Высветлілася, што «Байсола» таксама два. Стрыжак патлумачыў, чаму і калі гэта адбылося 

Ад імя «Байсол» раней працавалі дзве юрыдычныя асобы — у Нідэрландах і Літве. Андрэй Стрыжак тлумачыць, што адкрыць юрасобу ў Нідэрландах было прасцей і хутчэй. Таму першапачаткова фонд запрацаваў пад юрысдыкцыяй гэтай краіны.

«Першая юрыдычная асоба была зарэгістраваная вельмі хутка — адразу пасля пачатку працы ў жніўні 2020. Галандскае заканадаўства найбольш пасавала для хуткага адкрыцця арганізацыі. Другая юрыдычная асоба, якую адкрылі ўжо ў Літве, запрацавала бліжэй да снежня 2020 года», — кажа Андрэй Стрыжак.

З'яўленне другой арганізацыі Стрыжак тлумачыць тым, што амаль уся каманда знаходзілася на той момант у Літве.

Праз год пасля выбараў, у жніўні 2021 года, у арганізацыі адбыўся раскол. Андрэй Стрыжак застаўся кіраўніком літоўскага крыла «Байсол» (LPF Bysol), а нідэрландская частка фонду цяпер пад кіраўніцтвам сузаснавальніка «Байсол» Яраслава Ліхачэўскага.

Раскол у арганізацыі, які адбыўся амаль два гады таму, Стрыжак тлумачыць так:

«Рознасць поглядаў у развіцці арганізацыі і немагчымасць іх спалучэння ў адной структуры прывялі да таго, што было прынята сумеснае рашэнне пра тое, што Яраслаў пойдзе ў асобную структуру. У выніку ў літоўскай арганізацыі засталіся я і каманда фонду, мы працягнулі будаваць «Байсол», у галандскай Яраслаў пачаў будаваць свой асобны працоўны трэк», — тлумачыць Стрыжак.

Па ягоных словах, усё, што цяпер ёсць у інфаполі пад імем «Байсол», — гэта праца літоўскай арганізацыі пад ягоным кіраўніцтвам.

Фонд, якім кіруе Яраслаў Ліхачэўскі, мае назву Stichting Belarusian Solidarity Foundation. Сайт фонду — sbsf.fund. Да працы гэтай юрыдычнай асобы Стрыжак, па яго словах, не мае дачынення са жніўня 2021-га, як і Ліхачэўскі — да працы LPF Bysol.

Кіраўнік «Байсол» кажа, што раней яны не афішавалі факт адыходу Яраслава, бо ён ніяк не ўплываў на іх праграмы і выкананне абавязкаў перад заяўнікамі. Таксама, па словах Стрыжака, падзел і адыход Ліхачэўскага ў асобную арганізацыю не ўплываў на працу з партнёрамі і донарамі.

«Разумеючы тое, што любая навіна такога кшталту, як адыход, перафармаванне і г. д., аўтаматычна ўспрымаецца часткай грамадства як падстава для срачу, было прынятае рашэнне не даваць чарговай нагоды для шытсторму», — кажа Андрэй Стрыжак.

«Сайт bysol.org і данат праз яго — гэта данат у арганізацыю пад маім кіраўніцтвам.

На сёння такі данат магчымы з банкаўскай карты, у тым ліку з выкарыстаннем тэхналогій Google Pay і Apple Pay, а таксама праз PayPal. На падыходзе магчымасць зручнага і больш бяспечнага данату праз крыптавалюты, бо пераслед нашых донараў мінскім рэжымам моцна скарачае магчымасці ахвяраванняў нам з Беларусі. І мы ўвесь час падкрэсліваем небяспеку пры данаце праз «Байсол» з беларускіх і расійскіх плацежных інструментаў», — кажа Стрыжак.

«Байсол» цяпер працуе па наступных кірунках:

— персанальныя зборы;

— падтрымка палітвязняў і былых палітвязняў;

— падтрымка лакальных ініцыятыў;

— падтрымка беларускіх добраахвотнікаў і ветэранаў;

— служба эвакуацыі і адаптацыі.

«Працу гэтых кірункаў забяспечваюць дапаможныя групы і аддзелы: IT-аддзел, юрыдычная, бухгалтарская, адміністратыўная, камунікацыйная групы і гарачая лінія», — кажа кіраўнік «Байсол».

А што, калі камусьці ў фэйсбуку трапіцца старая спасылка на збор ад імя нідэрландскай юрасобы, калі тая яшчэ была ў складзе «Байсол», і чалавек туды пералічыць грошы? Што будзе са сродкамі — іх прымуць, на што скіруюць? І ці перададзеная на дапамогу пацярпелым сума, сабраная нідэрландскай арганізацыяй раней?

Стрыжак заўважае, што не ведае, якім чынам цяпер працуе Stichting Belarusian Solidarity Foundation, бо ён не мае да яго дачынення.

Яраслаў Ліхачэўскі на запыт «Нашай Ніве» па каментары не адказаў.

Што тычыцца непасрэдна LPF Bysol, то ад яго імя выступаць мае права Андрэй Стрыжак, а таксама асобы, якія маюць паўнамоцтвы на афіцыйную камунікацыю ад імя фонду.

«Яраслаў Ліхачэўскі ў пералік гэтых асоб не ўваходзіць, але, безумоўна, можа адказваць на пытанні, якія датычныя ягонага быцця ў складзе фонду «Байсол» (да жніўня 2021 года)», — падкрэслівае Стрыжак.

• 14
• 10
• 22
• 3
• 1
• 8