Авакада — смачны і карысны фрукт, які змяшчае больш бялкоў, чым усе астатнія фрукты. У ім таксама багата монаненасычаныях тлушчаў, што змяншаюць рызыку раку і хвароб сэрца. Прапануем вам тры простыя рэцэпты з авакада, якія дакажуць, што гэты фрукт яшчэ і можа быць дужа смачным.
Гуакамоле
Гэтая класічная мексіканская закуска — магчыма, самая вядомая страва з авакада. Гуакамоле можна дадаваць як гарнір да любых страў, а можна выкарыстоўваць яго як намазку на хлеб ці тарціллю. Каб зрабіць гэтую страву, вам спатрэбіцца:
- 3 спелыя авакада без скуры і косткі, парэзаныя на дробныя кавалкі
- палова дробна пакрышанай чырвонай цыбуліны
- жменя кінзы (яе таксама трэба дробна пашаткаваць)
- сок аднаго лайма
- дадаткова: 1 перац чылі (дробна нарэзаны)
- Пакладзіце авакада ў шырокую плоскую міску і размінайце яго відэльцам, пакуль амаль усё авакада не стане мяккім. Пакіньце некалькі больш грубых, але дробных кавалкаў авакада для належнай тэкстуры гуакамоле.
- Дадайце цыбулю, кінзу і сок лайма, прыпраўце соллю і чорным перцам. Перамяшайце, пры неабходнасці дадайце больш соку лайма. Дадайце перац чылі, калі вы яго выкарыстоўваеце. Адразу падавайце гатовы гуакамоле.
Салата з авакада
Такую салату можна прыгатаваць вельмі лёгка і хутка, але яна дасць адчуванне сытасці на доўгі час. Страва стане добрым элементам абеду ці вячэры.
На дзве порцыі салаты вам спатрэбіцца:
- ¼ чырвонай цыбуліны, парэзанай на тонкія паўкольцы
- 400 грам кансерваванай фасолі сорту Канеліні, прамытай і абсушанай (можна замяніць на белую фасолю)
- 1 вялікае авакада
- 100 грам памідораў чэры, разрэзаных на чатыры кавалкі
- 20 грам свежага парубленага базіліку
- сок ад ¼ лімона
- палова чайнай лыжкі аліўкавага алею
- соль і свежазмолаты чорны перац
- Здыміце з авакада скуру і дастаньце з яго костачку. Нарэжце авакада на тоўстыя кавалкі.
- Пакіньце цыбулю ў маленькай місцы з халоднай вадой на 5 хвілін, каб палепшыць яе смак.
- Перамяшайце ў вялікай місцы фасолю, авакада, памідоры чэры і базілік.
- Высушыце цыбулю і дадайце яе да салаты.
- Прыпраўце салату лімонным сокам і алеем, пасаліце яе і паперчыце. Перамяшайце салату і падавайце на стол.
Яйкі з авакада
Запечанае авакада набывае дужа багаты і мяккі смак. З’есці такую страву на сняданак — цудоўны спосаб пачаць дзень. Вось што спатрэбіцца, каб прыгатаваць дзве порцыі яек з авакада:
- 2 вялікія авакада хатняй тэмпературы
- 4 маленькія яйкі
- 4 чайныя лыжкі густых вяршкоў
- 2 памідоры чэры, разрэзаныя на чатыры кавалкі
- 20 грам цёртага сыра чэдар
- дробна парэзанае сцябло зялёнай цыбулі (можна замяніць на цыбулю-парэй)
- 4 дробкі молатага перцу чылі
- соль і свежазмолаты чорны перац
- Разрэжце авакада на паловы і дастаньце з іх костачкі. Разагрэйце духоўку да 200 градусаў.
- З кожнай паловы авакада дастаньце па сталовай лыжцы мякаці. Сачыце за тым, каб слой мякаці, што застаецца, быў раўнамерным. Можаце прыправіць 4 сталовыя лыжкі мякаці, што вы атрымалі, лімонным сокам і аліўкавым алеем і выкарыстаць іх як намазку на тосты.
- Каб вам было зручна запаўняць авакада начынкай, можаце пакласці іх у кубак. Вазьміце палову авакада, прыпраўце яе соллю і перцам, дадайце ўнутр чайную лыжку вяршкоў. Выліце зверху адно яйка. На яйка пакладзіце палову памідора чэры, частку сыру, цыбулі і перцу чылі. Такім жа чынам запоўніце і іншыя паловы авакада.
- Акуратна перамясціце авакада ў форму для запякання, пры гэтым сачыце, каб не праліліся яйкі. Каб было зручней, можна выкарыстоўваць формы для запякання кексаў. Выпякайце авакада на сярэдняй паліцы ў духоўцы на працягу 10—12 хвілін ці пакуль не прыгатуюцца бялкі яек. Адразу падавайце на стол.
Каментары