На новым этапе жыцця Пратасевіч захапіўся эзатэрыкай. А яго жонка называе сябе экстрасэнсам і вядзьмаркай
У адным са сваіх стрымаў на ютубе Раман Пратасевіч прызнаўся, што захапіўся астралогіяй і робіць расклады на картах таро. Як высветліла «Наша Ніва», любоў да карт — гэта сямейная справа. Жонка Рамана Маргарыта ўвогуле праводзіць рытуалы і замовы — напрыклад, на ачыстку фінансавых каналаў і вызвалення энергіі, каб рухацца наперад, ці на расстанне сям’і.
Раней мы расказвалі, з кім ажаніўся Раман Пратасевіч пасля свайго гвалтоўнага вяртання ў Беларусь: яго абранніцай другі раз запар стала Маргарыта Грыцкевіч.
Дзяўчына мае медыцынскую адукацыю па спецыяльнасці фармацэўт, але апошнім часам сур'ёзна захапілася эзатэрыкай і пазіцыянуе сябе як «вядзьмарку са стажам, таролага і экстрасэнса». Са сваёй сяброўкай яна вядзе інстаграм «Па картах», у якім выкладвае жартаўлівыя відэа на тэму варажбы.
А вось у асабістым тэлеграм-канале Маргарыты «Тут пра цёмнае» ўжо не да жартаў: там яна дзеліцца, як закладвае людзям нячысцікаў і разбіраецца ў механізмах сурокаў і чараўніцтва — у прыватнасці, каб праз магію звесці каханых ці, наадварот, разлучыць.
Маргарыта сцвярджае, што здольная адказаць і дапамагчы людзям з пытаннямі кшталту «Калі я выйду замуж?» ці «Як зняць псуту?».
Там жа яна распавяла, што два з паловай гады вучылася ў шамана і нібыта мае дар яснабачання.
У адным з жывых эфіраў на сваім ютуб-канале Пратасевіч абяцаў гледачам, што аднойчы запросіць да сябе ў кадр жонку і, магчыма, яны разам зробяць расклады на картах.
«Такая цудоўная калода, чорныя карты, з якімі я перыядычна працую, дапамагаю жонцы ў тым ліку… Увогуле, гэта цікавыя пачуцці, калі ты ўжо доўгі час захапляешся эзатэрыкай, вывучаеш розныя накірункі — некаторыя шукаюць там адказы на пытанні, а трэба шукаць веды і спазнанне самога сябе», — разважаў Раман у стрыме.
Цікава, што Маргарыта расказвае знаёмым, што «Рома — ужо былы муж» і што яны «чатыры гады як не камунікуюць», хоць насамрэч іх неаднаразова бачылі разам у Мінску.
Так ці іначай, эфіру ў дуэце з жонкай так пакуль і не здарылася. Хутчэй за ўсё, пакуль што Раману не да актыўнага блогерства: днямі стала вядома, што суд наклаў на яго салідарны штраф на суму 24,5 мільёна рублёў. Раней Пратасевіч, па яго словах, жыў за кошт жонкі, бо на ім вісеў статус экстрэміста. Нядаўна ж расказаў, што скончыў курсы электрагазазваршчыка — цяпер ён спецыяліст 3-га разраду.
Жыхарцы Магілёва пагражаюць крыміналкай за тое, што зняла ранішнюю чаргу ў рэгістратуру3
Каментары