Novyja šeryja schiemy i prodaž pa davieranaści. Jak aŭtakamisy, pierakupy i pierahonščyki pracujuć u novych umovach
Z 22 studzienia nabyli moc novyja praviły prodažu aŭto. Ad hetaj daty bolš nielha aformić rachunak-daviedku, zamiest hetaha źjaviłasia mahčymaść skłaści dahavor kupli-prodažu ŭ nataryusa. Aproč hetaha, aŭtakamisijonkam zabaranili pracavać z najaŭnymi. Spytali ŭ pradstaŭnika kamisijonki i zvyčajnaha pierakupa, jak jany pracujuć u novych umovach.
Uskładnili žyćcio aŭtakamisijonkam
Ułady miarkujuć, što takija zachady dapamohuć u baraćbie ź pierakupami i zrobiać praces kupli-prodažu aŭto bolš prazrystym. Dola praŭdy ŭ hetym jość, bo niaredka rachunak-daviedku vypisvali pa kopii pašparta ŭłaśnika, biez udziełu apošniaha. Zaraz takoha dakładna nie budzie, ale vyhladaje, što novaŭviadzieńni prynieśli nie tolki pazityŭnyja źmieny, ale i niehatyŭnyja. Pryčym minusy na sabie adčujuć jak pradstaŭniki aŭtamabilnaha biznesu, tak i zvyčajnyja pakupniki.
IP i jurasoby, jakija zajmalisia kamisijnym prodažam aŭto, akazalisia ŭ składanym stanoviščy, bo pa novych praviłach jany mohuć prymać hrošy vyklučna ŭ bieznajaŭnym vyhladzie.
«Heta mocny ŭdar pa tych, chto namahaŭsia pierapradavać aŭtamabili lehalna», — ličyć surazmoŭca, jaki maje kamisijnuju placoŭku pa prodažy aŭto.
Mužčyna adznačaje, što pracavać pa novaj schiemie nie tolki nie zručna, ale i nie vyhadna ŭ pieršuju čarhu dla samich pakupnikoŭ.
«Ciapier my nie možam pradavać aŭtamabili viečaram i ŭ vychadnyja, sam praces kupli-prodažu aŭto staŭ bolš raściahnutym pa časie. Kali nie brać vypadki kupli aŭto z vykarystańniem kredytu abo lizinhu, nabyvać aŭtamabili praz aŭtakamisijonki budzie mienš vyhadna, čym u fizičnaj asoby», — miarkuje jon.
Raźličvacca rublami nie vyhadna
Biznesmien bačyć asnoŭnuju prablemu ŭ tym, što ciapier raźličvacca za aŭto davodzicca ŭ nacyjanalnaj valucie nie tolki na papiery, jak heta było raniej, a i faktyčna.
«Usim zrazumieła, što ŭ Biełarusi amal nichto nie pradaje i nie kuplaje aŭtamabili za biełaruskija rubli. Zvyčajna ŭsie raźliki adbyvalisia ŭ dalarach, radziej u jeŭra. Ciapier ža atrymlivajecca, što pakupnik spačatku pavinien abmianiać valutu na rubli, a potym užo raźličvacca za aŭto. Pradaviec aŭto, jaki pastaviŭ jaho na kamisiju, atrymaje rublovy pieravod, jaki ŭ 99% vypadkaŭ potym znoŭ budzie mianiać na valutu. Schiema vyhladaje składanaj i niavyhadnaj u paraŭnańni z kuplaj-prodažam aŭto pamiž fizičnymi asobami, bo aproč roźnicy ŭ kursie treba apłacić kamisiju banku».
Ułaśnik aŭtakamisijonki kaža, što słaba sabie ŭjaŭlaje, kab niechta nabyvaŭ takim čynam darahija aŭtamabili.
«Kali my takim čynam budziem pradavać aŭtamabil, jaki kaštuje 30—50 tysiač dalaraŭ, to straty na kursie buduć vymiaracca sotniami dalaraŭ».
Dla prykładu, kali aŭtamabil kaštuje 30 tysiač dalaraŭ, to pakupnik, abmianiaŭšy ich na rubli, atrymaje 79 500 rubloŭ. Kali pradaviec zachoča abmianiać atrymanyja za aŭtamabil rubli na dalary, to jon atrymaje na ruki nie 30 tysiač, a 29 335$. Takim čynam tolki na roźnicy kursu možna zhubić amal 700 dalaraŭ. Aproč hetaha, treba razumieć, što, pakul hrošy buduć «hulać» pa rachunkach, kurs moža źmianicca. Nie abaviazkova ŭ mienš vyhadny dla pradaŭca bok, ale kali rubiel za hety čas choć troški prasiadzie, to pry prodažy aŭto za tyja ž umoŭnyja 30 tysiač dalaraŭ možna budzie zhubić na kursie 1000 dalaraŭ i navat bolš.
Vychad jość
Tym nie mienš, surazmoŭca pryznajecca, što jon i jaho kalehi ŭ peŭnaj stupieni znajšli vyhadny dla ŭsich, aproč dziaržavy, varyjant abychodu hetych abmiežavańniaŭ.
«Častka aŭto, jakija pradajucca na kamisijnych placoŭkach, pa fakcie naležać ułaśnikam punkta abo pierahonščykam/pierakupam, ź jakimi placoŭka maje ciesny kantakt.
Tamu ciapier, kali jość mahčymaść pryvieźci jurydyčnaha ŭłaśnika aŭto na padpisańnie DKP u DAI ci da nataryusa, to pradaŭcom i pakupnikom vystupajuć fizičnyja asoby, dla jakich ničoha ŭ pytańniach raźlikaŭ nie źmianiłasia, i jany mohuć, jak i raniej, raźličycca najaŭnymi dalarami i ŭpisać rublovuju canu ŭ damovu.
U vyniku kamisijanier usio adno atrymlivaje ŭznaharodu za svaju pracu, ale ŭžo nie płacić z hetaha padatki, bo farmalna-jurydyčna da hetaj ździełki jon nie maje nijakaha dačynieńnia», — pryznajecca biznesoviec.
Biznesmien miarkuje, što bolš za aŭtakamisijonki ad novaŭviadzieńniaŭ pacierpić terminovy vykup aŭto. Mužčyna kaža, što słaba sabie ŭjaŭlaje situacyju, kali čałaviek, jakomu treba terminova pradać aŭtamabil, budzie adkryvać rachunak u banku i čakać, kali vykup pieraličyć jamu biełaruskija rubli za aŭto.
Ci atrymajecca vykaranić nielehalnych pierakupaŭ?
Vyhladaje, što nie. Pierakupščyk, ź jakim parazmaŭlała «Naša Niva», pryznajecca, što biez rachunkaŭ-daviedak pierapradavać aŭtamabili stanie składaniej, ale jahony biznes heta nie spynić.
«I raniej niekatoryja pradaŭcy aŭto admaŭlalisia pradavać mašyny biez DKP, tamu davodziłasia šukać «viešałku», kab pieraaformić mašynu. Zaraz heta daviadziecca rabić va ŭsich vypadkach».
Mužčyna ŭpeŭnieny, što isnuje dastatkova ludziej, jakija za 100 dalaraŭ buduć hatovyja aformić na siabie aŭtamabil.
Jak buduć haniać aŭto ź Jeŭropy i ZŠA?
Novaŭviadzieńni ŭskładnili pracu i tym, chto śpiecyjalizavaŭsia na pryhonie aŭto ź Jeŭropy i ZŠA, bo pradaŭcy pakidali ich na prodaž u aŭtakamisijonki.
Pierahonščyk kaža, što ciapier treba budzie bolš pilna padbirać «viešałak» siarod ilhotnikaŭ, kab možna było damovicca ź imi, što pry prodažy aŭto treba budzie padjechać da nataryusa, kab pastavić svoj podpis.
«Kali takich znajści nie atrymajecca, to možna vypisać davieranaść na treciuju asobu, jakaja za nievialikaje ŭznaharodžańnie padjedzie ŭ patrebny dzień u DAI ci da nataryusa, kab pieraaformić aŭto na novaha ŭłaśnika. Vyhladaje, što chutka źjavicca novy termin «viešałka dla davieranaści», — kaža jon.
Mužčyna nie bačyć katastrofy ŭ novaŭviadzieńniach, choć i pryznajecca, što novyja praviły ŭskładniajuć pracu i prynosiać dadatkovyja vydatki.
«Kali havorka idzie pra aŭto koštam ad 20 tysiač dalaraŭ, to, na maju dumku, mnohim budzie praściej i tańniej «pahulacca» z davieranaściami, kab pakupnik i pradaviec byli fizičnymi asobami, čym pravodzić ździełku praz bank», — upeŭnieny pierahonščyk.
Čytajcie taksama:
Zapuścili bazu danych užyvanych mašyn
Letaś fizasoby impartavali ŭ 2,4 raza bolš mašyn, čym hod tamu. Jakija aŭto čaściej vieźli ź Jeŭropy i ZŠA?
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana10
Kamientary
Kohda užie žurnalisty, politiki i publičnyje ludi načnut vnačale dumať nie o chajpie, a o pośledstvijach dla okružajuŝich. Naučitieś nakoniec byť OTVIETSTVIENNYMI!