Прэзідэнт Расіі Уладзімір Пуцін на перамовах з абраным прэзідэнтам ЗША Дональдам Трампам плануе абмяркоўваць гарантыі неўступлення Украіны ў NATO і скарачэнне прысутнасці сіл альянсу на ўсходніх межах. Пра гэта піша Financial Times са спасылкай на некалькі расійскіх крыніц, у тым ліку на суразмоўцу, які абмяркоўваў гэтае пытанне з Пуціным.
«Ён хоча змяніць правілы міжнароднага парадку, каб не было пагроз для Расіі. Яго вельмі хвалюе, якім будзе свет пасля вайны. <…> Трамп, са свайго боку, і сам хоча скараціць ролю NATO. Свет змяняецца, магчыма ўсё», — заявіла крыніца выдання.
Аб гатоўнасці Пуціна сустрэцца з Трампам у мінулую пятніцу паведаміў прадстаўнік Крамля Дзмітрый Пяскоў. Так ён пракаментаваў словы абранага прэзідэнта ЗША, які раней паведаміў пра працу расійскага і амерыканскага бакоў над арганізацыяй саміту.
Нягледзячы на перадвыбарнае абяцанне Трампа завершыць вайну Расіі супраць Украіны за 24 гадзіны, Financial Times паведамляе, што на гэтым тыдні Трамп назваў больш рэалістычным тэрмінам шэсць месяцаў для спынення баявых дзеянняў.
Еўрапейскія лідары і чыноўнікі заклікаюць Трампа і яго каманду працягваць ваенную дапамогу Украіне з боку ЗША. На іх думку, гэта ўмацуе пазіцыі Кіева на мірных перамовах і падштурхне Маскву да дыялогу.
Захад, уключаючы генеральнага сакратара NATO Марка Рутэ, падкрэслівае, што паражэнне Украіны ўмацуе пазіцыі Пуціна і яго саюзнікаў у Кітаі, Іране і Паўночнай Карэі.
Што чакае Беларусь у бліжэйшыя пяць гадоў? А Расію і Еўропу? Спецдакладчык ААН па Беларусі дае свой расклад8
Каментары