Праваслаўны актывіст патрабуе не дапусціць правядзення ў Мінску квір-фестывалю на Вялікдзень
6-8 красавіка ў Мінску мае прайсці «IV міжнародны фестываль квір-гісторыі Dotyk. Зрабі крок!». Доктара з Магілёва Мікалая Лайшу, праваслаўнага актывіста, абурыла тое, што гэтая імпрэза ЛГБТ-супольнасці запланаваная на дні праваслаўнага Вялікадня.
«Яго пачатак запланаваны на Вялікую Пятніцу — дзень укрыжавання Хрыста, — адзначае доктар Лайша. — На Вялікую Суботу на 23.00 запланавана гей-вечарына. Праваслаўны актывіст абураецца: «Разбагацелі (за кошт грантаў з Еўрасадома). Знахабнелі».
Мікалай Лайша — вядомы ў Магілёве праваслаўны псіхатэрапеўт. Менавіта так яго прадстаўляюць у газеце «Вечерній Могілёв», дзе ён публікаваўся ў тым ліку з артыкулам «Хэлаўін робіць вас халуямі Захаду і д'ябла».
На сайце квір-фестывалю гаворыцца, што «місія Dotyk — набліжэнне нашага грамадства да талерантнасці і прыняцця». Як адзначаецца, «асноўнай падзеяй стане адкрытая канферэнцыя, прысвечаная квір-гісторыі і ненарматыўнай ідэнтычнасці на постсавецкай прасторы з удзелам спікера_к з Беларусі, Расіі, Вялікабрытаніі, Латвіі, Францыі і Эстоніі».
«Мы хочам паглыбіцца ў квір- і ЛГБТ+ гісторыю былога СССР, каб зрабіць з яе высновы аб сучаснасці, — адзначаецца на сайце. — Выступы даследчы_ц з розных краін Еўропы распавядуць аб жыцці звычайна_й прадстаўні_цы ЛГБТ+ супольнасці ў СССР, пра цяжкасці захавання квір-гісторыі, аб бачнасці ЛГБТ+ супольнасці ў публічнай прасторы».
Асноўнай пляцоўкай фестывалю стане прастора Сталоўка XYZ. Уваход на ўсе мерапрыемствы фестывалю, акрамя вечарынкі, будзе вольным, але 18+.
На думку доктара Лайшы, правядзенне такога мерапрыемства на Вялікдзень — такі ж грэх, як фестываль піва на Тройцу ў 1999 годзе, які скончыўся цісканінай на Нямізе.
«Канчатковай мэтай усякай бязбожнасці з'яўляецца наклікаць гнеў Божы на людзей і загубіць іх разам з сабой», — піша Лайша.
«Мы, праваслаўныя хрысціяне, расцэньваем гэты ўчынак як дзёрзкі выклік Праваслаўнай Царкве, як блюзнерства і распальванне рэлігійнай варожасці», — кажа ён.
Мы патэлефанавалі ў прыёмную Беларускай праваслаўнай царквы, каб высветліць, што там думаюць наконт гэтай сітуацыі. У афіцыйнага прэс-сакратара быў выходны дзень, але адказаць на нашы пытанні пагадзіўся дзяжурны Мінскага епархіяльнага ўпраўлення.
«Я не лічу, што тое, што робяць арганізатары — грэх. Але я не зусім разумею, навошта трэба праводзіць нейкія іншыя мерапрыемствы падчас Вялікадня. Мы жывём практычна ў праваслаўнай краіне. Не ведаць рэлігійныя святы — гэта як мінімум дзіўна. Калі вы плануеце нейкае мерапрыемства, то трэба загадзя прадумаць даты. Я на баку чалавека, які за тое, каб 8 красавіка святкаваць Вялікдзень. Для іншых падзей ёсць яшчэ 364 дні ў годзе», — пракаментаваў «НН» Сяргей Бландзінаў.
Што тычыцца арганізатараў фестывалю, то, па словах яго піяр-менеджаркі Ганны Брэдавай, супадзенне дат правядзення з Вялікаднём не наўмыснае, праца над «Дотыкам» вялася яшчэ з восені.
«Мы лічым, што ў кожнага ёсць права выбіраць, чым займацца на выходных. Хто хоча ісці ў царкву, ідзе ў царкву, хто хоча ісці да нас, пойдзе да нас, хто хоча пасля царквы да нас, таксама сардэчна запрашаем. Не думаю, што наш фестываль — адзінае нерэлігійнае мерапрыемства, запланаванае на гэтыя выходныя»,— патлумачыла «Нашай Ніве» Ганна.
Каментары