«Самы вялікі данат — 10 тысяч еўра». Рэдактар Reform.by Фёдар Паўлючэнка расказаў пра сабраныя за дзень грошы
За першы дзень праект Reform.by падтрымалі данатамі 260 чалавек. Сума найвялікшага з іх — 10 тысяч еўра. Пра гэта расказаў «Нашай Ніве» галоўны рэдактар выдання Фёдар Паўлючэнка.
Фёдар Паўлючэнка не стаў называць агульную суму атрыманай дапамогі, але адзначыў, што яна дазволіць выданню пратрымацца «нейкі час». Журналіст не чакаў, што яго зварот атрымае шырокі водгук.
Пра праблемы з фінансаваннем Reform.by Паўлючэнка паведаміў 21 снежня. Асноўны інстытуцыйны донар адмовіў выданню ў падтрымцы без тлумачэння прычын.
«Мне няёмка прасіць людзей дапамагаць нам, бо ёсць больш значныя праблемы: сем’і палітзняволеных, полк Каліноўскага і шмат іншых», — тлумачыць сітуацыю журналіст.
На яго погляд, вырашыць праблемы з Reform.by і іншымі беларускімі медыямі, немагчыма праз данаты. Гэта павінна быць інстытуцыянальная падтрымка. Найперш гэта тычыцца Еўрасаюза і ЗША.
Фёдар Паўлючэнка кажа, што Reform.by ніколі не меў доўгатэрміновай і стабільнай падтрымкі і разлічваў на ўласныя сродкі.
Калі ж выданне вымушана было з'ехаць з Беларусі, то працавала за так званыя праектныя сродкі. Іх выдаткоўвалі на канкрэтны праект. А пасля яго заканчэння трэба было шукаць іншага спонсара.
«Мы ведалі, што трэба звяртацца да інстытуцыянальных донараў у Еўрасаюзе. Мы звярнуліся і атрымлівалі адказы, што трэба пачакаць — і вось дачакаліся адмовы», — даводзіць журналіст.
Паводле яго, цяпер рэдакцыя на сувязі з еўрачыноўнікамі і офісам Святланы Ціханоўскай.
«Калі нам удасца прабіць дзірку, праз якую зможам атрымаць дапамогу, то гэта дапаможа не толькі нашай рэдакцыі, але і іншым беларускім медыя. Мы знойдзем шляхі, каб растлумачыць, чаму падтрымка беларускіх медыя — важная катэгорыя для донараў», — запэўнівае ён.
На яго погляд, донары і заходнія партнёры не бачаць розніцы паміж блогерствам, медыя, журналістыкай. Калі такая сітуацыя працягнецца, то з такой самай праблемай, як у Reform.by, сутыкнуцца іншыя медыя. На іх працу не будзе грошай.
Фёдар Паўлючэнка перакананы, што без інстытуцыянальнай падтрымкі захаваць беларускую журналістыку будзе не магчыма.
«Гэта вялікая праблема, бо прафесійная журналістыка — гэта як паветра. Калі яна ёсць, то яе ніхто не заўважае, але ўсе карыстаюцца яе прадуктам», — заўважае ён.
Па яго словах, цяпер у Еўрасаюзе ўтварыўся кансенсус, што беларускія і расійскія медыя павінны аб’ядноўвацца, працаваць разам. Паміж Расіяй і Беларуссю не робіцца розніцы.
«Расійскія медыя, якія вымушаныя былі зʼехаць за мяжу, у прыярытэце, а беларускія застаюцца па-за працэсам. Гэта памылка з боку еўрапейскіх палітыкаў. Беларускія медыя павінны быць адасобленыя ад расійскіх, іх ні ў якім разе нельга аб’ядноўваць з расійскімі кейсамі», — лічыць галоўны рэдактар Reform.by.
На яго зварот звярнулі ўвагу не толькі чытачы і калегі, але і прапагандысты. Адным з першым адрэагаваў тэлеграм-канал, блізкі да губазіка.
«Безумоўна, іх цешыла наша праблема, але гэта сведчыць, што яны таксама сочаць за намі, чытаюць інфармацыю Reform.by. Мяне гэта задаволіла», — адзначае Фёдар Паўлючэнка.
Reform.by як паўнавартаснае медыя было створанае ў жніўні 2018 года. Яго ініцыявалі трое журналістаў — Аляксей Жукаў, Аляксандр Атрошчанкаў і Фёдар Паўлючэнка.
У жніўні 2021 года Мінінфарм заблакаваў дамен для беларускіх карыстальнікаў. Пасля пачатку вайны блакіроўку пачалі і расійскія цэнзары. Сайт выкінулі з расійскіх агрэгатараў навін і заблакавалі ў Расіі.
Сёлета ў красавіку суполку сайта Reform.by ў «Аднакласніках» абвясцілі «экстрэмісцкай».
Дапамагчы данатамі Reform.by можна тут.
«Наша Нiва» — бастыён беларушчыны
ПАДТРЫМАЦЬГлядзіце таксама:
У Беларусі прызналі «экстрэмісцкай» чарговую кнігу
У Расіі стварылі «Таварыша маёра» для выяўлення адміністратараў тэлеграм-каналаў
«Яму па начах сніліся людзі, якіх ён пасадзіў». Сталі вядомыя новыя дэталі апошніх дзён жыцця сына Ярмошынай15
Каментары