Праблема ўзнікла з-за платных курсаў, якія давядзецца прайсці кіроўцам. А яны каштуюць немалыя грошы.
Указ «Аб аўтамабільных перавозках пасажыраў» абавязаў таксістаў праходзіць перападрыхтоўку. Для таго каб трапіць у рэестр легальных перавозчыкаў. Перавозчыкі гэтаму не вельмі рады. Навучанне на новых курсах каштуе амаль 500 рублёў і доўжыцца цэлыя два тыдні. Журналіст Tochka.by разбіраўся ў пытанні.
Працоўныя будні
У рэдакцыю патэлефанаваў таксіст Мікалай са Слуцка, размова атрымалася эмацыйная. «Я ўжо прайшоў навучанне для кіроўцаў аўтамабіляў таксі. А цяпер нас яшчэ і абавязваюць павышаць кваліфікацыю. Курсы ў такім выглядзе і па такой цане мяне не задавальняюць», — пачаў таксіст.
Праходзіць павышэнне кваліфікацыі трэба тым, хто працуе ў таксі больш за пяць гадоў. Такое патрабаванне дзейнічае яшчэ з 2008 года. Раней за ім сачылі не строга, толькі выдавалі прадпісанні пры праверках.
Цяпер жа Мінтранс падышоў да пытання больш сур'ёзна. Хто не павысіць кваліфікацыю — той не патрапіць у рэестр легальных перавозчыкаў. Часу адвялі да 1 жніўня 2024 года.
Зноў у школу
Аўташкола «Аўтаправа» адна з нямногіх у Мінску, якая выдае сертыфікаты павышэння кваліфікацыі кіроўцаў таксі. Дырэктар аўташколы Юрый Берташ перападрыхтаваў з пачатку года ўжо пяць груп па 20 чалавек.
Кошт навучання — Br450, а з 1 жніўня вырасце да Br500. Такая цана фармуецца зыходзячы з выдаткаў на заробак інструктара і арэнду аўтадрома.
«Для правінцыі цана курсаў завоблачная», — кажа Мікалай.
Ён таксуе па 12 гадзін і атрымлівае чысты заробак у дзень каля 40 рублёў.
Прычым курсы працяглыя — два тыдні. Кожны дзень ідуць заняткі. Мала таго што гэтыя дні атрымліваюцца без заробку, дык яшчэ і траты на дарогу або пражыванне.
Праграма курсаў — 55 гадзін. З іх 16 гадзін — медыцынская падрыхтоўка, 1 гадзіну — веды ПДР, асновы кіравання — 7 гадзін.
Практыка паказвае, што многія таксісты не ведаюць, як правільна перахопліваць руль або выканаць так званы «ласіны» тэст — рэзкі манеўр. Адпрацоўваюць на курсах і эфектыўнае перарывістае тармажэнне. Усё на асабістых машынах — так больш звыкла.
Астатні час — на аўтадроме: заезд у бокс з двух бакоў, разгон і спыненне перад слупкамі, «змейкі», язда па слізкім пакрыцці, якое папярэдне заліваюць вадой.
Сітуацыю растлумачылі ў Мінтрансе:
«Рэестр аўтамабільных перавозак пасажыраў у нерэгулярных зносінах ствараецца ў рамках указа Лукашэнкі №32 «Аб аўтамабільных перавозках пасажыра « і пачне працу з 1 жніўня 2024 года. Тычыцца ён у тым ліку таксістаў. Электронны рэсурс аб'яднае перавозчыкаў розных формаў уласнасці і акумулюе інфармацыю аб усіх дыспетчара, кіроўцах і машынах. Такія меры прыняты для забеспячэння высокага ўзроўню бяспекі і якасці паслуг, стварэння ўмоў для добрасумленнай канкурэнцыі на рынку».
У краіне дзейнічаюць 10 навучальных арганізацый (яны ёсць у кожнай вобласці), якія сертыфікаваны праводзіць павышэнне кваліфікацыі вадзіцеляў катэгорыі B. У праграме навучання акцэнт зроблены перш за ўсё на забеспячэнне бяспекі дарожнага руху, гэта значыць на практыку кіравання і ўмацаванне тэарэтычных ведаў ПДР.
Успомніць усё
Мікалай усё роўна перакананы, што на курсах не даведаецца нічога новага для сябе.
«Новыя курсы правяраюць тое, што і так ужо ўмею. У гараж я магу заехаць хоць з заплюшчанымі вачыма», — працягвае ён.
Прэтэнзіі таксіста зразумець можна. Давядзецца ездзіць у сталіцу два тыдні ці жыць там. Плюс курсы грошай каштуюць.
«Тэорыю далёка не ўсе з таксістаў адразу здаюць. І нямногія з першага разу дакладна ў бокс заязджаюць. Таму курсы перападрыхтоўкі вызначана патрэбныя», — парыруе Юрый Берташ.
Меркаванні падзяліліся, але спрачацца няма пра што. Па словах Мікалая, дырэктар яго таксапарку ўжо сабраў работнікаў у камандзіроўку. Патрабаванне абавязковае — дзявацца няма куды.
Вялікая гутарка з Алінай Коўшык — пра інтэрв’ю з Падсасонным, скандал з Кулеем і рэформы на «Белсаце»23
Каментары
Штоо?? Як гэта можа быць? Чаму тады для пасажыраў паездка каштуе не 1 рубель? Можа вы хацелі напісаць "400"? Нешта прыбядняецца гэты таксісіт.