Hałoŭnyja miemy i hałoŭny danosčyk, nadziei i kanśpirałohija — asnoŭnyja ludzi i padziei 2022 hoda
2022-hi staŭ katastrafičnym hodam. Takich u kožnym stahodździ — na palcach adnoj ruki paličyć. Jak 1939-ty, jak 1914-ty. Vajna i represii prynieśli šmat bolu. Ale było miesca i hieraizmu, i paryvańniam. «Naša Niva» tradycyjna padvodzić vyniki.
Katastrafičny hod — vajna
24 lutaha my pračnulisia ŭ inšaj realnaści. Rasija napała na Ukrainu. Poŭnač Ukrainy rasijskija vojski atakavali ź biełaruskaj terytoryi. Pucin raźličvaŭ zachapić Kijeŭ za try dni, likvidavać dziaržaŭnaść Ukrainy i dalej pierajści da zachopu inšych dziaržaŭ. Ale blickryh pravaliŭsia.
U kancy sakavika rasijskaja armija pačała adstupleńnie z-pad Kijeva, Sumaŭ i Čarnihava. A ŭ vieraśni Ukraina, uzmocnienaja ŭzbrajeńniem z Zachadu, pierajšła ŭ aktyŭny kontrnastup. USU vyzvalili akupavanyja Izium, Bałakleju, Chierson i dziasiatki inšych nasielenych punktaŭ. «Žesty dobraj voli» i «pierahrupiroŭka vojsk» — tak rasijskaja prapahanda chłuśliva nazyvała adychod svajoj armii.
Heta vajna pakazała sapraŭdnaje abličča «ruskaha śvietu». Skradzienyja pralnyja mašyny, katavańni pałonnych, bambiožki haradoŭ.
Vajna pakazała mužnaść i kreatyŭnaść ukraincaŭ. Abaroncy «Azoŭstali» stali prykładam stojkaści, hałoŭnakamandujučy Valeryj Załužny i kiraŭnik Mikałajeŭskaj abłasnoj administracyi Vital Kim — prykładam pieradavych vajskoŭcaŭ i čynoŭnikaŭ na dziažsłužbie, a acalełaja kuchonnaja šafka ź pieŭnikam u Baradziancy — simvałam niazłomnaści naroda.
Mužnaść hoda — biełaruskija dobraachvotniki
Połk Kalinoŭskaha, połk «Pahonia», bataljon «Teror», bajcy Internacyjanalnaha bataljona i inšych złučeńniaŭ. Niekalki socień vajaroŭ ciapier zmahajucca za Ukrainu, a značyć i za niezaležnaść Biełarusi. Biełaruskija dobraachvotniki brali ŭdzieł u mnohich klučavych apieracyjach — abaronie Kijeva i «Azoŭstali», bajach pad Lisičanskam, vyzvaleńni Chiersona. Za ŭdzieł u apošniaj apieracyi bajec «Fił» atrymaŭ uznaharodu z ruk Uładzimira Zialenskaha — orden Bahdana Chmialnickaha III stupieni.
Pieramoha dastajecca darahim koštam. Dvoje vajaroŭ dahetul u pałonie, 17 zahinuli va Ukrainie. Pad Lisičanskam zahinuŭ Ivan «Brest» Marčuk, talenavity kamandzir, jaki byŭ dušoju pałka Kalinoŭskaha. Alaksieju «Turu» Skoblu, jaki ŭdzielničaŭ u abaronie Kijeva, paśmiarotna było prysvojena zvańnie Hieroja Ukrainy.
Honar hoda — Aleś Bialacki
Nobieleŭski łaŭreat-palitviazień — sumny simvał taho, što adbyvajecca ŭ krainie. Adnak navina pra premiju stała promieniem śvietu ŭ hetyja ciomnyja dni, jašče adnym dokazam taho, što naša maładaja Biełaruś zajmaje svoj pačesny pasad miž narodami.
60-hadovy Aleś Bialacki ź minułaha hoda znachodzicca ŭ źniavoleńni za svaju pravaabarončuju dziejnaść. Jon nie pieršy raz za kratami. Ułady ŭžo aryštoŭvali jaho na pačatku 2010-ch. Ale jon nie pakinuŭ spravy svajho žyćcia — pravaabarončaha centra «Viasna», jaki stvaryŭ u 1996-m i kiraŭnikom jakoha zastajecca dahetul.
Nobieleŭskuju premiju miru Bialacki atrymaŭ razam z pradstaŭnikami pravaabarončych arhanizacyj «Miemaryjał» z Rasii i «Centr hramadzianskich svabod» z Ukrainy.
Pravaabaronca hoda — Nasta Łojka
Niahledziačy na pieraśled pravaabaroncaŭ, Nasta Łojka zastavałasia ŭ Biełarusi.
«Ja baču šmat važnych rečaŭ, jakija jašče mahčyma rabić tut i ciažka za miažoj, — tłumačyła jana svajo rašeńnie ŭ adnym ź intervju. — Naprykład, ja nasiła pieradačy siabram i siabroŭkam u SIZA, tyja ž listy. Plus ja vałanciorka ŭ niekatorych arhanizacyjach, jakija jašče nie likvidavali. Ahułam ludzi ŭ SIZA/kałonijach/turmach mianie mocna trymajuć tut: važna było chadzić da ich na sudy, padtrymlivać ich rodnych».
Nastu zatrymali 28 kastryčnika — z taho času jana znachodzicca za kratami. Joj trojčy prysudzili pa 15 sutak nibyta za drobnaje chulihanstva. Prapahanda abvinavačvaje Łojku ŭ «špijanažy» — tak jana traktuje pravaabarončuju dziejnaść.
Skandał hoda — Taćciana Zareckaja
Paśpiachovaja startapierka i miljanierka — prezientavali jaje ŭ miedyja. Taćcianu Zareckuju zaprasili ŭ Abjadnany pierachodny kabiniet «ministram finansaŭ». Adnak praz dva miesiacy jana raptoŭna syšła, patłumačyŭšy heta pahrozami ŭ svoj adras. Ale, vierahodna, pryčyna ŭ inšym — u žurnalistaŭ uźnikli pytańni da jaje biznes-pośpiechaŭ i firmy Laava Tech.
U spravazdačnaści firmy nie fihurujuć miljony. Niama i śviedčańniaŭ taho, što navatarskija śviatłodyjodnyja lampy i prahramnaje zabieśpiačeńnie, jakija nibyta daduć skaračeńnie vydatkaŭ elektraenierhii da 75% i pry hetym palepšać uradžajnaść raślin u ciaplicach na 20%, nasamreč pradajucca.
Paśla hetaha skandału Kabiniet abviaściŭ, što novy «ministr finansaŭ», mahčyma, budzie niepubličnaj asobaj.
Pravał hoda — ČKB
«Čornaja kniha Biełarusi» — inicyjatyva pa deanonie siłavikoŭ, sudździaŭ i inšych dziaržsłužačych, datyčnych da represij. Niekalki miesiacaŭ u kamandzie prajekta pracavaŭ supracoŭnik HUBAZiKa Artur Hajko, jaki atrymaŭ dostup da infarmataraŭ. U niejki momant jon navat uznačaliŭ ČKB. Trapiŭ jon i ŭ čat «Infapojnta». I choć u niekatorych čalcoŭ kamandy ŭźnikali padazreńni, Hajko nie zvolnili. Toje, što heta ahient, kančatkova stała zrazumieła ŭ lipieni 2021 hoda.
Adnak publična ŭsie padrabiaznaści historyi ŭspłyli tolki vosieńniu 2022 hoda. Pa abvinavačańni ŭ pieradavańni danych ČKB zatrymali niekalki dziasiatkaŭ čałaviek. Siarod ich — byłaja rabotnica prakuratury Natalla Łašč, supracoŭnica słužby «Adno akno» Śviatłana Byčkoŭskaja, načalnik adździeła markietynhu Life (imia jaho nie paviedamlałasia).
Telehram-kanał hoda — «Biełaruski Hajun»
Prajekt byŭ stvorany błohieram Antonam Matolkam 20 lutaha. Nazva «hajun» aznačaje lasny duch. Kanał zapuścili dla manitorynhu vajskovaj aktyŭnaści — pierasoŭvańnia techniki, vyletu samalotaŭ, zapusku rakiet. Infarmacyju i fota ź videa pieradajuć ludzi ź miescaŭ.
Za hety čas aŭdytoryja prajekta vyrasła da 548 tysiač padpisantaŭ. «Hajun» staŭ važnaj krynicaj dla razumieńnia taho, što adbyvajecca na terytoryi Biełarusi. A taksama mietadam supracivu vajnie.
Šok hoda — Buča
Kadry źvierstvaŭ rasijskich sałdat u Bučy ŭskałychnuli śviet. Kali ŭkrainskaja armija i palicyja ŭvajšli ŭ horad, jaki miesiac pravioŭ pad rasijskaj akupacyjaj, to byli ŭ žachu ad maštabaŭ razbureńniaŭ i zabojstvaŭ. U brackaj mahile było pachavana 280 čałaviek, mnohich pachavali na panadvorkach, šmat trupaŭ zastavałasia na vulicach. Rasstralanyja žychary lažali prosta na darozie.
Takija strašnyja ślady akupanty pakinuli i ŭ inšych miastečkach Kijeŭščyny. U siale Matyžyn Makaraŭskaha rajona rasstralali starastu siała i jaje syna. Jaje zabitaha muža sa śladami katavańniaŭ znajšli ŭ kałodziežy.
Žurnalisty NYT zmahli identyfikavać dziasiatki rasijskich vajskoŭcaŭ, jakija zabivali mirnych ludziej u Bučy — havorka idzie pra bajcoŭ 234-ha desantna-šturmavoha pałka z Pskova.
Samy vialiki palityčny prysud — Mikałaj Aŭtuchovič
25 hadoŭ kałonii — stolki prysudzili byłomu vaŭkavyskamu pradprymalniku. Mikałaja Aŭtuchoviča pryznali vinavatym pa 12-ci artykułach Kryminalnaha kodeksa, siarod jakich «akt teraryzmu», «zamach na zachop dziaržaŭnaj ułady», «stvareńnie złačynnaj arhanizacyi», «zdrada dziaržavie».
Inšym 11-ci fihurantam spravy sud daŭ ad 2,5 da 20 hadoŭ pazbaŭleńnia voli.
Sud prachodziŭ u hrodzienskaj turmie, niekatorych palitviaźniaŭ trymali ŭ asobnych kletkach.
Ludziam stavili ŭ vinu padpał pustoha doma ŭ Vaŭkavysku i dźviuch mašyn — i nieruchomaść, i mašyny naležali milicyjantam, jakich padazravali ŭ datyčnaści da palityčnych represij i pakryvańnia falsifikacyi vybaraŭ.
Asablivaść spravy ŭ tym, što «hrupiroŭku Aŭtuchoviča» vystaŭlajuć terarystyčnaj jačejkaj, stvoranaj pad kantrolem ukrainskich śpiecsłužbaŭ.
Śviatar hoda — Uładzisłaŭ Bahamolnikaŭ
Uładzisłaŭ Bahamolnikaŭ pravioŭ na Akreścina bolš za 100 dzion. Umovy ŭtrymańnia byli katavalnymi — pierapoŭnienaja kamiera, adsutnaść mieddapamohi, pieradač i karespandencyi. Paźniej śviatara adpuścili pad padpisku ab niavyjeździe.
Bahamolnikaŭ — kliryk prychoda minskaha chrama Bohajaŭleńnia, zahadčyk Carkoŭna-histaryčnaha muzieja Biełaruskaj Pravasłaŭnaj Carkvy, člen Jeparchijalnaha suda Minskaj jeparchii.
Hety śviatar abviaščaŭ haładoŭku ŭ padtrymku palitviaźnia Ihara Łosika, a taksama na Płoščy Pieramien słužyŭ lityju pa zabitym siłavikami Ramanu Bandarenku.
Śpiavačka hoda — Meryjem Hierasimienka
Na letnim kancercie ŭ Minsku na Zybickaj śpiavačka vykanała pieśniu «Obijmi» hurta «Akijan Elzy». Heta aburyła prapahandystaŭ. Meryjem zatrymali. Spačatku joj nakidvali sutki, paśla abvinavacili ŭ danacie na «Bajraktar». Paźniej na dziaŭčynu zaviali kryminalnuju spravu pa artykule 342 KK.
Pad vartaj akazalisia taksama kiraŭnik bara «Słoiki-butelki» Andrej Žuk i jaho žonka. Jany na Vaładarcy, prachodziać pa «narodnym» artykule 342.
Žeść hoda — Andrej Paršyn, jaki stralaŭ u padletka
Były kiraŭnik HUBAZiKa Andrej Paršyn u červieni ŭčyniŭ stralaninu ŭ prestyžnym mikrarajonie «Kaskad». Jon pasprabavaŭ razahnać hrupu padletkaŭ kala svajho padjezda, ale atrymaŭ adpor ad 16-hadovaha chłopca. Razzłavaŭšysia, pačaŭ stralać. U vyniku chłopiec trapiŭ u balnicu z paranienaj nahoj. Suprać jaho zaviali kryminalnuju spravu pa artykule «Chulihanstva».
Paźniej baćku prymusili vybačycca pierad Paršynym i skazać, što jaho dziejańni byli adekvatnymi.
Pry Paršynie HUBAZiK adyhryvaŭ centralnuju rolu ŭ praviadzieńni palityčnych represij: ź jaho ŭdziełam byli vyniščanyja palityčnyja struktury, niezaležnyja ŚMI, kultura, biznes, dziasiatki tysiač prajšli praz zatrymańni i ździeki abo vymušanyja byli pakinuć radzimu.
Nadzieja hoda — Zachar Aŭčyńnikaŭ
Heta toj kadet, jaki 1 vieraśnia vystupiŭ pierad Łukašenkam pa-biełarusku i zaklikaŭ hanarycca biełaruskim.
Zacharu 16 hadoŭ. Jon ź vioski Dryhučy Miorskaha rajona. Vučycca ŭ adzinaccatym kłasie. Historyja — adzin ź lubimych pradmietaŭ. U svajoj pramovie na adkrytym uroku jon zhadaŭ Bibliju Skaryny, słavutych ziemlakoŭ Hienryka Dmachoŭskaha i Ihnata Damiejku, zaŭvažyŭ, što ŭ Savieckim Sajuzie byli ŭ tym liku i pamyłki.
«Ja hanarusia ŭsim našym narodam, što prasłaŭlali našu ziamlu, pačynajučy ad Iziasłava, Bračysłava, Rahniedy. Davajcie ŭspomnim tuju ž Jeŭfrasińniu Połackuju. Adna ź pieršych aśvietnic na terytoryi Uschodniaj Jeŭropy, adkryvała škoły, vychoŭvała dziaciej, dapamahała dziaŭčatam. Aśvietnictva ŭ CHI stahodździ, vy ŭdumajciesia», — z honaram pramaŭlaŭ kadet.
Kanśpirałohija hoda — śmierć Makieja
Ministr zamiežnych spraŭ Uładzimir Makiej raptoŭna pamior 26 listapada. Imaviernaj pryčynaj śmierci čynoŭnika ličycca infarkt. Adnak niečakanaść śmierci stvaryła hlebu dla kanśpirałahičnych viersij.
Chtości pabačyŭ u hetym ruku Kramla, bo Makiej nie byŭ prarasijskim. Inšyja schilnyja ličyć heta pomstaj Łukašenki — u 2020-m dziasiatki supracoŭnikaŭ MZS pierajšli na bok naroda, a mnohija dyppradstaŭnictvy zaśviedčyli masavaje hałasavańnie ludziej za Śviatłanu Cichanoŭskuju.
Psichołah hoda — Alaksiej Arastovič
U 2020-m biełarusy padsieli na Kaca (u jakim užo paśpieli rasčaravacca), u 2022-m usie čakali efiraŭ Arastoviča. Charyzmatyčny daradca Ofisa prezidenta Ukrainy ŭmieje znachodzić słovy, jakija ŭsialajuć nadzieju. Z apošnich jaho aptymistyčnych prahnozaŭ — Ukrainie ŭdasca praz paŭhoda viarnuć Krym.
Vykazvajecca Arastovič i pra Biełaruś. Naprykład, pra toje, što biełaruskaje pytańnie — adna z hałoŭnych pamyłak ukrainskich palitykaŭ padčas hetaj vajny. A hałoŭnym miemam vajny jon nazvaŭ viečnuju biełaruskuju isteryku.
Rełakiejt hoda — biełaruski IT-siektar
IT-siektar byŭ drajvieram rostu ajčynnaj ekanomiki. Ale vajna i saŭdzieł u joj Łukašenki ŭzmacnili adtok śpiecyjalistaŭ i cełych kampanij — praca ź Biełarusi praz ekanamičnyja i sankcyjnyja ryzyki vielmi ŭskładniłasia. Z pačatku hoda IT-kampanii stracili jak minimum 14 tysiač supracoŭnikaŭ. Ź Biełarusi syšli takija kampanii, jak Wargaming, Flo, WorkFusion. Inšyja zakryli častku ofisaŭ i prapanujuć supracoŭnikam rełakacyju.
Wargaming i JERAM, jakija adkryli ofisy ŭ Vilni, paśpieli ŭvajści ŭ top-3 najbujniejšych IT-biznesaŭ Litvy.
Papulizm hoda — zabarona na rost cen
Z 6 kastryčnika Łukašenka ŭvioŭ zabaronu na pavyšeńnie cen. Vyklučeńni — tolki pa ŭzhadnieńni z vysokimi čynoŭnikami, sychodzić z rynku praz straty — nielha.
Kramy imhnienna zapoŭnilisia kantralorami ź liku čynoŭnikaŭ, prafsajuzaŭ i prakuroraŭ. Za parušeńni pačali zatrymlivać, pryčym nie tolki za pavyšeńnie cen, ale i za nieabhruntavanyja źnižki. Paźniej ź SIZA takich źniavolenych adpuścili.
Da 20 kastryčnika ŭrad pryniaŭ šerah dakumientaŭ pa rehulavańni cen. A 26 kastryčnika abjaviŭ, što ŭnios źmieny, ale nie patłumačyŭ jakija. Čym vyklikaŭ sapraŭdny kałaps. Pradprymalniki ŭ mnohich haradach z-za razhublenaści i bojazi zatrymańniaŭ praź niapravilnyja ceny nie vyjšli na pracu.
Niadaŭna byŭ vyniesieny pieršy prysud pa cenach. Dyrektara kramy z-pad Mahilova abvinavacili ŭ pieravyšeńni cany na syr na 78 kapiejek. Sud paličyŭ, što hetym pradprymalnik «padryvaŭ aŭtarytet orhanaŭ ułady». Jamu dali dva hady pazbaŭleńnia voli z adterminoŭkaj na hod.
Ptuška hoda — rasčlanionaja kuryca
«Achova ptušak Baćkaŭščyny» ptuškaj 2022 hoda nazvała biełuju sinicu, jakaja žyvie tolki na Paleśsi. Heta marku ź joj vykinuła z hałasavańnia «Biełpošta» paśla abureńnia prapahandystaŭ.
Adnak rasčlanionaja kuryca, što pasadziła Łukašenku na kania, adnaznačna stała samaj abmiarkoŭvanaj.
Pačałosia ŭsio z rolika ŭ tyktoku, dzie žančyna skardziłasia, što nie mahła znajści cełuju tušku kurycy ŭ kramie. Handlovyja sietki stali pradavać pałovy tuški, kab mieć mahčymaść pavysić canu.
Paźniej na naradzie Łukašenka aburyŭsia tym, što ŭ kramach manipulujuć z cenami. «Rasčlanili dochłuju kurycu, upichnuli ŭ polietylenavy pakiet — novy tavar!» — hnieŭna adčytvaŭ jon čynoŭnikaŭ na kamieru.
U vyniku hara naradziła myš: kramam zabaranili samim raźbirać tuški kurej i kuraniat-brojleraŭ.
Zakonaprajekty hoda — zavočnyja sudy i pazbaŭleńnie hramadzianstva
Ułady vyrašyli raspaŭsiudzić represii i na tych, chto vyjechaŭ z krainy. Tamu ŭviali śpiecyjalnuju vytvorčaść. Zavočna sudzić mohuć pa 48-mi artykułach — u tym liku za dyviersii, masavyja biesparadki, udzieł u ekstremisckich farmavańniach, zakliki da sankcyj. Zakon daje prava taksama kanfiskavać majomaść u asudžanych. Pieršy zavočny sud užo pačaŭsia — nad administratarami «Čornaj knihi Biełarusi».
Zakon ab pazbaŭleńni hramadzianstva pakul nie padpisany Łukašenkam, ale ŭžo prajšoŭ deputackija čytańni. Jon dazvolić adbirać hramadzianstva ŭ suviazi z najaŭnaściu ekstremisckaha prysudu.
Danosčyca hoda — Volha Bondarava
Infakazačka z Hrodna Volha Bondarava vykonvaje ŭ łukašystaŭ rolu «hołasu ź miescaŭ» dla apraŭdańnia zmahańnia ź biełaruskaj kulturaj. Pa jaje danosie zatrymali dyrektarku turystyčnaha ahienctva «Vijapol», zakryli hrodzienskuju mastackuju halereju «400 kvadrataŭ».
Pad pytańniem akazałasia nadańnie imia Adama Maldzisa astravieckaj biblijatecy. Viadzie Bondarava zmahańnie i ź biełaruskaj łacinkaj.
U dziciačych sadach i škołach pa jaje klaŭzie zabaranili navat adznačać Chełoŭin i apranać dziaciej u kaściumy zamiežnych hierojaŭ.
Strach hoda — mabilizacyja
U kastryčniku stała viadoma, što Łukašenka pryniaŭ rašeńnie ab praviadzieńni schavanaj mabilizacyi dla daŭkamplektacyi bajavych čaściej. Jana budzie iści pad vyhladam pravierki bajazdolnaści i vykliku vajenaabaviazanych na zbory.
Vajenkamaty pačali źvierku ŭlikovych danych, niekatorym vydajuć mabilizacyjnyja pradpisańni. Dniami skončyłasia raptoŭnaja pravierka bojehatoŭnaści. U Biełarusi ciapier trenirujucca rasijskija mabilizavanyja i razhornuta rehijanalnaja hrupoŭka vojsk.
Zabarona hoda — raman Orueła «1984»
Paśla pahromu biełaruskamoŭnaj kniharni «Knihaŭka» ŭ niamiłaść trapiła antyŭtopija «1984». Rasparadžeńnie źniać tvor z prodažu atrymali kniharni. Pryčynaj, mahčyma, stała kalekcyja knih Orueła ŭ supracoŭnicy «Knihaŭki».
Antyŭtopija Džordža Orueła «1984» apisvaje tatalitarnaje hramadstva. Žychary pazbaŭlenyja hramadzianskich pravoŭ i indyvidualnaści. Ideja paradku absalutyzujecca, isnuje kult asoby Vialikaha Brata, ad ludziej patrabujuć poŭnaha i niekrytyčnaha padparadkavańnia ŭładam. Navat movu źmianiła navamoŭje. «Vajna — heta mir», «svaboda — heta rabstva» i «Vialiki Brat sočyć za taboj» — hetyja vyrazy z ramana stali afaryzmami. I novaj biełaruskaj realnaściu.
Intervjujer hoda — Andrej Pavuk
Błohier rehularna abzvońvaje čynoŭnikaŭ i siłavikoŭ. Andrej Pavuk zvyčajna pytajecca, čamu jany padtrymlivajuć Łukašenku, zakryvajuć vočy na hvałt i falsifikacyi. A paśla vykładaje hetyja pramyja linii na jutub. Ale časam dazvalaje sabie bolš svavolstvaŭ. Padčas adnaho z abzvonaŭ Pavuk nabiraŭ prakuroraŭ i vynosiŭ im žartaŭlivyja prysudy. Za heta na jaho zaviali kryminalnuju spravu za «sadziejničańnie ekstremisckaj dziejnaści».
Ucioki hoda — Kuźniečyki
Vital i Uładzisłaŭ Kuźniečyki, baćka i syn, dva hady žyli ŭ šviedskaj ambasadzie ŭ Minsku. Siłaviki prasili pasolstva vydać ich, a kali taho nie adbyłosia, zaviali na Kuźniečykaŭ kryminalnuju spravu pa artykule 364 KK (hvałt albo pahroza jaho ŭžyvańnia ŭ dačynieńni da supracoŭnika orhanaŭ unutranych spraŭ).
U červieni 2022 hoda Kuźniečykaŭ pavieźli na miedycynskaje abśledavańnie ŭ inšy horad. Adnak da doktara jany nie pajšli. Na roznych aŭtobusach i elektryčkach dabralisia da Viciebskaj vobłaści, a ŭžo adtul — na miažu praź les.
Na dziaržTB paśla pakazali siužet pra ich ucioki, ale viersija prapahandystaŭ akazałasia jašče bolš niejmaviernaj, bo pa joj siłaviki nibyta sačyli za kožnym krokam Kuźniečykaŭ, pieraśledavali ažno da miažy, a paśla prosta adpuścili — byccam pa ŭkazańni Łukašenki.
Miem hoda — «Otkuda na Biełaruś hotoviłoś napadienije»
«I jeśli by za šiesť časov…» — hety karotki manałoh niemahčyma zabyć. Paśla taho, jak Łukašenka na sustrečy z Pucinym raskazaŭ lehiendu ab napadzie na Biełaruś z boku Ukrainy, jaki ŭdałosia praduchilić, jaho słovy imhnienna zavirusilisia. Narodnaja tvorčaść zhienieravała dziasiatki rolikaŭ na temu — frahmient z apraŭdańniem napadu na Ukrainu ŭstaŭlajuć u vypadkovyja dekaracyi. Samyja śmiešnyja my sabrali tut:
Słova hoda — biaśpieka
Z rostam maštabaŭ represij i ŭkaranieńniem ahientaŭ praviły biaśpieki stanoviacca ŭsio bolš aktualnymi. Čyścić pierapiski i fota, zakryvać profili, nie pakidać vostryja kamientary, nie abmiarkoŭvać palityku ŭ kalektyvie. Kali nahodaj dla zatrymańnia moža stać navat słovy «Nie vajnie» i śled ad nalepki «Pahonia» na mašynie, takija pieraściarohi nie praźmiernyja.
«Naša Niva» — bastyjon biełaruščyny
PADTRYMAĆLudzi hoda pa viersii «Našaj Nivy» — hieroi, jakija chacieli spynić vajnu. Što pra ich viadoma?
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana10
Kamientary