Суравікін «у адным месцы, але не ў турме». Што пішуць пра лёс расійскага генерала
Супярэчлівая інфармацыя распаўсюджваецца наконт расійскага генерала Сяргея Суравікіна.
Учора выданне The Moscow Times са спасылкаю на дзве свае крыніцы, блізкія да апарату Мінабароны, паведаміла, што намеснік камандуючага Аб'яднанай групоўкай расійскіх войскаў ва Украіне генерал Сяргей Суравікін арыштаваны. Адна з крыніц выдання сцвярджала, што арышт звязаны з мяцяжом Прыгожына.
Раней выданне The New York Times паведамляла са спасылкай на чыноўнікаў ЗША, знаёмых з разведданымі, што Суравікін нібыта загадзя ведаў пра планы Яўгена Прыгожына пачаць узброены мяцеж супраць вайсковага кіраўніцтва Расіі. Але гэта інфармацыя так і засталася непацверджанай.
Сёння выданне The Financial Times са спасылкай на свае крыніцы напісала, што Суравікін затрыманы.
FT дадало, што застаецца незразумелым, ці звязана гэта з абвінавачаннем генерала ва ўдзеле ў мяцяжы Яўгена Прыгожына або яго затрымлівалі для допыту.
А вось дачка Суравікіна Вераніка паведаміла «Базе», што з бацькам «нічога не адбылося», ён знаходзіцца на сваім працоўным месцы. Але сказала яна пра гэта не надта ўпэўнена.
Жонка Суравікіна адмовілася каментаваць паведамленні пра арышт мужа.
Прэс-сакратар Крамля Дзмітрый Пяскоў таксама адмовіўся ад каментароў і параіў звярнуцца з пытаннем у Міністэрства абароны.
Выданне «Важные истории», у сваю чаргу, напісала, што Суравікін не затрыманы.
Як заявілі суразмоўцы выдання, блізкія да Генштаба і ФСБ, генерала дапыталі, а затым адпусцілі.
Паводле інфармацыі агенцтва Bloomberg, Суравікіна на працягу некалькіх дзён дапытвалі вайсковыя пракуроры аб яго сувязях з кіраўніком ПВК «Вагнер» Яўгенам Прыгожыным. Са слоў суразмоўцы агенцтва, генерал «утрымліваецца ў адным месцы, але не ў турме».
Афіцыйных каментароў наконт лёсу Суравікіна не было.
Сяргея Суравікіна прызначылі камандуючым расійскімі войскамі ва Украіне ў кастрычніку 2022 года. У студзені 2023 яго знялі. Камандуючым так званай Аб’яднанай групоўкай войскаў быў прызначаны начальнік Генштаба генерал арміі Валерый Герасімаў. Суравікін стаў намеснікам Герасімава.
Падчас мяцяжу Прыгожына Суравікін выступіў з відэапаведамленнем, у якім заклікаў вагнераўцаў спыніцца.
Брат удавы Зельцара: Кадэбісты ішлі ў кватэру па мяне1
Каментары