«Год знаходзіцца ў поўнай ізаляцыі». Што робіцца з Марыяй Калеснікавай
Больш за год, ад лютага 2023-га, блізкія Марыі Калеснікавай нічога не ведаюць пра яе. Радыё Свабода са сваіх крыніц дазналася трохі інфармацыі пра палітзняволеную.
Апошні ліст ад Марыі Калеснікавай родныя атрымалі 15 лютага 2023 года. З таго часу блізкія не маюць пра яе аніякай інфармацыі. Свабода пагутарыла з некалькімі чалавекамі, якія маюць звесткі пра Марыю за гэты перыяд. З прычын бяспекі іх даныя не раскрываюцца.
«Увесь гэты час, прынамсі амаль год, Марыя знаходзіцца ў поўнай ізаляцыі. Яе змясцілі ў адзіночную камеру ПКТ — памяшканне камернага тыпу. Паводле закона, максімальны тэрмін знаходжання ў ПКТ — 6 месяцаў. Таму яе пераводзілі на некалькі дзён у ШІЗА — і адтуль зноў кінулі ў ПКТ», — патлумачыў адзін з суразмоўцаў.
Нагадаем, у канцы лістапада 2023 года асуджаная на 11 гадоў Марыя Калеснікава трапіла ў рэанімацыю Гомельскай бальніцы хуткай дапамогі. Ёй правялі экстраную аперацыю, выявілі прабадную язву, якая ўскладнілася перытанітам. Пасля бальніцы ў хуткім часе Марыю перавялі назад у калонію, у медыка-санітарную частку. Там ёй дазволілі сустрэцца з бацькам. З таго часу родныя не бачылі Марыю, не атрымлівалі лістоў і тэлефанаванняў.
Яшчэ адна крыніца Свабоды сцвярджае, што праблемы са здароўем у Марыі працягваюцца і цяпер.
«Па-першае, аперацыя не прайшла бясследна. Яна моцна схуднела. Перанесла некалькі прастудных захворванняў. У яе быў высокі ціск, але ёй адмаўляліся адразу даць лекі. Ды што там — не хацелі нават па яе просьбе памераць ціск, хоць яна настойвала», — кажа суразмоўца.
Паводле яе, Марыю пераводзілі ПКТ у ШІЗА. Адрозненне ў тым, што ў ШІЗА больш холадна і сыра, чым у ПКТ, не даюць матраца, падушкі, коўдры, пасцельнай бялізны і верхняй вопраткі.
«Застаешся толькі ў футболцы, «ласінах» і форменным гарнітуры. Спаць даводзіцца на голых дошках. У такіх умовах была і Марыя. Ад холаду і вільгаці там пачынаюць балець суставы», — кажа яшчэ адна суразмоўца, якая нядаўна вызвалілася з Гомельскай жаночай калоніі.
Паводле яе слоў, Калеснікаву пасля ШІЗА перавялі назад у ПКТ, дзе ўмовы былі лепшымі. «Там хоць ёсць матрац, коўдра, пасцельная бялізна і вопратка», — зазначыла крыніца.
Суразмоўца дадае, што Марыю Калеснікаву не водзяць на працу, яна ізаляваная ў адзіночнай камеры. Іншыя зняволеныя жанчыны, трапляючы ў ШІЗА, чулі яе голас, калі яна была там і казала ахоўнікам пра тое, што адчувае сябе блага.
Чытайце таксама:
«Я вас вельмі люблю і моцна-моцна сумую». Штучны інтэлект чытае голасам Марыі Калеснікавай яе ліст
«Мне толькі хочацца, каб яна выжыла». Сястра Марыі Калеснікавай — пра год без сувязі з ёй
«Кожную ноч я кажу: «Сына, дабранач». Як беларусы перажываюць затрыманні сваіх блізкіх
Хто тая жанчына, якую Марзалюк у эфіры БТ абазваў «шваллю з Гродна», і што яна піша ў чатах? Расказваем пра доктарку Стэфановіч10
Каментары