Другія суткі камунальнікі «адмываюць» мемарыял Тарайкоўскаму. Навошта гэта можа рабіцца?
Другія суткі мінчукі звяртаюць увагу, як шмат камунальнікаў сагналі да станцыі метро «Пушкінская». Праца не спыняецца ні днём, ні ўначы.
Людзі ў спецадзенні робяць выгляд, што з дапамогай некалькіх адзінак тэхнікі адмываюць даўно зафарбаваны надпіс «Не забудзем». За яго нанясенне ў Мінску цяпер судзяць пяць чалавек адразу ў двух судах: Юлія Крэпская судзіць Дзяніса Грэханава, Ігара Самусенка і Уладзіслава Гуліса, а Юлія Блізнюк судзіць Марыю Бабовіч і Максіма Паўлюшчыка.
Усім гэтым абвінавачаным інкрымінуюць ч. 2 артыкула 339 (Хуліганства), а таксама ч. 2. артыкула 218 (Наўмыснае знішчэнне або пашкоджанне маёмасці).
Але вось што адбываецца ў судах. Калі першапачаткова абвінавачанне называла памер «шкоды» 10 182 рублі ў першым выпадку і каля 7500 рублёў у другім, то пасля разлікаў «Гаррэмаўтадора» у судзе прагучалі зусім іншыя сумы — 256 і 211 рублёў адпаведна. Гэта рэальны кошт работ за аднаўленне пліткі.
Але такая сума не дазваляе абвінаваціць людзей па 218-м артыкуле КК (наўмыснае знішчэнне або пашкоджанне маёмасці), бо гэты артыкул прымяняецца ў выпадках, калі шкода перавышае 40 базавых велічынь (1080 рублёў).
Калі адкінуць гэты артыкул, у абвінавачання застанецца толькі «Хуліганства».
Таму адна з версій — што зацікаўленыя спрабуюць давесці памер «шкоды» і «цаны аднаўлення» калі не да першапачаткова заяўленага, то хаця б да тых самых 40 базавых велічынь. Для таго і нагналі столькі тэхнікі і людзей на пустое месца.
Ці магчыма далучэнне новых налічаных сумаў «шкоды» да справы, якая ўжо разглядаецца ў судзе? Юрысты кажуць, што рашэнне мусіць прыняць суддзя.
Адвакаты Гуліса, Грэханава і Самусенкі ўжо хадатайнічалі, каб падазраваных адпусцілі з ізалятары дахаты, бо ў іх дзеяннях няма складу злачынства па 218-м артыкуле. Аднак пракурор Валерыя Таратынка, як піша Тut.by, выступіла супраць, бо яна «не лічыць новы разлік ад «Гаррэмаўтадара» (на 250 рублёў — «НН») бясспрэчным доказам».
«Наша Ніва» спрабуе атрымаць ад «Гаррэмаўтадара» адказ на пытанне, якія працы на Пушкінскай ідуць другі дзень запар.
«А што ў вас за праблемы? Далёка да Мінска ці некаму падвезці?» Публічная пікіроўка Лукашэнкі і Пашыняна7
Каментары