Платформа адказаў на ананімныя і публічныя пытанні, якая была дзіка папулярная ў пачатку 2010-х, анансавала канчатковае спыненне працы да канца гэтага года. Вось у чым прычына такога рашэння.
Ask.fm закрыецца 1 снежня 2024 года, афіцыйна паведамілі стваральнікі платформы.
Па іх словах, гэта рашэнне абумоўлена значным змяншэннем колькасці карыстальнікаў.
«На жаль, наша платформа больш не адпавядае патрэбам сучасных карыстальнікаў сацыяльных сетак. Пасля захапляльнага шляху працягласцю больш за 10 гадоў мы вымушаныя паведаміць пра яго завяршэнне. Платформа пытанняў і адказаў для ананімных размоў спыняе працу з 1 снежня 2024 года.
Калі мы заснавалі кампанію, мы верылі ў ідэю адкрытай камунікацыі і зносін праз пытанні, адказы і шчырыя размовы. Мы пераадолелі нямала цяжкасцяў, каб гарантаваць, што платформа застаецца цалкам бяспечнай для кожнага карыстальніка. Дзякуй усім тым, хто быў цікаўным, каб задаваць пытанні, і дастаткова смелым, каб адказваць на іх шчыра», — напісалі на сайце платформы яе стваральнікі.
Адміністрацыя сацсеткі адзначыла, што пачынаючы з 24 кастрычніка 2024 года рэгістрацыі новых акаўнтаў больш не будуць даступныя. Адначасова з гэтым паступова будуць выдаляцца ўсе асабістыя даныя з платформы згодна з дзейнымі нормамі і патрабаваннямі.
Нагадаем, што Ask.fm — гэта сацыяльная сетка, створаная амаль 15 гадоў таму ў Латвіі, дзе карыстальнікі могуць задаваць адзін аднаму ананімныя або публічныя пытанні, ствараючы тым самым ланцуг зносін і нават спаборніцтвы паміж карыстальнікамі па дасціпнасці адказаў. Платформа была папулярная ў многіх краінах Еўропы і СНД у пачатку 2010-х гадоў, на ёй можна было сачыць за сябрамі або цікавымі асобамі і даведвацца іх меркаванні на розныя тэмы.
Менавіта магчымасць задаваць пытанні ананімна і прыцягвала больш за ўсё карыстальнікаў у гэтую сацсетку, аднак гэта ж часам стварала на платформе глебу для росквіту кібербулінгу.
Рэстаўрацыі ў Беларусі засталося на тры дні. Галоўнаму прадпрыемству краіны фактычна падпісалі смяротны прысуд1
Каментары
Прэзідэнт Беларусі і той сябе лічыць "крутым", маё выхаванне не дазваляе мне паслаць яго на струк.