Выкладчыкаў звольнілі, калі яны падпісалі ліст супраць удзелу Гігіна ва УНС? Гігін: Адбылася памылка, трэба трымацца разам
11 лютага ў інтэрнэце з’явіўся адкрыты зварот да дэкана факультэта філасофіі і сацыяльных навук Вадзіма Гігіна, у якім асуджаўся яго ўдзел ва «Усебеларускім народным сходзе». Пад зваротам падпісалася больш за 200 чалавек — выкладчыкаў, студэнтаў, выпускнікоў ФФСН.
Сярод тых, хто паставіў свой аўтограф, былі знешнія сумяшчальнікі Аляксей Сасніцкі і Яраслава Кіча. Хто такія знешнія сумяшчальнікі? Яны працуюць у іншых месцах, але маюць колькі гадзін выкладання ва ўніверсітэце. Літаральна на наступны дзень Сасніцкі і Кіча паведамілі, што з імі было вырашана не працягваць супрацоўніцтва.
«Я падпісваў зварот, не думаў, што гэта будзе мець нейкі інфармацыйны ўплыў. Я перыядычна нейкія штукі падпісваю. Далей быў у ролі назіральніка, — дзеліцца з «НН» Аляксей Сасніцкі. — Я выкладаю свой спецкурс пра крэатыў, у мяне ўсяго адна пара на тыдзень. На гэтым тыдні ў мяне павінна была быць першая пара, але нібыта нейкія дакументальныя пытанні не былі вырашаныя. Я патэлефанаваў на кафедру, каб удакладніць па сваім занятку, бо яго перанеслі. Але мне сказалі, што няма маіх дакументаў, яны не дайшлі, і са мной будзе звязвацца загадчык кафедры.
Загадчык сапраўды пазваніў і сказаў, што мая кандыдатура не прайшла нейкі там адбор, і я больш не змагу выкладаць. Прычыну мне не назвалі».
Тое самае адбылося і з Яраславай Кічай. Аляксей і Яраслава дзеляць курс паміж сабой. Частка вывучае крэтыўны маркетынг пад кіраўніцтвам Сасніцкага, а частка — інтэрнэт-маркетынг у Кічы.
«Сёння ў другой палове дня мне пазваніў намеснік дэкана, які сказаў, што адбылася памылка, і мы можам зноў выкладаць. Званіў дэкан, запытаўся, якія ёсць прэтэнзіі да яго. Прапанавалі яшчэ раз даслаць дакументы, каб мы маглі выкладаць. Мы з Яраславай абмяркоўвалі гэты момант. Там не тыя грошы, пра якія можна марыць. Але пазбаўляць цэлы курс двух прадметаў ад выкладчыкаў-практыкаў — няправільна. Мы прынялі рашэнне працягваць выкладанне ва ўніверсітэце».
Дэкан ФФСН Вадзім Гігін так патлумачыў гісторыю: «Сітуацыі няма, не занеслі другую заяву ў аддзел кадраў. Я з імі паразмаўляў, мы зразумелі адно аднаго. Ну і ўсё. Яны яшчэ нават не пачыналі чытаць лекцыі, на гэтым тыдні пачаўся семестр. Яны былі знешнія сумяшчальнікі, іх дысціпліна пачынаецца толькі з другога семестра.
У нас могуць быць розныя погляды, але як сказаў Сасніцкі: «Мы — адна сям’я». Таму трэба трымацца разам», — сказаў Гігін.
«У цяперашні момант Аляксей Сасніцкі і Яраслава Кіча не з’яўляюцца выкладчыкамі БДУ. Да 30 чэрвеня 2020 года яны былі знешнімі сумяшчальнікамі. Пры паступленні заявы аб заключэнні з імі працоўных адносін на другі семестр бягучага навучальнага года гэтае пытанне будзе разгледжана ў рабочым парадку», — паведамілі «НН» у прэс-службе БДУ.
Памёр дзед Колі Лукашэнкі — былы вязень ГУЛАГа, асуджаны за дапамогу «бандэраўцам»2
Каментары