Асцярожна, адбываюцца масавыя спробы ўзлому тэлеграм-акаўнтаў беларусаў. Расказваем, як абараніцца
Нашы чытачы паведамляюць, што за апошні месяц у іх саміх або іх знаёмых былі спробы ўзламаць акаўнты на беларускіх нумарах. Простыя правілы дазволяць вам не даць захапіць акаўнт.
Што вядома?
Спробы ўваходу ў акаўнт беларусаў адбываюцца рэгулярна, але апошнім часам яны пачасціліся. Імаверна, гэта робяць беларускія спецслужбы — яны атрымліваюць смс за чалавека.
Як зразумець, што вас спрабуюць узламаць?
Калі ваш тэлеграм-акаўнт зарэгістраваны на беларускі або расійскі нумар і мае ўключаную двухфактарную аўтэнтыфікацыю, так званы «Воблачны пароль», то вам прыйдзе апавяшчэнне пра незавершаную спробу ўваходу.
Калі ў вас няма двухфактарнай аўтэнтыфікацыі, то фактычна — ніяк. Спецслужбы могуць лёгка ўвайсці ў ваш акаўнт, спампаваць у ім што хочуць, выдаліць сляды ўваходу ды выйсці.
Першы этап абароны ад узлому — двухфактарная аўтэнтыфікацыя
Галоўнае, што вам трэба зрабіць — праверыць, ці ўключаная ў вас двухфактарная аўтэнтыфікацыя. Калі яна не ўключаная, то абавязкова ўключыце яе. Для гэтага націсніце на сімвал трох крэсак у левым верхнім куце экрана. Абярыце «Налады».
Далей — «Прыватнасць і бяспека».
Далей націсніце «Прыватнасць і бяспека».
Калі насупраць «Двухэтапнай праверкі» напісана «Укл.», то гэта значыць, што двухфактарная аўтэнтыфікацыя ўключаная. Калі напісана «Выкл.», то варта яе ўключыць. Для гэтага націсніце на пункт «Двухэтапная праверка».
Пасля націсніце кнопку «Задаць пароль». Адкрыецца меню, дзе трэба яго ўвесці, а пасля паўтарыць. Звярніце ўвагу — ён мусіць быць унікальным і адрозным ад іншых вашых пароляў, але неабавязкова вельмі складаным. Галоўнае, каб ён не складаўся толькі з лічбаў або простых літараў. Гайд па стварэнні добрага пароля ёсць тут.
Далей вам прапануюць зрабіць падказку для пароля з пары словаў. Рабіце гэта па вашым выбары, галоўнае, каб у падказцы не ўтрымліваўся сам пароль. Або націсніце «Прапусціць».
На наступным кроку вам прапануюць абраць e-mail для ўзнаўлення акаўнта на выпадак, калі вы забудзецеся пароль. Для бяспекі гэта так сабе — пароль лепш памятаць, дый e-mail таксама могуць узламаць і зайсці ў ваш акаўнт у тэлеграме. Але калі вы ўпэўненыя ў бяспецы вашай электроннай скрыні, то можаце абраць e-mail як опцыю.
Каб з'явілася кнопка «Прапусціць», спачатку націсніце на сінюю стрэлку, нічога не ўводзячы ў полі e-mail. Пасля гэтага ўсплыве акенца з папярэджаннем.
Націсніце «Прапусціць». Двухфактарная аўтэнтыфікацыя ўключаная.
Праверка на лішнія прылады
Пасля гэтага праверце, ці няма ў вашым тэлеграме чужых прыладаў. Для гэтага вярніцеся ў «Налады» і націсніце пункт «Прылады».
Калі там ёсць нейкія падазроныя прылады, якіх вы не памятаеце, націсніце на назву прылады і пасля ўнізе абярыце пункт «Скончыць сеанс».
Пасля гэтага з'явіцца акно пацверджання. Націсніце «Скончыць».
Што яшчэ можна зрабіць?
Па-першае, пераканайцеся, што ў вас выстаўленыя максімальныя налады прыватнасці. Для гэтага зайдзіце ў пункт «Прыватнасць і бяспека». Максімальныя налады прыватнасці выглядаюць так.
Калі не, то ўключыце іх. Асабліва звярніце ўвагу на тое, каб быў схаваны ваш нумар. Для гэтага зайдзіце ў пункт «Нумар тэлефона». Налады мусяць быць такімі, як на скрыншоце ніжэй.
Па-другое, перанясіце акаўнт на замежны нумар. Самы надзейны варыянт — папрасіць чалавека, якому вы давяраеце, набыць сім-карту за мяжой і зарэгістраваць новы акаўнт на гэты нумар.
Менш надзейны варыянт — сэрвісы віртуальных нумароў. Пра іх мы падрабязней пісалі ў адмысловым гайдзе.
Як зарэгістраваць ананімныя акаўнты ў Telegram, сацсетках і іншых месенджарах — падрабязны гайд
Па-трэцяе, перапытайцеся ў вашых сяброў і знаёмых у Беларусі, ці добра абаронены іх акаўнт. Калі не, то навучыце іх, як яго абараніць.
«Наша Нiва» — бастыён беларушчыны
ПАДТРЫМАЦЬМы адшукалі ў Telegram функцыю, якая можа быць небяспечнай для беларусаў. Вось як засцерагчы сябе і як зрабіць яе карыснай
Тлумачым, якім чынам сілавікі знаходзяць карыстальнікаў Telegram і як гэтага пазбегнуць
Telegram і не толькі — як правільна пачысціць месенджары, каб не трапіць пад рэпрэсіі. Падрабязны гайд
Каментары
В декабре мне стал настойчиво писать в Телеграмме какой-то доброжелатель, который нашёл все мои посты в разных чатах и предложил помочь мне их удалить.
Так вот суть! К каждому моему комментарию он прикрепил ССЫЛКУ НА КОТОРУЮ НАДО НАЖАТЬ И КОММЕНТАРИЙ ЯКОБЫ УДАЛЯЕТСЯ. НИ В КОЕМ СЛУЧАЕ НЕ НАЖИМАЙТЕ НА ЭТУ ССЫЛКУ.
ЭТО ЛОВУШКА. ВАС СРАЗУ ВЫЧИСЛЯТ И ЗА ВАМИ СРАЗУ ПРИДУТ. (Если, конечно, вы в Беларуси). Надеюсь, кому-то это замечание поможет.