У польскім Любліне 10 студзеня пачаўся судовы працэс па справе аб шпіянажы. Сярод абвінавачаных — 53-гадовы беларус, які ў польскай прэсе фігуруе пад імем Мікалай М.
Працэс праводзіцца ў закрытым рэжыме: на першым пасяджэнні суд пагадзіўся з тым, што публічнае асвятленне падрабязнасцяў справы ў СМІ можа закрануць інтарэсы дзяржавы. Польская радыёстанцыя RMF24 паведаміла толькі пра абставіны затрымання беларуса і некаторыя дэталі судовага працэсу.
Вядома, што гаворка ідзе пра падзеі, якія адбыліся ў перыяд з 2018 года па 24 лютага 2023 года. Як адзначаецца ў абвінаваўчым заключэнні, перададзеным у суд у лістападзе 2024 года, Мікалай М. «ажыццяўляў дзейнасць, накіраваную на разведку раёна вайсковага аэрапорта ў Бяла-Падлясцы» (размешчаны прыкладна за 45 км ад мяжы з Беларуссю).
Па версіі пракурора, мужчына збіраў там інфармацыю пра дзеянні вайсковай авіяцыі, чыгуначную інфраструктуру і перамяшчэнне ў гэтым раёне вайсковай тэхнікі.
Мужчыну таксама абвінавацілі ў зборы інфармацыі пра аб'екты і транспартныя сродкі ў распараджэнні Агенцтва ўнутранай бяспекі, якія размяшчаюцца і выкарыстоўваюцца ў Бяла-Падлясцы.
Такім чынам, паводле версіі следства, затрыманы «дапамагаў спецслужбам Рэспублікі Беларусь у дзейнасці, накіраванай супраць Польшчы».
Сам затрыманы, як заявіла прэс-сакратарка абласной пракуратуры Любліна, яшчэ на этапе следства прызнаў сябе вінаватым.
За шпіянаж на карысць замежнай дзяржавы ў Польшчы, паводле апошніх зменаў у Крымінальным кодэксе, можна атрымаць турэмнае зняволенне на тэрмін ад 5 да 10 гадоў.
Сваю шпіёнскую дзейнасць, па версіі следства, беларус здзяйсняў пры садзейнічанні 59-гадовага мясцовага жыхара, грамадзяніна Польшчы, які ў СМІ фігуруе пад імем Бернард Ш. Пракуратура абвінаваціла яго ў «аказанні яму дапамогі, прадбачачы магчымасць здзяйснення беларусам злачынства шпіянажу на карысць Рэспублікі Беларусь». Паведамляецца, што мужчына прызнаў сябе вінаватым у тым, што арганізаваў знаходжанне беларуса ў Польшчы і засяліў яго ў кватэру. Пад арышт мужчыну да суда не змяшчалі, толькі забараніўшы яму выязджаць з краіны і канфіскаваўшы з гэтай мэтай ягоны пашпарт.
Афіцыйны Мінск інфармацыю пра судовы працэс за шпіянаж на карысць Беларусі ў Польшчы пакуль не каментаваў.
Расійскага шпіёна з Канады асудзілі ў Польшчы на 8 месяцаў. Ён сам раскрыўся сп'яну
Расія зноў стварае абменны фонд: грамадзяніна ЗША асудзілі на 15 гадоў за «збор даных для сістэмы генетычнага скрынінгу»
«Я думаў, што рускія хутка перамогуць, але выйшла, як заўсёды». Споведзь ідэйнага расійскага шпіёна, які атрымаў ва Украіне пажыццёвае
Расійскую шпіёнку, якая збіралася спакусіць і выкрасці журналіста Грозева, пры арышце заспелі ў ложку з іншым агентам Крамля
У Літве арыштавалі 82-гадовага былога ссыльнага за шпіянаж на карысць Расіі
«Кубло такое». З перапісак Кабанчука робіцца ясна, чаму Верамейчыка палічылі небяспекай і забаранілі яму ўезд ва Украіну22
Каментары