«Спачатку паставілі тварам да сцяны, потым дазволілі прысесці». Сяргей Чэрачань расказаў, як праходзіў ператрус у офісе прафсаюза РЭП
Кіраўнік партыі «Беларуская сацыял-дэмакратычная Грамада» і былы кандыдат у прэзідэнты Сяргей Чэрачань прыехаў сёння на сустрэчу з прафсаюзным лідарам Генадзем Фядынічам у офіс Беларускага прафсаюза работнікаў радыёэлектроннай прамысловасці (РЭП). Але толкам пагаварыць яны не паспелі, бо ў офіс, выламаўшы дзверы, уварваліся людзі ў чорным з пастановай на ператрус, які доўжыўся прыкладна з 13 да 18 гадзін. Падрабязнасці таго, што здарылася, Чэрачань расказаў «Народнай волі».
— Сяргей, раскажыце, як усё было? Усіх адразу паклалі тварамі ў падлогу?
— Не, спачатку паставілі тварам да сцяны, потым дазволілі прысесці.
— Што шукалі?
— Быў стандартны ператрус, з панятымі.
— Хто быў у офісе, акрамя вас і Генадзя Фядыніча?
— Быў Бераснеў Васіль Ціханавіч, Зміцер Бародка. Яшчэ памочніца, якая проста ў няўдалы час прыйшла ў офіс.
— Усё перавярнулі ўверх дном?
— У прынцыпе, працавалі дастаткова акуратна. Ясная справа, што дакументы, якія даставалі з шафаў, назад не складалі. Але не было такога, каб нешта ламалі. Толькі адразу калі заходзілі, па-мойму, вынеслі двое дзвярэй…
— Патлумачылі, з чым звязана ўварванне?
— Ператрус праводзіўся ў межах крымінальнай справы, ініцыятарам з'яўляецца Следчы камітэт. Ясная рэч, што я не запісваў, але называлі вельмі шмат (калі не памыляюся, парадку дзесяці) артыкулаў Крымінальнага кодэкса.
— Пасля таго, як ператрус скончыўся, усіх адпусцілі?
— Не. Адпусцілі толькі мяне і чалавека, які не меў дачынення да прафсаюзаў.
— Вы ўсе пяць гадзін ператрусу стаялі ля сцяны? У туалет хоць выпускалі?
— Не, мы сядзелі. У туалет выпускалі. Хто прасіў — нават частавалі гарбатай-кавай. Адносна ўсё было нармальна, без нейкіх асаблівых перагінаў.
— Як Генадзь Фядыніч усё гэта каментаваў?
— Казаў, што гэта ўшчамленне правоў працоўных і палітычна матываваная сітуацыя. Справа ў тым, што іх прафсаюзную арганізацыю нядаўна ўнеслі ў спісы экстрэмісцкіх. У адказ на гэта Генадзь Фядыніч і Васіль Ціханавіч накіравалі запыт у Камітэт дзяржаўнай бяспекі з просьбай растлумачыць, па якой прычыне іх прызналі экстрэмісцкай арганізацыяй, калі прафсаюз афіцыйна зарэгістраваны і працуе ў рамках заканадаўства строга па сваім профілі — адстойвае правы працоўных. І вось такі матываваны адказ ад КДБ сёння яны атрымалі…
— А як вы там апынуліся?
— Мы стэлефанаваліся з Генадзем Фядынічам, дамовіліся аб сустрэчы. Заехаў даведацца, як у іх справы, як сітуацыя ў арганізацыі. І вось… даведаўся… Гэта была адна з нямногіх арганізацый, якая займалася рэальнай дапамогай рабочым людзям.
Так, магчыма, у 2020 годзе яны падтрымалі пратэст, але пасля гэтага яны ўвайшлі ў рамкі сваіх статутных мэтаў і задач і, па-мойму, вельмі спакойна працавалі.
Чытайце таксама:
Ідзе «зачыстка» незалежных прафсаюзаў: прайшлі ператрусы ў офісах і на кватэрах актывістаў
«Нават яго прыхільнікі зразумелі, што жыць як раней ужо не атрымаецца». Беларусы расказалі пра атмасферу ў краіне напярэдадні выбараў8
Каментары