ці міліцыю.
Удзельнікі шэсця неслі 15-метровы сцяг і выкрыквалі «гамафобія — гэта хвароба». У шэсці удзельніала каля 30 прадстаўнікоў ЛГБТ-супольнасці. Яны падышлі да ўвахода ў Інстытут мастацтвазнаўства і разгарнулі плакаты.
«Мы патрабуем дазволіць аднаполыя бракі! — выкрыквалі ўдзельнікі гей-прайду, — Мы патрабуем абароны ад гамафобіі і жорсткасці, з якой сутыкаемся у нашай краіне!»
Хлопцы і дзяўчаты моцна хваляваліся і азіраліся па баках. Літаральна праз 5 хвілін пад’ехала машына, выскачылі некалькі супрацоўнікаў міліцыі і вырвалі з рук у дэманстрантаў сцяг. Пачаліся крыкі, мітусня, пасля пад’ехала яшчэ адна машына, і пачалі затрымліваць. Трэба заўважыць, што журналістаў не краналі, міліцыя прафесійна вырывала з натоўпу маладых людзей нетрадыцыйнай арыентацыі, у першую чаргу тых, хто спрабаваў даваць інтэрв’ю на камеры ці даставаць вясёлкавыя сцягі.
Падчас усяго 15-хвіліннага мерапрыемства з’явіўся адзін контр-маніфестант. Першапачаткова ніхто моцна не звяртаў увагі на журналіста БелаПАН Васіля Сямашку. Пасля некалькіх нецэнзурных выкрыкаў з яго боку, усе камеры павярнуліся да калегі, які стаяў з дзесяткам яек і збіраўся іх кінуць ў вясёлкавы сцяг. Аказалася, у яго сёння выходны і ён на месцы падзеяў не як журналіст, а выйшаў выказаць сваю грамадзянскую пазіцыю супраць дэманстрацыі «ненармальных» арыентацый.
Праз пятнаццаць хвілінаў на вуліцы Сурганава засталіся зноўку толькі журналісты. Удзельнікі «Славянскага гей-прайду- 2010» затрыманы і разагнаныя. 7 чалавек адвезлі ў РУУС Першамайскага раёна, яшчэ 4 чалавека ў Савецкі РУУС горада Мінска. У 19.00 стала вядома, што што 8 затрыманых ЛГБТ-актывіста адвезлі на Акрэсціна, сярод іх 2 грамадзяніна Расійскай федэрацыі. Астатніх затрыманых адпусцілі.
Нагадаем, Менгарвыканкам адмовіў арганізатарам шэсця «Славянскі гей-прайд 2010» у шэсці па вуліцах Менску, удзельнікі якога плянавалі сабрацца каля будынка Белдзяржфілармоніі і прайсці па праспекце Незалежнасці да будынка прэзыдыума Нацыянальнай акадэміі навук.
Каментары