Як заявіў у эфіры ўкраінскага тэлебачання дарадца мэра Марыупаля Пятро Андрушчанка, акупацыйныя расійскія ўлады горада ўводзяць у ім каранцін з-за небяспекі пачатку эпідэміі халеры, перадае BBC News.
«Мы назіраем, як горад зачыняецца. Акрамя таго, пачала паступаць інфармацыя, што расійскі бок у Растове-на-Доне падрыхтаваў ужо асобныя інфекцыйныя аддзяленні, дзе яны рыхтуюцца прымаць уласных вайскоўцаў, якія могуць захварэць праз эпідэмію, і слова «халера» гучыць унутры горада, сярод акупацыйных уладаў і іх куратараў», — сказаў ён.
На думку палітыка, самы цынічны варыянт барацьбы з эпідэміяй — проста закрыць горад. Ён дадаў, што сітуацыя ў горадзе з кожным днём усё больш пагаршаецца: жыхары горада атрымліваюць чыстую пітную ваду раз у два дні, ёсць праблемы з харчаваннем. З-за адсутнасці водазабеспячэння ў горадзе ёсць небяспека ўспышкі інфекцыйных захворванняў. Расійскі бок сітуацыю не каментуе.
Андрушчанка ж прыводзіць іншыя падрабязнасці цяперашняга жыцця ў горадзе:
«Для атрымання пітной вады зараз трэба запісацца ў чаргу. Чарга ад двух дзён. Гэта значыць зараз пітная вада ў лепшым выпадку раз у два дні. Асноўная прычына — падзенне ўзроўню вады ў прыродных крыніцах. Прагназуюць далейшае скарачэнне паставак вады па натуральных прычынах — летняя спёка».
Таксама дарадца мэра Марыупаля паведаміў, што гуманітарная дапамога ад акупацыйных уладаў ужо скарочаная. Цяпер яе выдаюць толькі людзям пенсійага ўзросту.
«Усім іншым — выключна праз «працу». Практыка ежа за працу аднавілася. Моладзь прымушаюць запісвацца ў «дружыны» і дапамагаць мабільным патрулям, у тым ліку ў фільтрацыйных мерапрыемствах. За адмову пагражаюць мабілізацыяй у войска «ДНР». Марыупаль мэтанакіравана і планамерна ператвараюць у гета для ўкраінцаў», — падкрэсліў Андрушчанка.
Акаўнт Кабанчука ўзламалі — але ці беларускія спецслужбы?11
Каментары