Расійская глыбінка: жанчыне далі 13 гадоў за падпал ваенкамата. Два яе сыны сядзяць, трэці на вайне, чацвёрты ў прытулку

Аўтары высветлілі, што Кацярына паходзіць з сям'і, дзе было шасцёра дзяцей. Пасля васьмі класаў школы яна паступіла ў ПТВ і атрымала спецыяльнасці кухаркі. Рана выйшла замуж, у 18 гадоў нарадзіла першага сына Дзмітрыя. У хуткім часе муж яе кінуў.

Жанчына выйшла другі раз замуж і пераехала разам з мужам у пасёлак Бурапалом у Ніжагародскай вобласці. У пасёлку трохі больш за тры тысячы жыхароў. Асноўнымі месцамі працы з'яўляюцца чыгунка і калонія, якая знаходзіцца побач.

Пасля пераезду Кацярына нарадзіла другога сына Мікіту, а праз некалькі гадоў развялася з мужам. Трэцім яе мужам стаў адзін з мужчын, што адбыў пакаранне ў калоніі. Ён быў на 15 гадоў за яе старэйшым. У пары нарадзілася яшчэ два сыны — Максім і Ігар.

Павялічыць

У 2020 годзе трэці муж памёр (у яго былі праблемы з сэрцам), і Кацярына засталася адна з двума непаўналетнімі сынамі. Незадоўга да сваёй смерці муж атрымаў ордар на новую кватэру, куды сям'я пасля судовых цяжбаў (мясцовая адміністрацыя лічыла, што ні ўдава, ні дзеці не маюць права на кватэру) перасялілася з бараку.

Мясцовыя жыхары расказалі, што Кацярына злоўжывала алкаголем, але калі ўлады забралі яе малодшага сына, закадзіравалася. Пры гэтым яна афіцыйна нідзе не працавала, жыла на сродкі ад пенсіі, што прызначылі ўлады пасля смерці мужа. Таксама грошы дасылаў другі сын жанчыны — Мікіта. Ён скончыў Разанскае ваенна-каманднае вучылішча і з лютага 2022 года ваюе ва Украіне. Як высветлілі журналісты, мужчына прымаў удзел у баявых дзеяннях у Бучы і Гастомелі.

Павялічыць

Па словах сына Кацярыны Максіма, яго маці падманулі махляры. Для пагашэння доўгу Кацярыну прымусілі ўзяць крэдыты і перавесці грошы на пэўны рахунак. Пазней высветлілася, што ён быў украінскім.

Пасля гэтага махляры сталі шантажыраваць жанчыну, што паведамяць у праваахоўныя органы аб яе пераводзе і яна патрапіць за краты, а яе трэцяга сына Максіма забяруць на вайну.

Каб гэтага не адбылося, чалавек, які ёй званіў і прадставіўся супрацоўнікам ФСБ, прапанаваў кінуць кактэйль Молатава ў будынак мясцовага ваенкамата і запісаць гэты акт на відэа. Падпал, па яго словах, дапаможа выявіць здраднікаў у шэрагах работнікаў ваенкамата, а яе пасля афіцыйнага допыту адпусцяць дахаты і забудуць пра перавод грошай.

Жанчына зрабіла гэта разам з сынам Максімам, які не захацеў яе адпускаць адну, 15 лістапада 2023 года.

Іх затрымалі адразу на месце злачынства. Па словах сведак, Кацярына ўмольвала паліцэйскіх звярнуць увагу на трансляцыю, якую яна вядзе для «супрацоўніка ФСБ», і спрабавала даць ім зразумець, што ўсё адбываецца пад кантролем спецслужбаў.

У ліпені 2024 года па справе аб тэракце суд прысудзіў маці 13 гадоў калоніі, а сыну, які на момант здзяйснення злачынства быў непаўналетнім, 4,5 года калоніі.

У зняволенні знаходзіцца і старэйшы сын жанчыны Дзмітрый. Яшчэ ў 2016 годзе ён быў асуджаны на 14 гадоў за разбой і наўмыснае прычыненне цяжкіх цялесных пашкоджанняў, якія прывялі да смерці чалавека. З прысуду вынікае, што Дзмітрый разам з сябрам п'янымі ўварваліся ў кватэру да мясцовага жыхара, патрабавалі грошай, жорстка яго збілі за адмову і катавалі прасам.

Малодшаму сыну Кацярыны Бабаевай цяпер 8 гадоў, і ён знаходзіцца ў прытулку, у якім ужо калісьці быў, калі яго забіралі ад маці, якая піла. Нягледзячы на тое, што ў Кацярыны ёсць родныя браты і сёстры, ніхто з іх не захацеў забраць хлопчыка сабе. Яго чакае дзіцячы дом.

• 1
• 0
• 13
• 16
• 3
• 7
• 0
• 0