Пажары ў Лос-Анджэлесе пачынаюць сціхаць, у пацярпелых раёнах баяцца марадзёраў
Агонь знішчыў цэлыя жылыя кварталы Лос-Анджэлеса, у тым ліку дамы некаторых галівудскіх кіназорак. Каля 180 тысяч чалавек эвакуявана, загінулі прынамсі 11 чалавек.
Супрацоўнікі амерыканскіх аварыйных службаў чацвёрты дзень запар спрабуюць патушыць разбуральныя пажары, што ўзніклі ў Лос-Анджэлесе. У пятніцу моцныя вятры, якія спрыялі хуткаму распаўсюджванню агню, пачалі сціхаць, што дало магчымасць пажарным узяць пад кантроль асобныя ачагі ўзгарання. У некаторых пацярпелых раёнах абвешчана каменданцкая гадзіна, каб не дапусціць марадзёрства, піша Бі-бі-сі.
Агонь знішчыў цэлыя жылыя кварталы Лос-Анджэлеса, у тым ліку дамы некаторых галівудскіх кіназорак. Каля 180 тысяч чалавек эвакуявана, загінулі прынамсі 11 чалавек.
На пятніцу ў Лос-Анджэлесе ўсё яшчэ бушавалі як мінімум тры магутныя пажары.
Самы буйны з іх, у раёне Пасіфік-Палісейдс (дзе знаходзяцца дамы многіх знакамітасцяў), узяты пад кантроль толькі на 8%, пры агульнай плошчы каля 82,5 км². Іншы пажар, «Ітан», ахапіў каля 65 км², і пажарным удалося патушыць яго толькі на 3%. Трэці пажар, «Кенэт», пачаўся ў чацвер днём на поўнач ад Палісейдс, яго плошча складае каля 4 км², і ён узяты пад кантроль на 35%.
Два іншыя пажары — «Херст» і «Лідзія» — амаль цалкам патушаны. У чацвер пажарным удалося спыніць распаўсюд агню ў пагорках над знакамітым Галівудскім бульварам, дзе размешчана «Алея славы» шоу-бізнэсу.
У пятніцу вецер, які раздзьмуваў агонь, крыху суціх. Паводле даных амерыканскай метэаслужбы, у выходныя яго хуткасць складзе каля 30 км/г, з асобнымі парывамі ад 56 да 80 км/г. Для параўнання, два дні таму хуткасць вятра дасягала амаль 130 км/г.
Каменданцкая гадзіна і марадзёрства
Увечары ў пятніцу мясцовыя ўлады абвясцілі каменданцкі час з 18:00 да 06:00 у раёнах Пасіфік-Палісейдс і Ітан, жыхары якіх пакінулі свае дамы з-за пажараў. Гэта звязана з асцярогамі, што пустыя дамы, у тым ліку асабнякі коштам шмат мільёнаў даляраў, могуць быць абрабаваны.
«Ёсць відавочныя прыкметы, што адбываецца марадзёрства. Ёсць відавочныя прыкметы, што некаторыя людзі накіроўваюцца ў раёны, дзе жывуць пацярпелыя ад бедства, і займаюцца марадзёрствам», — заявіў Байдэн.
Для прадухілення рабаванняў у раёны Палісейдс і Ітан накіравалі 210 супрацоўнікаў паліцыі.
У ліку тых, чые дамы знішчаны агнём, аказалася і жыхарка раёна Палісейдс, журналістка Люсі Шэрыф, якая займаецца пытаннямі клімату. Яна апісвае, як спачатку ўбачыла пажары на пагорках над яе раёнам, а потым агонь хутка пачаў спускацца.
«Я адчула, як хутка змяняўся вецер, ён раздзьмуваў гарачы попел і дым па ўсім паселішчы. Я бачыла, як распаўсюджваўся агонь, ён нібы скакаў з аднаго месца ў другое, а неўзабаве пачаў атачаць Палісейдс», — піша журналістка.
«Карціна была проста апакаліптычная: ярка чырвонае сонца афарбоўвала ўсё аранжавым ззяннем, а з неба, як снег, падаў попел», — працягвае Шэрыф.
Журналістка вырашыла эвакуявацца, калі стала зразумела, што яе дом хутка можа загарэцца. А пасля вяртання яна ўбачыла, што на месцы яе кватэры — і яшчэ каля 20 суседніх — засталася толькі груда дымячых абломкаў. Па словах журналісткі, пажар знішчыў каля 90% яе раёна.
Асноўныя лічбы пажараў у Каліфорніі:
- Каля 180 тыс. чалавек эвакуявана;
- Загінула прынамсі 11 чалавек;
- Знішчана каля 10 тыс. будынкаў;
- Хуткасць ветру падчас пажараў дасягала амаль 130 км/г;
- Паводле даных метэасэрвісу AccuWeather, пажары нанеслі шкоду на $135-150 млрд.
Што чакае Беларусь у бліжэйшыя пяць гадоў? А Расію і Еўропу? Спецдакладчык ААН па Беларусі дае свой расклад2
Каментары